“Səbail”in qapıçısı Əlirza Müştəbazadənin futbolinfo.az saytına müsahibəsi
– Mövsümün ikinci yarısına uğurlu start verdiniz. Səfərdə “Sumqayıt” üzərindəki qələbəni necə şərh edərdiniz?
– Fasilədə komandamız yaxşı hazırlıq prosesi keçdi. Uzun müddətdir qələbə qazanmırdıq. Bu uğursuz gedişata son qoymaq istəyirdik. Şükürlər olsun ki, buna nail olduq. Sumqayıt səfərində həm baxımlı oyun sərgiləmək, həm də qalib gəlmək elə də asan deyil. Amma yüksək əzmkarlıq və mübarizə göstərərək qələbə qazandıq. Bu 3 xal bizim üçün çox vacib idi.
– Bu görüşə əsas heyətdə çıxdınız. Halbuki bunadək “Səbail”in qapısında daim Hüseynəli Quliyevi görürdük. Baş məşqçinin sizə əsas heyətdə yer verməsini necə qarşıladınız və öz oyununuzdan razı qaldınızmı?
– Öz oyunum barədə şərh bildirməyim düzgün olmaz. Meydanda komandama faydalı olmaq üçün əlimdən gələni etdim və hər zaman etməyə hazıram. Bu şansı mənə verdikləri üçün məşqçilər heyətimizə təşəkkürümü bildirirəm. Onların etimadını daim doğrultmaq istəyirəm.
– Növbəti turda “Kəpəz”i qəbul edəcəksiniz. Bu görüş hər iki tərəf üçün çox vacibdir. “Kəpəz”ə də qalib gələ biləcəksiniz?
– Komanda olaraq məqsədimiz hər oyunda əlimizdən gələnin ən yaxşısını edib uğurlu nəticə qazanmaqdır. “Kəpəz”lə matça da qalib gəlmək üçün çıxacağıq. Qələbə qazanıb xal ehtiyatımızı artırmaq və sonuncu pillədən uzaqlaşmaq istəyirik. İnşallah, məqsədimizə çatarıq.
– Cavid Hüseynovun gəlişindən sonra komandanın oyun planında hansı dəyişikliklər var? Hüseynovda bir məşqçi olaraq, ən bəyəndiyiniz xüsusiyyət hansıdır?
– Çox yaxşı komandamız və baş məşqçimiz var. Məşqçimizin verdiyi tapşırıqları maksimum yerinə yetirib uğur qazanmaq istəyirik. Zamanla daha yaxşı olacağımıza inanırıq.
– “Səbail”in fasiləyəqədərki uğursuz çıxışının səbəbini nədə görürsünüz?
– Mövsümün əvvəlində yeni heyət quruldu. Uyğunlaşmağımız zaman apardı. Üstəlik, zədəli futbolçularımızın olması işimizi çətinə saldı. Qarşıda bizi yarımmövsümlük bir period gözləyir. Autsayderlər qrupundan qurtulmaq üçün əlimizdən gələni edəcəyik.
– “Səbail” Premyer Liqadakı yerini qoruyub saxlaya biləcək?
– Qarşıda çox oyunumuz var. Fürsətlərdən yararlanıb xal ehtiyatımızı artırmalıyıq. Bunun nəticəsində turnir cədvəlində irəliləyə biləcəyimizə inanıram. Yaxşı komandamız var. Sonuncu olmamaq üçün mübarizə aparacağıq.
AĞA