Ölkə futbolu
"Qarabağ" üçün "Neftçi" nümunəsi
Ölkəmizi UEFA Çempionlar Liqasında təmsil edən "Q…
Ölkəmizi UEFA Çempionlar Liqasında təmsil edən "Qarabağ" ikinci təsnifat mərhələsi çərçivəsində Maltanın "Valletta" klubunu iki oyunun nəticəsinə əsasən 5:0 hesabı ilə məğlub edərək, növbəti mərhələyə yüksəldi. Futbolinfo.az xəbər verir ki, dünənki cavab qarşılaşması bir sıra maraqlı məqamlarla yadda qaldı.
Tofiq Bəhramov adına Respublika stadionunda baş tutan qarşılaşmaya maraq yetərincə idi. Matçdan reportaj hazırlayan jurnalistlər isə bir sıra çətinliklərlə üzləşdilər. Belə ki, stadiona daxil olan media nümayəndələrinin qarşısını polis kəsərək, onların arenaya girməsinə icazə vermirdi. Jurnalistlər polis əməkdaşlarına matç üçün nəzərdə tutulmuş akkreditasiya vəsiqəsini göstərsə də, bu, heç nəyi dəyişmirdi. Asayiş keşikçiləri bunun səbəbini jurnalistlərin arenaya daxil olmasına hələ icazə verilməməsi ilə əlaqələndirirdilər.
Bundan başqa jurnalistlər üçün ayrılmış media sektorda "wi-fi" demək olar ki, yox dərəcəsindəydi. Bunun nəticəsində də matç zamanı operativ şəkildə işləmək problemə çevrilmişdi. Bunun səbəbini araşadırmaq üçün mərkəzi arenanın direktoru Akif İsmayılovla əlaqə saxlasaq da, o, bu barədə məlumatsız olduğunu deyərək, stadionun texniki işlər üzrə şöbə müdiri Ramiz Zeynalovla əlaqə saxlamağımızı xahiş etdi. Zeynalov isə bundan xəbərsiz olduğunu, bizdən başqa heç kimin şikayət etmədiyini bildirdi. O, eyni zamanda stadionu internetlə təmin edən "Bakinternet" provayder şirkətini günahlandırdı.
Diqqəti çəkən məqamlardan biri də azarkeşlərlə bağlı idi. Belə ki, matçın başlama saatı iftar vaxtına təsadüf edirdi. Asayiş keşikçiləri isə təhlükəsizlik baxımından stadiona su butulkası ilə daxil olmağı qadağan etmişidi. Düzdü, buna görə klub oruc tutan azarkeşləri nəzərə almışdı. Ancaq bu elə də yüksək səviyyədə təşkil olunmamışdı. Belə ki, sektorların girişində stolun üzərinə iftar açmaq üçün yalnız plastik qablarda su qoyulsa da, stəkanlar yaddan çıxmışdı. Bu da sanitar qaydalara uyğun olmadığı üçün, tribunalara toplaşan azarkeşlərin əksəriyyəti bundan imtina etdi.
"Qarabağ"da bu cür yarışlarda təşkilatı məsələlər zəifdi. Bu baxımdan "atlılar" Bakının "Neftçi" komandasından nümunə götürsələr, yaxşı olar. "Neftçi" "Koper"lə matçda "Bakcell Arena"ya toplaşan azarkeşləri nəzərə alaraq, onların orucunu açması üçün su, xurma və s. ilə təmin etmişdi. Düzdü, bu, klubun borcu deyil. Ən azından nəzakət baxımından bu cür addım atmaq, azarkeşin özünə də xoş təsir bağışlayar. Amma "Qarabağ"ı bu cür çatışmazlıqlara görə qınamaq da düzgün deyil. Təzədilər, öyrənərlər.
EMİN SƏFƏROV
- Ölkə futbolu2024-05-13 08:32
“Qarabağ” – postsovet məkanının ən yaxşı komandası
- Ölkə futbolu2024-05-13 10:15
İK gündəmi: Premyer Liqada say dəyişməyəcək?!
- Ölkə futbolu2024-05-13 19:32
Rövşən Nəcəf: “Premyer Liqada iştirak edəcək klubların sayında artım olmayacaq”
- Milli komanda2024-05-12 15:31
Millimiz iki yoldaşlıq görüşü keçirəcək