Ölkə futbolu
"Araz Naxçıvan"ın savab işi
Ötən günlərdə əvvəl qeyri-rəsmi, daha sonra isə rəsm…
Ötən günlərdə əvvəl qeyri-rəsmi, daha sonra isə rəsmi bəyanatla gündəmə gələn "Araz Naxçıvan" başa düşüb ki, elitada uğur qazanmaq üçün heyəti gücləndirmək lazımdı. Bu yöndə klub rəhbərliyinə ölkə futbolunun başbilənləri öz tövsiyyələrini verib.
Yadınızdadısa, Premyer Liqanın 4-cu turunda "Sumqayıt"a məğlub olan naxçıvanlılar PFL-ə hücum çəkmiş, öz etirazlarını bildirmişdi. Klub rəhbərliyi PFL prezidenti Ramin Musayev və Hakimlər Komitəsinin sədri Xaqani Məmmədovla görüşüb, "kimyaçılar"la oyunda fit çalan Ömər Paşayevin verdiyi qərarlardan narazı olduqlarını bildirmişdi. Naxçıvanlılar Musayevlə Məmmədovu inandırmağa çalışırdı ki, onları məhz Paşayev uduzdurub. Amma…
Amma "Araz Naxçıvan" rəhbərliyinin bu addımı uğursuz alındı. Onların PFL-ə çəkdiləri hücum məharətlə dəf edildi. Ölkə futbolunu idarə edən şəxslər klub prezidenti Orxan Cabbarova məğlub olanda günahı hakimlərdə, yaxud da neqativ hallarda yox, öz komandasında axtarmağı məsləhət görüblər. Deyiblər ki, "qardaş, uduzmaq istəmirsənsə, get, heyətini gücləndir".
"Məsləhətli don gen olar" deyiminə əməl etməyə çalışan naxçıvanlılar artıq heyətini "gücləndirib". Düzdü, klubun maliyyə imkanının yüksək olmaması onların istədikləri futbolçuları heyətə cəlb etməsinə mane olub. Bundan başqa "transfer pəncərəsi"nin də bağlanması debütantın işini çətinə salıb. Buna baxmayaraq, "Araz Naxçıvan" heyətini "gücləndirmək" üçün futbolçu tapa bilib. Belə ki, uzun müddətdi klubsuz qalan Aqil Nəbiyevin ardınca eyni aqibətlə üzləşmiş Saşa Yunusoğlu ilə Kamil Nurəhmədov da bundan sonra karyerasını debütant komandada davam etdirəcək.
Heyətə cəlb olunan futbolçuların yeni iş yerlərində uğurlu çıxış edəcəkləri inandırıcı görünmür. Onların uzun müddətdi komandasız qalması və oyun praktikasından əziyyət çəkməsi bu işdə onlara çox böyük problem yaradacaq. Təsəvvür edin ki, Nurəhmədov axırıncı dəfə yay fasiləsində meydana çıxıb. Hansı ki, həmin oyunda AZAL tələbələrdən ibarət yığma komanda ilə qarşılaşırdı. Çarəsiz qalan Nurəhmədov tələbələrə kömək etməyə çalışırdı. Vaxtilə "Rəvan"da belə heyətə düşə bilməyən futbolçunun elita təmsilçisinə nə dərəcədə xeyir verəcəyi indidən maraqla gözlənilir. Eyni sözlər Saşa və Aqilə də aiddi.
Əslində klub rəhbərliyi heyətin gücləndirilməsinin ən başlıca şərt olduğunu əvvəlcədən qəbul etməli idi. Orxan Cabbarov birinci divizionda olduğu kimi hay-harayla qazanılan qələbələrin, elitada davam etməyəcəyini bilməli, ən azından Premyer Liqanın 1-ci diviziondan daha səviyyəli yarış olduğunu düşünməli idi. Biz demirik ki, "Araz Naxçıvan" debüt ilindəcə çempionluq uğrunda mübarizə aparsın, yaxud da avrokuboklara düşməyə can atsın. Ən azından klub tədricən peşəkarlaşsın və ildən-ilə ölkə futboluna xeyir versin. Yox, əgər klubsuz qalan futbolçulara da qucaq açmağı savab iş kimi qəbul edirlərsə, komandanın bundan sonra uğur qazanacağına heç kim zəmanət verə bilməz.
Komandanın bir də qışda heyətini gücləndirməyə imkanı olacaq. Yəqin ki, onda da Əsgər Abdullayev qapıda olan problemlərə görə futbolçu karyerasını başa vurmuş Dmitri Kramarenkonu öz komandasına görmək istəyər. Müdafiəni də Samir Abbasovla gücləndirməyə can atar. Yarımmüdafiə xəttinə isə Ceyhun Sultanovu tapşırmaq, ən ağlabatan variantdı. Hücumu da 4 il bundan əvvəl karyerasını bitirmiş Zaur Ramazanovla gücləndirmək olar. Təbii ki, onlar Naxçıvana getmək istəsə…
EMİN SƏFƏROV
- Ölkə futbolu2024-05-13 08:32
“Qarabağ” – postsovet məkanının ən yaxşı komandası
- Ölkə futbolu2024-05-13 10:15
İK gündəmi: Premyer Liqada say dəyişməyəcək?!
- Ölkə futbolu2024-05-13 19:32
Rövşən Nəcəf: “Premyer Liqada iştirak edəcək klubların sayında artım olmayacaq”
- Ölkə futbolu2024-05-14 08:00
İcraiyyə Komitəsinin gözlənilən qərarları