Premyer-liqa
“Böyük oyun”la bağlı böyük nüanslar
Bu həftə boyunca, yəqin ki, gələn həftə də bütün fut…
Bu həftə boyunca, yəqin ki, gələn həftə də bütün futbol ictimaiyyətinin müzakirə mövzusu eyni olacaq. Yox, milli komandamızın bolqarla oyunu da bu qədər aktual olmayacaq. Söhbət adi çempionat matçı çərçivəsindən çoxdan çıxmış “Neftçi” – “Xəzər Lənkəran” görüşündən gedir.
***
Artıq bu qarşılaşma ilə bağlı ilk müzakirə kötüyü baltalanmaq üçün ortaya dığırladılıb. “Böyük oyun”un efirə çıxmayacağı haqda xəbərə münasibət birmənalıdı və hamı AzTV-ni qınayır. Tənqidçilərə haqq verirəm: belə mərkəzi oyun mütləq efirdə olmalıydı. Ancaq o da var ki, ötən mövsüm Lənkərandakı oyunların yayımına yerli klub əngəl törətdiyindən bu dəfə də bakılıların eyni addımı atmasında qəribə heç nə yoxdu. Əvəz-əvəz oyununda ruletka indi “Neftçi”nin əlindədi və onlar istəsə, matçın yayımına əngəl törədə bilər. Baxmayaraq ki, bildiyim qədəri ilə onların bu işdə günahı yoxdu, matçın yayımlanmamasının səbəbi başqadı.
***
Bu yazını kompyuterin yaddaşına köçürdüyüm zaman AFFA-da “Neftçi” – “Xəzər Lənkəran” matçlarına qonaq azarkeşlərin buraxılmaması barədə müzakirələr başlamışdı. Və ötən mövsümdən tətbiq olunan bu qaydanın ən azı 2014/15 mövsümündə də qüvvədə saxlanılacağına şübhəm yox idi. AFFA İntizam Komitəsi ötən mövsüm Lənkəranda baş tutan ilk oyundakı hadisələrin təkrarlanmaması üçün hələ bir müddət də 2 rəqib komandanın azarkeşlərinin birgə matç izləməsini izləmir. Bunun da səbəbi var.
***
Oyunun İsmət Qayıbov adına Bakıxanov qəsəbə stadionunda keçirilməsi sıradan hadisə deyil. Burada azarkeşləri daha yaxşı nəzarətdə saxlamaq, tribunaları dolduranların həqiqətən meydan sahiblərini təmsil edib-etməməsini rahat müəyyənləşdirmək olur. “Neftçi” tərəfi hər nə qədər iddia etsə ki, “Bakcell Arena”nın durumu bərbad olduğu üçün buranı seçiblər, inanmaram. Bu gün yığma matçının baş tutduğu arenada 3 gün sonra çempionat matçı da təşkil etmək olar. Sadəcə, hazırkı şərtlər matçın məhz qəsəbə stadionunda keçirilməsinin vacibliyini diqtə edir. Bunun da səbəbi var.
***
Həm matçın yayımlanmamasının, həm qonaq azarkeşlərin oyuna buraxılmamasının, həm də qarşılaşmanın aztutumlu qəsəbə stadionuna salınmasının səbəbləri, əslində, bir məqamda birləşir ki, o da özünü ötən ilin yayındakı oyunda büruzə vermişdi. Daha öncə Bakıdakı oyunda “Neftçi” rəsmisi Güloğlan Cabbarovun “qəhrəmanlığının” revanşı kimi dəyərləndirilən hadisələrdən başqa məqsədlər üçün istifadə edən qüvvələr var idi. Olayların Lənkəran şəhər stadionunun kənarında baş verməsi də hadisələrdə yerli klubun günahının olmamasının göstəricisi idi. Olaylara görə həbs edilənlərin bəzilərinin başqa bölgələrdən olması da məsələnin futbol oyunu çərçivəsini aşdığına işarə idi. Müxtəlif təxribatyönlü hərəkətlər, nifaqsalmalar, vəziyyətdən başqa məqsəd üçün istifadə etmələr səbəbindən indi yuxarıda sadaladığımız addımlar atılır. Və bütün bunlar AFFA-nı səlahiyyət çərçivəsini aşır, daha yüksək səviyyədə tədbirlər görülür.
***
Əslində, indi bəlli olur ki, “Kəpəz”, “Qarabağ” kimi köklü, daha titullu komandalar qala-qala “Neftçi”yə əzəli rəqib kimi məhz XL-in seçilməsi, “Böyük oyun” təbliğatının qurulması məqsədli imiş. Kimlərsə çirkin maraqlarını təmin etmək üçün böyük kütlənin toplaşdığı futbol matçlarından istifadə etmək niyyətindədi. Bunu sosial şəbəkələrdə bir çox səhifələrdəki statuslardan, şərhlərdən də görə bilərik. Nə yaxşı ki, bunu bizdən də yaxşı görənlər var və onlar təxribatların qarşısını almaq üçün iş görürlər. Futbolu bir çox maraqlara alət etməmək üçün bəzən qadağalar da qaçılmaz olur. Bu, sıravi, həqiqi azarkeşləri incitsə də…
FƏRİD