Əsl basketbol başlayır

MBA-da play-off oyunlarına start verilir. Daha dəqiq desək, okeanın o tayında əsl basketbol başlayır. Çünki buna qədər olan müntəzəm çempionat bir jurnal idi. Play-off isə tamamilə ayrı bir aləmdir. Bu mətndə Şərq və Qərb konfranslarında cütlüklərə nəzər yetirəcəyik.

Şərq konfransını lider kimi “Miluoki” basketbolçuları tamamladılar. İlk mərhələdə onların rəqibi hələ ki, məlum deyil. 2-ci yerin sahibi isə “Boston Seltiks” oldu.

Boston Seltiks (2) – Atlanta Houks (8)

Liqanın ən titullu iki komandasından birinin rəqibi “Atlanta Houks” olacaq. Bostonlular nəinki 1-ci mərhələnin , hətta çempionatın favoritlərindən sayılır. Keçən il yalnız finalda məğlub olan komanda bu il güclü bir heyətlə çempion olmağı hədəfləyir.

Filadelfiya Siksers (3) – Bruklin Nets (6)

Mövsüm “Nets” üçün heç də birmənalı alınmadı. Mövsümün əvvəlində baş məşqçi Stiv Neş komandanı tərk etdi. Ardınca isə liderlər Kevin Dürant ilə Kayri İrvinq digər komandalara keçdilər. Buna baxmayaraq, komanda heç kimin gözləmədiyi halda konfransda 6-cı oldu. Keçən il ulduzları ilə birlikdə “Bruklin” ilk mərhələdə “Boston”a 0:4 hesabı ilə məğlub olmuşdu.

“Filadelfiya” ilə “Bruklin” sonuncu dəfə 2019-cu ilin play-offunda üzləşib. Mərhələni “Filadelfiya” rahat keçmişdi. Bu dəfə komanda son oyunlarda yaxşı təsir bağışlayır. Lakin rəqibi keçmək asan olmayacaq. Belə ki, digər düşərgədə Coel Embid kimi basketbolçu var. Böyük ehtimalla Coel mövsümün MVP-si seçiləcək. Ona qarşı ilin ən yaxşı müdafiəçilərindən biri Nik Klekston oynamalıdır.

Klivlend Kavalers (4) – Nyu-York Niks (5)

Müntəzəm çempionatda aralarında keçirilən oyunların dördündən üçündə “Niks” qələbə qazanıb. Nyu-York təmsilçisinin ən böyük silahı olan Rendl zədəlidir. Lakin ilk oyuna qədər parketlərə dönəcəyi gözlənilir. Vaxtilə “Çikaqo”da ad çıxarmış Tom Tibodonun ixtiyarında kifayət qədər geniş və balanslaşdırılmış heyət var. Play-offda isə bunun önəmi böyük olur.

“Kavalers”in əsas silahı Donovan Mitçelldir. O, karyerasının ən yaxşı mövsümünü keçirir. Donovanın orta məhsuldarlığı müntəzəm çempionatda 28,3 xal təşkil edib. Komandaların oyununu diqqətdən keçirsək, “Nyu-York Niks”in ribaundlarda daha güclü olduğunu görə bilərik. Klivlendlilər isə bu komponentdə liqada ən zəiflərdəndirlər.

Bu qarşıdurmada “Kavalers”ə azarkeşlik etməyə dəyər. Çünki komandanın heyətində Türkiyə millisinin üzvü Cedi Osman çıxış edir.

Şərqdən fərqli olaraq Qərbdə hadisələr son oyun gününə qədər dramatik olub. Burada komandaların yeri son anda bilinib. Konfransı birinci yerdə bitirən “Denver Naggets”in rəqibi bu gecə bilinəcək.

Memfis Qrizliz (2) – Los-Anceles Leykers (7)

Memfisin əsas silahı Co Moranrtdır. Digər tərəfdə isə əfsanə veteranlar var. Bütün mövsüm boyu məşqçilər korpusu Lebron Ceymslə Entoni Devisi ciddi zədədən qoruyub. Mövsümə bərbad start verən komandanın vəziyyəti məhz bu iki basketbolçunun sağalmasından sonra düzəlib. Lebron çempionatı 24,1-lik orta məhsuldarlıqla, Devis isə dabl-dablla tamamlayıb. Hər ikisinin təcrübəsi “Leykers”ə kömək etməlidir.

Sakramento Kinqs (3) – Qolden Steyt Vorriors (6)

Şimali Kaliforniyanı təmsil edən iki komandanın qarşılaşmasını derbi adlandırmaq olar. 1985-ci ildən bu yana hər ikisinin eyni vaxtda play-offa çıxdığı hal olmayıb. Bir-biriləri ilə isə play-offda ilk dəfə qarşılaşacaqlar. Sakramentolular vəsiqəni daha rahat qazandıqları halda, ötənilki çempion son oyunlarda çox əziyyət çəkməli olub. Hal-hazırda məhz Körrinin komandası daha yaxşı formadadır. Ondan başqa Kley Tompsonun məhsuldarlığını qeyd etmək lazımdır.

Ev üstünlüyü Sakramento təmsilçisinin tərəfindədir. Lakin bunu üstünlük də adlandırmaq olmaz. Şəhərlər arasında məsafə avtobusla 1 saata qət edilir. Həm də bu mövsüm “Sakramento”nun səfərdə daha yaxşı oynadığını da vurğulamalıyıq.

Əlavə edək ki, “Kinqs”in heyətində Arvidas Sabonisin oğlu Domantas çıxış edir. Onun da adı bu il MVP-liyə namizədlər arasında qeyd edilir.

Finiks Sans (4) – Los-Anceles Klippers (5)

Play-offda ilk mərhələnin ən maraqlı cütlüyü. Burada keçmiş komanda yoldaşları və eyni nəslin ulduzları Kevin Dürantla Rassel Vestbruk üz-üzə gələcəklər. Onlar brilikdə 608 oyunda meydançaya çıxmış və komandalarına həmin oyunların 62 %-də qalib gəlməyə yardım etmişlər. Lakin indi keçmiş komanda yoldaşları rəqibdirlər.

“Klippers”in heyətində itki Pol Corcun zədəli olmasıdır. “Oklahoma” ilə oyunda zədələnən snayper ilk mərhələni buraxa bilər. Onun yoxluğunda Kavay Leonardın zədədən tam sağalması azarkeşləri sevindirir. Rasselin də yaxşı formada olması “Klippers”ə şans verir.

Son illərin ən güclü komandası olan “Sans”ın heyəti bir qədər dəyişilib. Buker, Pol və Deandre Eyton kimi oyunçulara Kevin Dürant qoşulub. Gəlişindən sonra zədələnən Dürant sağaldıqdan sonra 5 oyunda meydançaya çıxıb və bu oyunların hamısında finikslilər qələbə qazanıblar.

Komandalrın oyun üslublarına nəzər yetirdikdə “Klippers”in 3 xallıq atışlara üstünlük verəcəyini görə bilərik. Finikslilər isə bu il perimetri ən yaxşı qoruyan komandadır. Bu baxımdan ev sahibliyi üstünlüyünə malik olan Monti Vilyamsın yetirmələri daha şanslı görünürlər.

Əlavə edək ki, şənbə gününün  təqvimi belədir:

21:00. Filadelfiya – Bruklin

23:30. Boston – Atlanta

ABBAS