Tanınmış MHL insayderi Elliott Fridman “Pittsburq Pinqvins” – “Vaşinqton Kepitals” oyununun futbol tarixinin ən böyük stadionlarından birində – “Old Trafford” və ya “Uembli”də açıq havada keçirilməsini təklif edib. Bir neçə gün əvvəl baş tutan “Çikaqo Blekhouks” – “Sent Lyuis Blyus” oyunu azarkeş sayına görə antirekordla gündəmə gəlmişdi.
“Bu mövsümün Qış klassikası mənim gördüyüm 20-cisidir. Onlardan nə qədər doysan da, oyunun keçiriləcəyi şəhərə gəldikdə həyəcan artır. Bu tədbirlə oyunun özündən başqa hər şey əla idi. Televiziya reytinqlərinin aşağı olması nəsə addım atmağın vacibliyindən xəbər verir.
“The Denver Post” qəzetindən Kori Makasiak Sidni Krosbi ilə Aleksandr Oveçkinin yeni duelini təklif etdi. Bu, fenomenal bir fikirdir. Ancaq mən MHL-in beynəlxalq arenaya çıxmasını istərdim. “Uembli” və “Old Trafford” tarixi koloriti olan futbol stadionlarıdır. Bu fikir reallaşsa, fantastik bir şey alınar”, – deyə Fridman qeyd edib.