Ölkə futbolu
Həmin AZAL, həmin strategiya
4-5 oyundan bir qələbə, ən axırıncı olmadan turnir cədvəlinin…
4-5 oyundan bir qələbə, ən axırıncı olmadan turnir cədvəlinin son pillələrində fırlanmaq, baş qatmaq… Əvəzində sponsorun milyonlarını havaya sovurmaq, kimlərinsə cibini doldurmasına xidmət etmək və çempionatı yola vermək…
AZAL haqqın yolunu tapıb. Çempionluğun xəyal, avrokuboklara vəsiqə qazanmağın arzu olduğunu bilən klub Premyer Liqada da iştirak xatirinə iştirak edir. Hədəf yox, məqsəd yox. Və maraqlıdı ki, bu komandadan başqa hamının nəsə istəyi var. Daha öndə qərarlaşan 6 komanda birbaşa avrokuboklara vəsiqə üçün döyüşürsə, sonrakı yerlərdə qərarlaşan “Sumqayıt”la “Bakı”nın da müəyyən “məşğuliyyət”i var. “Gənclik şəhəri” təmsilçisi milli komandalara gənc futbolçuların hazırlanmasının öhdəsindən az-çox gəlirsə, yaşamaq uğrunda mübarizə aparan “zolaqlılar” da AZAL-dan daha xeyirli işlə məşğuldu. “Bakı” son 2 ildə gənc futbolçuların yetişdirilməsi baxımından həqiqətən diqqqətçəkən iş görüb. Daha doğrusu, çoxdan görülən iş son 2 mövsümdə nəticəsini verir.
Bəs, AZAL nəyə xidmət edir? Akademiyasında yetişən bir futbolçu belə milli komandaya çağırılmayan “təyyarəçilər” neçə illərdi baş qatır, kiminsə boğazından kəsilən pulları ona-buna yedizdirir. İndi komandada kimi dindirsən iddialı olmalarından, avrokuboklara vəsiqə uğrunda döyüşəcəklərindən bəhs edəcək. Necə? Bax, bu sualın cavabını özləri də bilmir.
AZAL üçün mövsüm “Araz Naxçıvan” çempionatı tərk edən gün bitib. Artıq Premyer Liqada qalacaqları dəqiqləşən komandanın rəhbərliyi baş girləməklə, artıq xərclərdən qaçmaqla məşğuldu. Düzdü, komandanın hamiləri yenə normal pul xərcləyir. Ancaq Cahangir Əsgərovun ayırdığı yatırım gəlib, komandaya çatmır, bir qismi president Zaur Axundovun, müəyyən faizi də vitse-prezident Fikrət Hüseynovun seyfində ilişib qalır.
Qış fasiləsində 10-a yaxın futbolçu AZAL-ı tərk edəcək. Onların əksəriyyəti maaşını ala bilmədiyi üçün çıxıb gedir. Köhnə plandı – guya ki, oyunları məşqçilər korpusunu qane etmədiyi üçün yola salınırlar. Əslində isə bu futbolçular bilərəkdən küsdürülür, maaşları isə kimlərinsə cibinə qalır, əvəzində qışda baxışa yeni dəstə gələcək, onlar arasından seçim aparılacaq və 3-4-cü dövrələr üçün ortabab heyət qurulacaq. Yayda yenə eyni hadisələr baş verəcək.
AZAL-da hansısa strateji planın olmamasını verdikləri son qərar da təsdiqləyir. Belə ki, komanda xaricə təlm-məşq toplanışına getməyi lazım bilməyib. Avropada hətta həvəskarlardan ibarət komandaların vacib bildiyi hazırlığı AZAL Şüvəlanda keçəcək. Elə bu fakt komandanın nə qədər “iddialı” olmasının göstəricisidi.
Fevralda mövsümün ikinci yarısı başlayacaq. AZAL ilk yarıda olduğu kimi yenə yıxıla-dura irəliləyə-irəliləyə 10-15 xal qazanacaq, son pillələrdə qərarlaşacaq. Yayda klubun hamiləri niyə belə olduğunu soruşanda Fikrət Hüseynov Zaur Axundovu digər klublardakı maddi durumla müqayisədə zəif olduqlarına inandıracaq, sponsorlardan daha böyük büdcə istəməyə vadar edəcək. Cahangir Əsgərov yatırımı artırmasa, maxinasiyalar eyni qaydada davam edəcək, artırsa, 1-2 normal transferlə nisbətən güclü komanda yaradılacaq, nəticələr yaxşılaşmayınca klubun digər rəsmisi Vaqif Qasımov ənənəsinə uyğun olaraq, hakimlərdən, havadan, sudan şikayətlənəcək, “yuxarılar”ın diqqətini çəkəcək “bəhanə çətiri” hazırlayacaq. Ola bilsin, baş məşqçi, ola bilsin, 1-2 futbolçu qurban veriləcək. Nəticə isə dəyişməyəcək, pul üyüdən dəyirmana zərrə qədər xətər dəyməyəcək.
Bu, gələcəyin işidi. Hələliksə, reallıq odur ki, AZAL toplanışa getmir, bir neçə futbolçu alacağı pullardan əlini üzüb, komandaya ayrılan pullarla isə məmurlar əla Yeni İl tətilinə hazırlaşır.
AĞA