“Rəvan”ın futbolçusu Çəmşid Məhərrəmov Futbolinfo.az saytına müsahibə verib. O, komandasının çıxışından, eləcə də sabiq klubu “Bakı”ya qarşı keçiriləcək növbəti oyundan danışıb.
– “Rəvan”ın çempionatda çıxışını necə dəyərləndirirsiz?
– Komandamız normal oyun sərgiləyir. Çempionatın ağır keçdiyi hər birimizə məlumdu. Biz də rəqiblərimizlə başa-baş döyüşməyə çalışırıq. Oyunlarda nəticə qazana bilməsək də, hazırda komandanın vəziyyəti yaxşıdı.
– Şahin Diniyevin gəlişindən sonra komandada hansı dəyişiklər oldu?
– Komandada ab-hava dəyişdi. Şahin müəllim öz fəlsəfəsini oyunçulara çox yaxşı şəkildə başa salmağa çalışır. Biz də onun öyrətdiklərini meydanda etməyə çalışırıq.
– Yeni baş məşqçidən tam razısız?
– Şahin müəllim yaxşı məşqçilikdən əlavə yaxşı insan və yaxşı psixoloqdu. Bu 3 yaxşı cəhət onda komplektləşib. Futbolçudan nə istədiyini bilən və öz fəlsəfəsini futbolçunun oyununda əks etdirə biləcək məşqçidi. Onun gəlişindən sonra komandada vəziyyət daha da yaxşılaşdı.
– Artıq məşqçi dəyişməsi “Rəvan”da dəb halına gəlib. Bir neçə məğlubiyyətdən sonra bu məşqçi göndərilir, digəri gəlir. Sizcə Diniyevi də eyni aqibət gözləyir?
– Bunlar rəhbərliyin biləcəyi işdi, biz nəsə deyə bilmərik. Ancaq düşünmürəm ki, Şahin Diniyev kimi məşqçini yollasınlar.
– Siz öz çıxışlarınızı necə qiymətləndirirsiz?
– Bildiyiniz kimi, bir müddət futboldan uzaq qaldım. Bunun nəticəsi olaraq da, “Rəvan”a gələndə çətinlik çəkirdim. Ancaq şükürlər olsun ki, indi hər şey qaydasındadı, mən də çalışıram özümü yaxşı tərəfdən göstərim.
– “Bakı” ilə müqavilənin mövsümün sonunadək qüvvədə olmasına baxmayaraq, kapitanı olduğunuz komandada sizi əvəzedici heyətə göndərdilər. Oradan da “Kəpəz”ə getdiz. Bir ara, hətta Türkiyəyə gedəcəyiniz haqda söhbət gəzirdi , amma alınmadı…
– Bunlar hamısı təbii haldı. Futbolçunun həyatında hər şey baş verə bilər. Belə alındı. Nə deyə bilərəm ki?! İnşallah yaxşı olar. Keçmiş komandamla növbəti oyuna da adi qaydada hazırlaşıram.
RÖYA KƏRİMLİ