“Bayern”in hücumçusu Harri Keyn UEFA Çempionlar Liqasında bir rekordu qırıb, digərini təkrarlayıb. 31 yaşlı hücumçu buna evdə Xorvatiyanın “Dinamo” (Zaqreb) komandasına 9:2 hesabı ilə qalib gəldikləri Liqa mərhələsinin I turunun oyununda nail olub.
Sözügedən qarşılaşmada poker edən təcrübəli forvard Alan Smitin 1991-ci ildəki nailiyyətini təkrarlayıb. Həmin vaxtdan sonra hansısa ingiltərəli oyunçu avrokubokların əsas raundunda bir matçda 4 qol vurmamışdı.
Keyn həm də “Mançester Yunayted”in sabiq futbolçusu Ueyn Runinin rekordunu qırıb. O, Çempionlar Liqası tarixində 33-cü qoluna imza ataraq ən çox qol vuran ingilis oyunçu olub. Runinin hesabında 30 qol var.
Qeyd edək ki, Keyn 2023-cü ilin yayında “Tottenhem”dən Münhen klubuna keçib. O, “Bayern”də meydana çıxdığı 50 oyunda 53 dəfə fərqlənməyi bacarıb.