“Qarabağ” klubu akademiyasına daha çox diqqət ayırmağa başlayıb. Aftandil Hacıyevin akademiyaya koordinator təyin olunmasından görülən mübət işlərin sayı artıb.
Hacıyev futbolinfo.az saytına açıqlamasında yeniliklərdən danışıb: “Artıq bir aydan çoxdur ki, buradayıq. Düzü, akademiyada radikal dəyişikliklərə ehtiyac yoxdur. Yeni kollektiv formalaşdırmışıq. İki yerdə məskunlaşmışıq – “Sərhədçi” idman kompleksində və Tofiq Bəhramov adına Respublika Stadionunda. Yuxarı yaşlılar “Sərhədçi”də, azyaşlılar isə mərkəzi arenada hazırlaşırlar. Akademiyaya nəzarəti bir qədər də artırdıq. Hər iki yerdə köməkçilərim olacaq. Həmçinin skaut şöbəsi yaratdıq”.
“Qarabağ” ot örtüyü yararsız hala düşən “Sərhədçi”də təmir işləri aparmağı planlaşdırır: “Onun yenilənməsi ilə bağlı rəhbərliklə söhbətlərimiz yekunlaşmaq üzrədir. Düşünürəm ki, müsbət cavab alacağıq. Məncə, yaxın zamanlarda meydança dəyişiləcək”.
Hacıyevin gəlişi ilə “Qarabağ” veteranlarını da geri qaytarır. Komandanın iki sabiq futbolçusu Ağdam klubu üçün gələcəyin ulduzlarının yetişdirilməsinə kömək edəcək: “Məşqçi heyətində cüzi dəyişiklik oldu. Həm aşağı, həm də yuxarı yaş qruplarına yeni məşqçilər cəlb etmişik. Onların arasında hər kəsə tanış simalar da var. Millinin və “Qarabağ”ın sabiq futbolçuları Rəşad Sadiqovla Rauf Əliyevin adını qeyd edə bilərəm”.
