Müsahibə
Turkoviç: “Əhmədovun məşq və oyun üslubundan xoşum gəlmirdi"
2013/14 mövsümünün sonunda AZAL-dan ayrılan bosni…
2013/14 mövsümünün sonunda AZAL-dan ayrılan bosniya və herseqovinalı hücumçu Nedo Turkoviçin futbolinfo.az saytına müsahibəsi
– Ötən mövsüm AZAL-da çıxışı ilə seçilən futbolçulardan idiniz. Sizi niyə klubda saxlamadılar?
– Bəli, mən həmin vövsüm yaxşı oynadım və komandam üçün əlimdən gələni etdim. Amma baş məşqçimiz Vaqif Sadıqovun gedişindən sonar hər şey dəyişdi. Yeni baş məşqçi Tərlan Əhmədovun gəlişindən sonra qol vurmağı unutdum. Açığını desəm, onun məşq və oyun üslubundan heç xoşum gəlmirdi.
– Amma AZAL Əhmədova böyük ümidlər bəsləyir. Sizcə, o, komandanı iddialı edə biləcək?
– Fikrimcə, o, gələndən sonra AZAL daha pis oynamağa başladı. Amma yenə də ona uğurlar arzulayıram.
– Müəyyən müddət AZAL-da çıxış etdiniz. Sizcə, o klubda nə çatışmırdı?
– Bu məsələ mənə də qaranlıq qaldı. Ola bilər ki, bu problem AZAL-ın başqa klublar kimi çoxlu büdcəyə malik olmamasından qaynaqlanır. Gərək çoxlu pulun ola ki, yaxşı oyunçular ala biləsən.
– Azərbaycan Premyer Liqasındakı kareyranızı necə dəyərləndirərdiz? Sizdə çempionatımızla bağlı xoş xatirə qalıb?
– Orada oynamaq mənim üçün yaxşı təcrübə idi. Xoşbəxtəm ki, orada çıxış etmişəm. Bilmək olmaz, bəlkə yenə də ora qayıtdım (gülür).
– Azərbaycandan sizə təklif gəlsə, yenidən burada oynamaq istəyərsiz?
– Əlbəttə ki. Niyə də olmasın?
– Azərbaycanda başqa hansı klublarda çıxış etmək istəyərdiz?
– Azərbaycanda ən yaxşı klub “Qarabağ”dı. Dostum İbrahim Sehiç də orada çıxış edir. Həmçinin, “İnter” və “Neftçi”dən də xoşum gəlir.
– “Qəbələ” Avropa Liqasının birinci təsnifat mərhələsi çərçivəsində sizin ölkəni təmsil edən "Şiroki Briyeq"lə bacarmadı və mübarizəni dayandırdı. Həmin oyunları izlədinizmi?
– Bəli, izlədim.
– Sizcə, “Qəbələ”də nə çatışmırdı?
– "Qəbələ"nin yaxşı maliyyə imkanları ola bilər, amma “Şiroki Briyeq”in də yaxşı futbolçuları var. “Şiroki Briyeq” çox güclü komandadı. Mən oyundan əvvəl də bilirdim ki, “Qəbələ” onunla bacarmayacaq.
– Yeni klubunuzda işlər necədi?
– Hazırda Bosniya və Herseqovinanın ən güclü klublarından olan “Jelezniçar”dayam. Avropa Liqasında çıxış edirik və ikinci təsnifat mərhələsinə vəsiqə qazandıq.
ELMAR VƏLİYEV