Müsahibə
"Vaqifin getməsi "İnter"ə çətinlik yaradacaq"
Bu yay Bakı "İnter"i ilə yollarını ayıran fransalı m&…
Bu yay Bakı "İnter"i ilə yollarını ayıran fransalı müdafiəçi Brüs Abdulayenin futbolinfo.az saytına müsahibəsi
– Yeni mövsümdən Fransanın 2-ci Liqasında çıxış edəcək "Orlean" klubu ilə 1 illik müqavilə bağladınız. Yeni komandanızda vəziyyət necədi?
– Açığını desəm, heç də ürəkaçan deyil. Düzdü, müqavilə imzaladım, amma hələ ki, bəzi problemlər var. Müqaviləm tam hazır deyir. Ümid edirəm ki, hər şey qısa vaxtda öz həllini tapacaq.
– Bu gün sabiq komandanız "İnter" bu Avropa Liqasının ikinci təsnifat mərhələsi çərçivəsində Moldova "Tiraspol"u ilə qarşılaşacaq. Sizcə, "bankirlər" mərhələ adlaya biləcəklər?
– Əminəm ki, "İnter" evdə də qalib gələcək. Çünki baş məşqçi Kaxaber Sxadadzeni və futbolçuları yaxşı tanıyıram. Bilirəm ki, ilk oyundan sonra onlar rəqibi daha yaxşı analiz edib, komandadakı çatışmazlıqları aradan qaldıracaqlar. Düzdü, "İnter" ilk matçda 3:0 hesabı ilə öndə olarkən, qapısında 2 top buraxdı. Amma mən bunu elə də böyük problem hesab etmirəm. Əminəm ki, baş məşqçi xırda çatışmazlıqları aradan qaldıra biləcək.
– "İnter"in 3 cavabsız qoldan sonra 2 top buraxmasından danışdız. Siz də həmin komandanın güclü müdafiəçilərindən biri idiniz. Ola bilər ki, sizin gedişiniz komandanın müdafiə xəttini zəiflətsin?
– (Gülür) Bu barədə dəqiq heç nə deyə bilmərəm. Sadəcə, onu bilirəm ki, "İnter"in Laşa Salukvadze və İvan Benites kimi güclü müdafiəçiləri var. Ümid edirəm ki, növbəti matçda uğur qazanıb, mərhələ adlaya biləcəklər. Bu, klub üçün çox önəmlidi.
– Sizdən sonra komandanın ən məhsuldar oyunçusu Vaqif Cavadov da "İnter"i tərk etdi. Sizcə, belə təcrübəli hücumçunun gedişi Bakı təmsilçisinə çox problem yaradacaq?
– Necə? Vaqif "İnter"dən ayrılıb ki? Hara gedib?
– Türkiyənin 1-ci divizionunda mübarizə aparan "Qaziantep BB" klubu ilə 1+1 illik müqavilə bağlayıb…
– Vaqif çox güclü futbolçu və yaxşı insandı. O, birlikdə oynadığım ən yaxşı hücumçu idi. Ancaq "İnter"in Baçana Sxadadze kimi daha bir yaxşı hücumçusu da var. Təbii ki, Vaqifin getməsi "İnter"ə çətinlik yaradacaq, amma Sxadadzeni yaxşı tanıyıram, çətinliklə üzləşəndə onun həmişə alternativ planları olur.
– Bu gün digər klubumuz "Qəbələ" də Avropa Liqasının birinci təsnifat mərhələsində mübarizə aparacaq. Onlar ilk oyunda Bosniya və Herseqovina “Şiroki Briyeq”in məğlub (0:2) oldular. Sizcə, bu məğlubiyətdən sonra səfər matçında şansları var?
– "Qəbələ" də güclü klubdu. Düzdür, bəzi aparıcı oyunçuları komandanı tərk etdi, amma yenə də yaxşıdılar. Şans heç vaxt tükənmir. Futbolda hər şey ola bilər. Hesab edirəm ki, qalib gəlib, mərhələ adlaya bilsələr, bu, onlar üçün çox yaxşı olar.
ELMAR VƏLİYEV