Rəhman Hacıyev: “Nəyə qadir olduğumuzu mövsümün sonunda sübut edəcəyik”

“Neftçi”nin yarımmüdafiəçisi Rəhman Hacıyevin futbolinfo.az-a müsahibəsi

• Əvvəlcə, son turda “Qəbələ” üzərində qalib gəldiyiniz matçdan danışaq. Oyunu necə şərh edərdin?
• Bilirsiz ki, “Sabah”la aramızdakı xal fərqi elə də çox deyil. Buna görə bizim üçün bütün oyunlar çox vacibdir. Zəif rəqib yoxdur, eyni hazırlaşırıq. “Qəbələ” zəif komanda deyil, çempionatda da yaxşı oynayırlar. Matçda da qol epizodları oldu, vursaydılar hər şey fərqli olardı. Daha çox çətinlik yaradardılar bizə. Qol epizodlarımızdan istifadə etdiyimiz üçün qalib gəldik.
• “Neftçi” istənilən kimi çıxış etmir. Bunun səbəbin nədə görürsən?
• Düşünürəm ki, burda qeyri-adi nəsə yoxdur. Futbolda eniş də olur, yüksəliş də olur. Hardasa ola bilər ki, səhv edirik, ya nəsə baş verir. Başda çalışdırıcımız olmaqla hamımız əlimizdən gələni edirik daha yaxşı nəticə qazanaq. İnanıram ki, oyundan-oyuna fərqli oyun göstərəcəyik.
• Son iki mövsümü “Keşlə”də (İndiki “Şamaxı”) keçirmişdin. Yenidən doğma komandan “Neftçi”yə döndün. Burda sənin üçün fərqli nə var?
• “Neftçi” mənim doğma komandamdır, evimdir. 6 il “Neftçi”də oynamışdım, sonra “Keşlə”yə getdim. İndi yenidən evimə qayıtmışam. Burda sıxılmıram,özümü daha rahat hiss edirəm. Nə qədər vaxt verilirsə, ondan maksimum yararlanmağa çalışıram. Daha çox vaxt verilsə, bundan da artığını edəcəm. Komandama xeyir verməyə çalışıram.
• “Neftçi”də az oynamaq şansı qazansan da, qollar vurmusan. Daha çox vaxt olsa…
• Çempionat təzə başlayanda demək olar ki, çox az meydana çıxırdım. Futbol 11 nəfərdən ibarətdir və top hər zaman gəlib səni tapmır. 15 dəqiqə meydana çıxanda istədiklərini ortaya qoya bilmirsən. İndi məşqçi mənə daha çox güvənir, meydana buraxır və mən də ümidləri doğrultmağa çalışıram. Sonuncu oyunda da qol vurdum. Buna sevinirəm. Nə qədər çox şans qazansam, yaxşı şeylər edə bilərəm. Özümə güvənirəm.
• “Sabah” əsas rəqibinizdir, amma hər iki oyunda onlara uduzmusuz. Mövsümün ikinci yarısında durumun fərqli olacağına ümid edirsən?
• Düzdür, onlara uduzmuşuq. Amma məsələn, Masazırda keçirilən ilk oyunda uduzsaq da, çox yaxşı oynamışdıq, xeyli qol epizodu əldə etmişdik. Təəssüf ki, həmin epizodlardan yararlana bilməmişdik. Hazırda vəziyyət elədir ki, ciddi xal fərqi yoxdur. Bundan sonra 2-3 oyun var, ondan sonra toplanışa gedəcəyik, yaxşı da hazırlıq keçəcəyik. Ona görə də mövsümün axırında sübut edəcəyik ki, nəyə qadirik.
• “Neftçi” hər zaman çempionluğa oynayıb. Amma görünən odur ki, bu mövsüm də birincilik əldən gedib. “Qarabağ” böyük xal fərqi ilə irəlidədir…
• Arada fərq çoxdur, düzdür. Peşəkar futbolçu kimi mən çempionluğun əldən getdiyini qəbullana bilmirəm. Hər oyuna qələbə üçün çıxırıq. Daha baxımlı oyunlar keçirməyə çalışırıq ki, mövsümün sonunda hər şey yaxşı olsun. Heç futbolçular arasında da bunu danışmırıq ki, artıq çempionluq getdi, biz çempion ola bilməyəcəyik. Bu söhbəti heç etmək istəmirəm, xoş deyil.
• Laurentsiu Reghekampfın gəlişindən sonra azarkeşlərdə ümid işığı yaranıb ki, bu il də olmasa, gələn mövsüm çempionluq üçün oynaya bilərik…
• Mən də onlarla razıyam, ümid edirəm. Bəlkə də bu mövsüm çatışmayan bəzi şeylər var. Mövsümdən mövsümə daha güclü komanda olub istədiyimizi əldə edəcəyik.
• Milli komandanın Moldova üzərindəki 2:1 hesablı qələbəsini necə şərh edirsən?
• Komandamız çox yaxşı oynadı, özlərində əla top saxlayırdılar. Nəticə də gəldi. Orada dostlarım var, qardaşlarım var. Onları təbrik edirəm. Ümid edirəm ki, ardı gələr.
• Növbəti çağırışlarda dəvət gözləyirsən?
• Az meydana çıxdığıma görə yəqin ki, dəvət almıram. “Keşlə”də oynadığım vaxtlarda hər zaman çağırılırdım. Ümid edirəm ki, klubumda mütəmadi oynayıb milliyə gedərəm.

FƏRİD