– Almaniya mətbuatı baş məşqçi Miroslav Kloze ilə aranızın dəydiyini yazır. Xüsusilə də, “Bild” nəşrinin məlumatına görə aranızda saat yarımlıq mübahisə olub. Bu, nə qədər doğrudur?
– Əvvəla, onu qeyd edim ki, Almaniyada “Bild” qəzetinin yazdığına çoxları inanmır. Hətta orada belə bir deyim var: Əgər “Bild” yazıbsa, deməli, olmayıb”. Ona görə də bütün bunlar yalandan başqa bir şey deyil. Doğrudur, “Köln”lə oyunda əvəz edildiyimə görə əsəbi idim. Oynadığım komandalar daim çempionluq uğrunda mübarizə aparıb. Bu səbəbdən də, böyükhesablı məğlubiyyətlərlə çox rastlaşmamışam.
Bu sözləri Almaniyanın 2-ci Bundesliqasında çıxış edən “Nürnberq”in üzvü Mahir Emreli “İdman TV”-də qonaq olduğu “Sportcast” verilişində söyləyib. Bundan başqa , həmyerlimiz bir sıra vacib məqamlar haqqında məlumat verib. Verilişin tam versiyasına bazar ertəsi, yanvarın 6-da axşam saat 22:30-da “İdman TV”-də baxa bilərsiniz.
