"Qəbələ" haqda ilkin təəssüratlarım müsbətdi. Komandaya qoşulduğum gündən heç bir problemlə üzləşməmişəm. Ətrafımda baş verənləri diqqətlə izləyirəm və hər şeydən çox razıyam. Artıq bir neçə məşqdə iştirak etmişəm. Kollektivi görəndən sonra əmin oldum ki, buraya gəlməklə düzgün seçim etmişəm".
 
Bu sözləri "Qəbələ"nin yeni futbolçusu Marat İzmaylov komandası haqda ilkin təəssüratlarını bölüşərkən deyib. Klub saytına açıqlama verən rusiyalı futbolçu "Qəbələ"ni seçməsində rol oynayan amillərdən və hədəflərindən danışıb:
 
"Qəbələ" haqqında öncədən məlumatım var idi. Yuri Syominin "Qəbələ"nin baş məşqçisi təyin olunduğu vaxtdan komandanın nəticələrini diqqətdə saxlayırdım. "Qırmızı-qaralar"ın mövsümün ilk yarısını uğurlu keçirdiyini demək olar. Komandanın bazası, futbol oynamaq üçün gözəl şəraiti olduğunu bilirəm. Məhz bu amillər "Qəbələ"ni seçməyimə səbəb oldu. Hədəfim yeni komandama çempion olmaqda və ölkə kubokunu qazanmaqda yardımçı olmaqdı".
Shares: