Ölkə futbolu
"Bakı" və "Sumqayıt" jurnalistlərə hörmətsizlik edir
Topaz Premyer Liqasında elan olunan qış fasiləsi elitada ç?…
Topaz Premyer Liqasında elan olunan qış fasiləsi elitada çıxış edən klublarımızın təlim-məşq toplanışı ilə davam edəcək. Artıq klub rəsmiləri bu hazırlığı necə və hansı səviyyədə keçirmək üzərində baş sındırır. Yanvarın 31-dən start götürməli olan 3-cu dövrəyə qədər klublar hazırlıqlarını yekunlaşdırmalı və hərə öz iddiası üzrə çıxışını davam etdirməlidi.
Sözsüz ki, ikinci dövrəyə qədər komandalarla yanaşı, onların oyunlarını işıqlandıran media nümayəndələri də yoruldu. Amma bu yorğunluq futbolçular kimi meydanda 90 dəqiqə qaçmaqdan irəli gəlmədi. Sadəcə, matçların baş tutduğu əksər stadionlarda olan şəraitsizlik media nümayəndələrinin işini layiqincə görməsinə mane oldu.
Biləcəridə və Sumqayıtda eyni dərd
Ötən il ərzində jurnalistləri “Visente Kalderon”a aparmaq niyyətində olan Hafiz Məmmədovun himayədarı olduğu “Bakı”nın Biləcəridəki bazasında şəraitsizlikdən adamın canı boğaza yığılır. Təəssüf ki, media nümayəndələrinin sözügedən stadionda qarşılaşmanı işıqlandırmaq üçün imkanları həddindən artıq məhduddu. Bu arenaya yollanan media nümayəndəsi qarşılaşmanı izləmək üçün azarkeşlər və qonaq komandanın üzvlərinin yerləşdiyi sektora üz tutmalıdı. Bəzən də elə olur ki, qonaq komandanın üzvləri ilə media nümayəndələri yer üstündə yüngül “atışır”. Stadionun ”Wi-Fi” problemi bir yana, heç əvəzləmələri, qeydə alınan vərəqələri, vurulan qolları görmək, heyətləri açıqlayan diktorun səsini eşitmək qeyri-mümkündü. Düzdü, bunun klubun hazırkı maddi imkansızlığı ilə bağlı olduğunu qeyd etmək olar. Amma iş burasındadı ki, paytaxt klubunun bərkgedən vaxtlarında da eyni problemlər hökm sürürdü. Zatən mövcud problemləri aradan qaldırmaq üçün elə də böyük vəsait tələb olunmur ki…
Eyni stiuasiya “Sumqayıt”ın ev oyunlarını keçirdiyi “Kapital Bank Arena”da da höküm sürür. Düzdü, burada diktor baxımından heç bir problem yoxdu. Klubun mətbuat xidmətinin rəhbəri bu işin öhdəsindən gəlir. Amma media nümayəndələrinin işini rahat şəkildə yerinə yetirməsi üçün bu stadionda da imkanlar məhduddu. İş burasındadı ki, “Bakı”nın stadionunda olduğu kimi, bu arenada da jurnalistlər qonaqlar üçün çəhrayı rəngli örtüklərlə bəzədilmiş sektorda əyləşməlidi. Burada qonaq və ev sahibinin klub rəsmiləri ilə yanaşı, matçın gedişində fanatlar da əyləşə bilir. Qış fasiləsində bu iki stadionunda ən azından media nümayəndələri üçün xüsusi bir yer hazırlanacağına inanmaq istərdik…
“Neftçi” və “Xəzər Lənkəran”a əhsən!
Qabartdığımız məsələdə “Neftçi” və “Xəzər Lənkəran”a əhsən düşür. Bu iki komandanın ev oyunlarını keçirdiyi stadionlarında media nümayəndələrinin işlərinin rahatlıqla yerinə yetirməsi üçün həqiqətən də əla imkan yaradılıb. Maraqlıdı ki, tələb kimi olunmadığı halda sözügedən iki komandanın media rəhbərləri “mix zona” da təşkil edib. Bu da qarşılaşmadan sonra futbolçulardan müsahibə və açıqlama almaq üçün jurnalistin işini asanlaşdıran amillərdəndi. Cənubluların Lənkəran şəhər stadionunda və bakılıların ev oyunlarını keçirdiyi “Bakcell Arena”da minimal problem yoxdu. Sadəcə, flaqmanın bəzən üz tutduğu İsmət Qayıbov adına Bakıxanov qəsəbə stadionunda internet problemi var ki, bunlar, “Qarabağ”, “Simurq”, AZAL, “Bakı” və “Sumqayıt”ın ev oyunlarını keçirdiyi stadiona da aiddi.
“Qəbələ” də paytaxt və cənub klubundan geri qalmır. Ən son avadanlıqların qurşadırıldığı Qəbələ şəhər stadionuna yollanan jurnalistin işini asanlıqla görməsi üçün hər bir imkan var. “Simurq”da ciddi problemin olmadığını qeyd etsək, yanılmarıq.
“Qarabağ”ın ev oyunlarını keçirdiyi Tofiq Bəhramov adına Respublika stadionunda vəziyyət normaldı. AZAL-ın Şüvəlandakı stadionundakı durum da “Qarabağ”dakı kimidi. “İnter”in də eyniadlı stadionunda media nümayəndələri üçün normal şərait yaradılıb, amma bəzən yersiz qonaqların çoxluğu jurnalistlərin ayaq üstə qalması ilə nəticələnir.
Sadaladığımız problemələrə rəğmən, işinə məsuliyyətlə yanaşan media nümayəndələri yenə öz vəzifəsini icra etmək üçün stadionlara üz tutacaq. Ancaq könül o zaman xoş olardı ki, arenalarda daha rahat şərait yaradılsın.
EMİN SƏFƏROV