Müsahibə
Vobay: "Partizan" güclüdü, amma biz də asan rəqib deyilik"
“Neftçi” klubunun yarımmüdafiəçisi Ju…
“Neftçi” klubunun yarımmüdafiəçisi Julios Vobayın futbolinfo.az saytına müsahibəsi
– Avropa Liqasının pley-off mərhələsində Serbiya “Partizan”ı ilə qarşılaşacaqsız. Siz həmin rəqibi əvvəl məğlub edə bilməmisiz. Hər iki oyunda bərabərə qalmısız. Bu dəfə necə oyun gözləyirsiz?
– Əvvəla onu deyim ki, güclü rəqibə qarşı oynayacağıq. Avropa Liqasının qrup mərhələsində onlara qarşı oynamışıq. Hesab edirəm ki, bu da bizim üçün yaxşı təcrübədi. Rəqibi müəyyən qədər tanıyırıq. Amma çətin oyun olacaq. Çalışacağıq ki, əlimizdən gələnin ən yaxşısını edib, sevinən tərəf biz olaq. Bu mərhələni də keçib, qruplara vəsiqə qazanmalıyıq.
– Siz qrup mərhələsində həmin rəqibi məğlub edə bilmədiz. Demək olarmı ki, bu “Neftçi” əvvəlkindən güclüdü və bu dəfə qalib gəlcək?
– Həmin oyunlar keçmişdə qaldı. Artıq o barədə danışmağın əhəmiyyəti yoxdu. Hazırda güclü komandamız var. “Neftçi” həmişə “Neftçi”di. Əsas odu ki, keçmişi unudub, bu matçlara yaxşı köklənək və uğurlu nəticə qazanaq.
– “Partizan” sizə uyğun rəqibdi, yoxsa çox güclüdü?
– “Partizan”ın avrokuboklarda kifayət qədər təcrübəsi var. Avroliqada qruplara vəsiqə qazanıblar, Çempionlar Liqasında oynayıblar. Demirəm ki, asan rəqibdi. “Partizan” çətin rəqibdi. Biz də asan rəqib deyilik. Çalışacağıq ki, mərhələ adlayaq.
– Gürcüstan təmsilçisi “Çixura” ilə cavab matçında qələbə qazanıb, pley-off mərhələsinə vəsiqə qazandız. Necə oldu ki, evdə qol vura bilmədiyiniz rəqibi səfərdə məğlub etdiz?
– Birinci dəfə deyil ki, biz bunu edirik. “Koper”lə matçda evdə məğlub olduq. Amma səfərdə qələbə qazandıq. Hesab edirəm ki, bu oyuna köklənmə ilə bağlıdı.
– “Neftçi” Premyer Liqanın yeni iştirakçısı “Araz Naxçıvan”a məğlub oldu. Bu uğursuz start nə ilə bağlıdı? Həmin matçda sən və komandanın bəzi aparıcı futbolçuları oynamadı. Bu amilin “Neftçi”yə çox təsiri oldu?
– Xeyr. Mən belə düşünmürəm. “Neftçi” yalnız məndən ibarət deyil ki. Biz komanda şəklində mübarizə aparırıq. Məğlubiyyətin səbəbinin bu olduğuna inanmıram. Premyer Liqanın 1-ci tur matçı idi. Qarşıda hələ çox oyunlarımız var. Turun startında belə şeylər ola bilir.
– Avropa Liqası matçlarının bu matça təsiri ola bilər? Mümkündü ki, komanda hələ çempionata köklənə bilmir?
– Avropa Liqasında çox ağır oyunlar keçirdik. Komandada yorğunluq da var.
ELMAR VƏLİYEV