Müsahibə
"Gedən futbolçulardan heç biri ilə problemimiz yoxdu"
"Neftçi"nin vitse-prezidenti Tahir Süleymanovun …
"Neftçi"nin vitse-prezidenti Tahir Süleymanovun futbolinfo.az saytına müsahibəsi
– Mahir Şükürov və Rəşad Sadiqovun göndərilməsinin səbəbi nədi?
– Bunlar tam fərqli məsələlərdi. Sadiqovla "Neftçi"nin 1 illik müqaviləsi var, amma Şükürovla müqavilə müddəti başa çatıb. Onlara "Neftçi"yə xidmət etdikləri üçün təşəkkür edirik. Komandayla birgə uğur qazandılar, çempionluq yaşadılar. Hər ikisi səviyyəli futbolçudu. Rəşada yerli klublardan təkliflər var. Hələ ki, danışıqlar davam edir. Bu məsələ ilə bağlı qarşıdakı günlərdə addımlar atılacaq. Hər iki futbolçu "Neftçi"nin uğurlarında böyük pay sahibidi və heç bir futbolçu ilə problemimiz yoxdu.
– "Neftçi"nin 2 aparıcı futbolçusunun "qara siyahı"ya salınmasının səbəbi ictimaiyyətə də maraqlıdı…
– "Neftçi"nin heç bir futbolçu ilə problemi olmayıb. Biz gəncləri hər zaman önə çəkib, şans vermişik. Elə kubokun finalında Samir Məsimovun, Məqsəd İsayevin göstərdiyi oyun buna nümunədi. Bizim gənc futbolçulara hər zaman diqqətimiz olub. Bu yola da davam edirik. Qeyd edilən 2 futbolçunun heç biri ilə problemimiz olmayıb. İctimaiyyətə də bildirmək istiyirəm ki, Şükürov və Sadiqovdan da "Neftçi" razı olub. Bertuççinin də Braziliya A Seriyasına getmək ehtimalı var. Sadiqova da dəvət var və bu da "Neftçi"nin doğru yolda olmasını göstərir. Bu, həm futbolçu, həm də klub üçün müsbət məqamdı.
– Belə çıxır ki, "Neftçi" gənclərə şərait yaratmaq üçün yaşlıları göndərir?
– Bu şəkildə də məsələyə yanaşmaq doğru olmazdı. Çünki gənc olmasına baxmayaraq, "Neftçi"nin futbolçuları Avropa Liqasının qrup mərhələsini görüb, çempionluq yaşayıb. Təbii ki, gənclərə üstünlük veririk. Amma bu, Rəşad Sadiqov və ya Mahir Şükürovun "Neftçi"də uğursuz dönəm keçirməsi anlamına gəlmir.
– "Neftçi" Cavid İmamverdiyevə Türkiyədə oynama şansı verəcək?
– Cavidə görə rəsmi təklif gəlib və danışıqlar gedir. Təbii ki, İmamverdiyevin yetişməsində "Neftçi"nin xidməti var və biz futbolçumuzun dəyərini bilirik. Burada söhbət ancaq icarədən gedir.
– AZAL Emin Mehtiyevin xidmətində maraqlıdı. Onun gələcək taleyi necə olacaq?
– AZAL-dan rəsmi təklif gəlməyib. Tək AZAL yox, "Simurq" da Mehtiyevin xidmətində maraqlıdı. Ancaq Emin hazırda "Neftçi"nin düşərgəsindədi və toplanışa hazırlaşır.
– Emil Balayev də artıq düşərgəyə qayıdıb. Balayev yeni mövsümdən yenə də "Araz Naxçıvan"da olacaq, yoxsa "Neftçi" qapıçısını buraxmayacaq?
– Emil "Neftçi"nin futbolçusudu. O, bu mövsüm Saşa ilə əsas heyət uğrunda mübarizə aparmalıdı. Emilin "Neftçi"nin əsas heyətində oynamaq şansı var. Məşqçilər korpusu və rəhbərlik də buna şərait yaradacaq.
– Pavel Doroşev neçə il "Neftçi"də məşqçilik edəcək?
– Doroşevin də klubumuzla olan müqavilə müddəti başa çatmışdı. Onunla 1 illik müqavilə imzalanıb.
RÖVŞƏN ƏHLİMANOĞLU