“Şamaxı”nın qapıçısı: “Hakim rəqib komandadan qorxurdu”

“Şamaxı”nın qapıçısı Rəşad Əzizlinin futbolinfo.az saytına müsahibəsi

– Azərbaycan kubokunun 1/8 final mərhələsində “Turan Tovuz”a evdə uduzdunuz. Oyunu necə dəyərləndirirsən?

– Oyun bizim üstünlüyümüzlə keçdi. İlk hissəni topa nəzarət edirdik. İkinci hissədə isə oyundan qopmalar olurdu. Burada hardasa qola çevirə bilmədiyimiz epizodların da rolu oldu. Ani diqqətsizlikdən qol buraxdıq. Məğlubiyyətə layiq deyildik.

– Premyer Liqada gözlənilmədən səfərdə “Turan Tovuz”u 3:1 hesablı məğlubiyyətə uğratmışdınız. Kubokda niyə qələbə alınmadı?

– Çempionatdakı qələbəmiz gözlənilən idi. Çünki biz oyunumuzla daha çox xal yığmalı idik, daha yuxarı pillələrdə qərarlaşmalı idik. Sadəcə, bəxtsizlik olduğundan nəticələri yaxşılaşdıra bilmirdik. Kubokda da qələbə qazana bilərdik. Sadəcə, bilmirəm hakimlər nə etmək istəyirdi? Biz Vüqar Həsənliyə və onun köməkçilərinə hakim dediyimiz halda, onlardan ədalət gözlədiyimiz halda bu adamlar rəqib komandadan qorxursa, nə deyək? Sanki rəqibə söz deməyə ürəyi yox idi, sanki çəkinirdi ki, onlara nəsə desin. Ondan ədalət gözləməyə dəyməz. O, elə “ağa qara, qaraya ağ” deyəndir.

– Ümumiyyətlə, “Şamaxı” yaxşı oyun göstərsə də, qələbələr azdır. Bunun səbəbi nədədir?

– Əsas olan bizim gənc məşqçilərdən və gənc futbolçulardan ibarət komandamızın inkişafıdır. Bu gün hamı “Şamaxı”da görülən işlərdən danışırsa, deməli, məşqçinin tutduğu yol, müəyyənləşdirdiyi strategiya doğrudur. Bu oyun fəlsəfəsi ilə qələblər də gələcək. Zaman lazımdır. Məqsəd yeni məşqçilər, yeni oyunçular qazanmaqdır.

– Bölgə klubunda özünü necə hiss edirsən? Orada oynamaq rahatdır?

– Burda gözəl kollektivimiz var, rəhbərlik sağ olsun ki, gözəl şərait yaradıb. Hər şey yüksək səviyyədədir. Məşqçilər də futbolçularla dostdur, qardaşdır. Belə olan yerdə adam rahat olur, sıxıntı da qalmır.

– Qış fasiləsi yaxınlaşır. Fasilədən sonra vəziyyəti dəyişə biləcəksiz?

– Hər fasilədən sonra klubların hansı formada qayıdacağını heç kim deyə bilmir. Biz də qışda təlim-məşq toplanışından qayıdandan sonra maksimum xallar yığmağa çalışacağıq.

– Həftəsonu “Kəpəz”lə ev oyununuz var. Qələbə qazana biləcəksiz?

– Hər oyuna yalnız qələbə üçün çıxırıq. Bu oyun vacibdir ki, aradakı xal fərqini artıraq. Qələbə qazansaq, 7-ci pilləyə qalxa bilərik.

AĞA