Müsahibə
Ruslan Abışov: "Qəbələ"yə məcburiyyətdən gəldim"
Futbol üzrə Azərbaycan milli komandasının və "Qəbələ…
Futbol üzrə Azərbaycan milli komandasının və "Qəbələ"nin müdafiəçisi Ruslan Abışovun futbolinfo.az saytına müsahibəsi
– Əvvəl Sloveniyada, sonra isə Hollandiyada təlim-məşq toplanışı keçdiz. Bu hazırlıq dönəmindən necə yararlandız?
– Məşqçi gec gəldiyi üçün Avropa Liqası öncəsi hazırlığa gec başladıq. Ancaq Hollandiyadakı təlim-məşq toplanışı komandaya yaxşı təsir etdi. "Şiroki Briyeq"lə oyundan sonra psixoloji vəzyyətimiz bir o qədər də yaxşı deyildi. Hollandiyada həm fiziki, həm də psixoloji vəziyyətimizi yaxşılaşdırdıq. İndi "İnter"lə oyuna hazırlaşırıq. İnşallah, ilk turda komanda çəkdiyi əziyyətin bəhrəsini görəcək.
– Hər iki oyunda "Şiroki Briyeq"ə məğlub olmaq sırf komandanın gec toplaşmasına görə oldu, yoxsa başqa səbəbləri var idi?
– Mövsümün sonunda komandanı çoxlu futbolçu tərk etmişdi. Bundan başqa məşqçi dəyişikliyi də olmuşdu. Hazırlığa da gec başladıq. Ancaq bunların heç biri bəhanə olmalı deyil. İki həftə ərzində komanda maksimum səviyyədə hazır ola bilməz. Avroliqa oyunlarına rəqiblər hazırlıqlı gəlir. Mənə elə gəlir ki, uğursuzluğun səbəbi də hazırlıqsız olmağımız idi.
– Sloveniya və Hollandiyadakı hazırlıqlar arasında nə kimi fərqlər oldu?
– Sloveniyada "Maribor"u çıxmaq şərti ilə elə də güclü komanda ilə qarşılaşmadıq. "Neftçi"nin rəqibi "Koper" olanda, bilirdik ki, təmsilçimiz bu komandanı keçəcək. Hollandiyada isə daha səviyyəli komandalarla qarşılaşdıq. Fikirimcə, ikinci ölkə bizim üçün daha xeyirli oldu.
– Bir müddət oynamadığın üçün formanda uzaq qalmışdız. Bu problemi aradan qaldıra bilmisiz?
– Artıq hər şey keçmişdə qalıb. İndi bunlardan danışmaq istəmirəm. Bəzi səbəblərdən 6 ay oynamadım. Çətin vaxtlar keçirdim. Vaxt keçdikcə daha yaxşı formada olacam.
– Komandanın heyətinə yeni futbolçular cəlb olunub. Bu heyət uğur qazanmaq üçün kifayətdi?
– Heyətə cəlb olunanların hamısı yaxşı futbolçulardı. Komandada çıxış edən gənc futbolçular da akademiyanın yetirmələridi. Onlar da istedadlı uşaqlardı. Mənə elə gəlir ki, təcrübəli futbolçuların vəhdəti ilə yaxşı nəticə verməlidi.
– "Qəbələ" ilə 6 aylıq müqavilə imzalamısız. Ola bilərmi ki, icarə müddəti başa çatdıqdan sonra müqaviləni artırarsız?
– Bu, məndən asılı deyil. Müqavilə ilə "Rubin"ə məxsusam. Yanvar ayında kluba qaytmalıyam. Bundan sonra vəziyyətin necə olacağına qərar verəcəyik.
– Öz istəyiniz necədi?
– Mən hər zaman ölkədən kənarda çıxış etmək istədiyimi bildirmişəm. "Qəbələ"yə məcburiyyətdən, oynamaq üçün gəldim. "Qəbələ" rəhbərliyi sağ olsun ki, mənə hər cür şəraiti yaratdı. Mən də onlarım ümidlərini doğrultmağa çalışacam.
– Deyilənə görə sizin xidmətinizdən digər klublarımız da maraqlı olub. Ancaq siz keçid üçün çox pul tələb etmisiz…
– Mən bu barədə heç bir şey danışmaq istəmirəm. Madiyyata görə Azərbaycana geri qayıtmamışam. 6 ay çətin vaxt keçirdiyim üçün vətənə qayıtdım ki, oynayım.
– Çox böyük ehtimalla "Qəbələ"də olduğunuz müddət ərzində oyunlarda 90 dəqiqə meydanda olacaqsız. Necə düşünürsüz, bu, yanvarda "Rubin"in heyətinə düşməyə kömək edəcək?
– "Rubin"də belə bir problem yox idi. Sadəcə, bəzi səbəblərə görə mənə haqsızlıqlar olurdu. Bu arədə çox danışmaq istəmirəm. Hər şeyi zaman göstərəcək.
– Baş məşqçi haqsızlıq edirdi?
– Bunu mən bilirəm. Vaxtı gələndə hər şeyi açıqlayacam.
– "Qarabağ"la "Neftçi" avrokuboklarda çıxışını davam etdirir. Klublarımızın cavab qarşılaşmasında şanslarını necə dəyərələndirisiz?
– "Qarabağ"ın "Zalsburq"la oyununa baxdıq. Hiss olunur ki, Avstriya klubu çox güclü komandadı. Ağdam klubu isə əzmkar qələbə qazandı. Bütün azarkeşləri sevindirdi. "Neftçi"dən isə hər kəs qələbə gözləyirdi. Oyuna baxanda hiss olunurdu ki, "Çixura" müdafiə futbolu sərgiləyir. Hər iki komandamızn səfərdə şansları çətin görünür. Ancaq mümkünsüz heç nə yoxdu. Sona qədər mübarizə aparmaq lazımdı.
EMİN SƏFƏROV