"Udineze"nin baş məşqçisi: "Məni bir şey təəssüfləndirdi"

“Udineze”nin 15 yaşadək futbolçulardan ibarət komandasının sloveniyalı baş məşqçisi Boşko Boşkoviçin müsahibəsi

 
– 3-cü dəfə keçirilən “Qəbələ Kuboku”nda artıq ilk görüşünüzü meydan sahiblərinə qarşı keçirmisiniz. 0:1 hesabı ilə uduzduğunuz görüş haqqında nə deyə bilərsiniz?
– “Qəbələ”nin əvvəlki oyunlarına baxmışdım. Çox yaxşı komanda olduğunu görmüşdüm. Oyun zamanı yorğunluq öz sözünü dedi. Çünki demək olar ki, 1 günümüz bura səfərə getdiyindən, yaxşı yatmamışdıq. Belədə qapımızdan qol buraxdıq. Ancaq daha sonra toparlana bildik. İkinci hissədə daha yaxşı oynadıq. Matçda üstünlüyü ələ keçirdik. Təəssüf ki, fürsətlərimizdən yararlana bilmədik. Qarşıda hələ 2 oyunumuz var.
 
– Qəbələyə ilk dəfədi gəlirsiniz. Turnir və infrastruktur haqqında təəssüratlarınız necədi?
– Burda hər şey möhtəşəmdi. Çox peşəkar şəkildə hazırlanmış stadionları var. Buranın komandası da bizə qarşı çox yaxşı çıxış etdi. Ancaq məni bir şey təəssüfləndirdi. Onlar hesabı açdıqdan sonra sadəcə nəticəni qorumaq haqqında düşünməyə başladılar. İkinci hissənin 10-cu dəqiqəsindən sonra ancaq özlərini yerə atmaq və vaxt aparmaqla məşğul idilər. Onlar hələ gəncdilər, indidən belə etmələri çox yanlış düşüncədi.
 
– Sizi “yarıitaliyalı” da adlandırmaq olar. Azərbaycan yığması ilə İtaliya növbəti seçmə mərhələdə eyni qrupda çıxış edəcək. Bu haqda nə deyə bilərsiniz?
– Xətrinizə dəyməsin. Səmimi deyəcəyəm, Azərbaycan yığmasını tanımıram. Amma Qəbələdəki kimi futbola bu şəkildə sərmayə qoyulursa, yəqin ki, yaxın vaxtlarda yığmanız yaxşı nəticələr göstərəcək. Məsələn, “Neftçi” Avroliqanın qrup mərhələsində çıxış etdi. Bu istər-istəməz futbolunuzun xeyrinədi.
 
– Bəs İtaliya ilə Azərbaycan arasındakı oyunların necə keçəcəyini gözləyirsiniz?
– Azərbaycanın dünya çempionatının iştirakçısı İtaliya ilə qarşılaşması nəticədən asılı olmayaraq, istər-istəməz sizə xeyir verəcək. Yəni mənfi nəticə bu inkişafa pis təsir etməyəcək.
 
– Siz Sloveniya yığmasının qapıçısı olmusunuz. Ölkəmizdə bəzi sloveniyalı futbolçular çıxış edib. Onlardan tanıdığınız varmı?
– Yox.
 
– Deyan Rusiç və Deyan Kelhar burda çıxış ediblər…
– Hə, düzdür. İndi xatırladım. Onları daha çox Sloveniya çempionatında oynadığı illərdə tanıyırdım.
 
– Kelhar məhz “Qəbələ”də çıxış edib və qış fasiləsində “Srvena Zvezda”ya keçib…
– Onu dediyim kimi tanıyıram. Səhv etmirəmsə, o, Serbiya çempionu oldu. Kelhar çox yaxşı oyunçudur O, Sloveniya millisinə daim çağırılırdı. (apasport.az)