Ölkə futbolu
23 fərqli məkanın 32 komandası: AFFA-dan mühüm qərarlar
AFFA İcraiyyə Komitəsi gözlənilən qərarları açıqladı. Təxmin etdiyimiz kimi, Premyer Liqa ilə bağlı müzakirələrə ehtiyac duyulmadı, Divizionlarda iştirakçıların adı dəqiqləşdi.
2023-2024-cü illər mövsümündə I Divizionda 10 komandanın iştirakı rəsmiləşdi. Xəbər verdiyimiz kimi, “Şamaxı”, “Qaradağ Lökbatan”, MOİK, “Mingəçevir”, “Zaqatala”, “İrəvan”, “İmişli”, “Difai Ağsu”, “Araz Saatlı” və “Karvan” elitaya yüksəlmək üçün mübarizə aparacaq. 2023-2024-cü illər mövsümündən etibarən yarıpeşəkar statuslu II Divizion təsis olundu və burada da iştirakçıların böyük əksəriyyəti bölgə komandaları olacaq: “Füzuli”, “Göygöl”, “Ağdaş”, “Sportinq Baku”, “Qusar”, “Marxal Şəki”, “Şəfa Baku”, “Cəbrayıl”, “Lerik”, “Kürmük Qax”, “Şəmkir”, “Kür-Araz”.
Fərq ondadır ki, AFFA II Divizionda 12 komandaya şans vermək qərarına gəlib. Lakin təqdim olunan siyahıda dəyişiklik mümkündür. Komandalar vədlərini yerinə yetirməsə, onların sayı 10-dək azaldılacaq. Daha bir maraqlı məqam İmişlinin hər iki Divizionda təmsil olunacağıdır. Belə ki, “Kür-Araz” da bu rayonu təmsil edəcək. “Lerik”in simasında Cənub bölgəsinin böyük futbola qayıtması da sevindirici haldır.
İcraiyyə Komitəsi Klubların Lisenziyalaşdırma Qaydalarında dəyişikliklər edib. Lakin söhbətin konkret nədən getdiyi hələlik bizə bəlli deyil. Qarşıdakı günlərdə bu məqamları aydınlaşdıracağıq.
Premyer Liqa və Azərbaycan kuboku uğrunda yarışın oyunlarının yayım hüququ ilə bağlı təkliflərin hazırlanması AFFA-nın baş katibliyinə və Peşəkar Futbol Liqasına tapşırılıb. Qurum bugünkü iclasda qərar verib yayımçı telekanalın klublara ödəməli olduğu vəsaiti ləğv etmək istəyirdi. Belə ki, dövlət yardımı verildiyini irəli sürüb klublara yayıma görə haqq ödənilməsini dayandırmaq istəyirdilər. Görünür, etirazlardan ehtiyat edərək bu barədə qərar verməyiblər və məsələ hələ müzakirə olunacaq.
Bundan sonra Premyer Liqa və Azərbaycan Kuboku oyunlarında meydana əvəzetmədən daxil olan 5 futbolçunun legioner olmasına məhdudiyyət qoyulmayacaq. Legioner limtini dəyişməyən AFFA klublara bu formada güzəşt edib.
2023/2024-cü illər mövsümünün startına qədər 21 yaşı tamam olmamış, ölkəsinin milli komandasının üzvü olan legioner üçün rüsum tələb olunmayacaq. Milli komandasının heyətində, FIFA təqvimində olan rəsmi yoldaşlıq oyunları da daxil olmaqla, son 12 ayda oynamış (meydançaya çıxmış) legionerlər üçün də eyni qayda tətbiq olunacaq. Bu, bir çox ölkələrdə tətbiq olunan praktikadır. Belədə komandalar daha keyfiyyətli legionerlər gətirməyə məcbur olacaq. Saya görə fərqli rüsumların tətbiq edilməsi də müsbət haldır. “Sumqayıt” kimi il ərzində 15 yararsız əcnəbi gətirib onları 3-4 aydan sonra qovan klublar indi iki dəfə düşünməli olacaq.
Klublara dövlət tərəfindən ayrılan maliyyə yardımı proqramında xarici ölkə klublarına futbolçu transfer edən klublar üçün nəzərdə tutulan 150 min (yüz əlli min) manat vəsaitlə bağlı klublar tərəfindən yeni layihə hazırlanaraq AFFA və PFL-ə təqdim olunacaq. Görünür, Klublar Komitəsinin narazılığı nəzərə alınıb. Bu məqam həm də ona görə yaxşıdır ki, artıq qurumlar bir-biri ilə əlaqəli işləyir, məsləhətləşir. Qəti hökmün olmadığı, müzakirələrin aparıldığı yerdə isə inkişaf qaçılmazdır.
Vitali Borisovun futzal üzrə Azərbaycan milli komandasının baş məşqçisi təyin olunacağı da gözlənilirdi. Futbol üzrə əsas milli komandamız istisna olmaqla, bütün yığmalarda əcnəbilərlə əməkdaşlıq dayandırıldı, yerli kadrlar önə çəkilir. Maraqlıdır ki, Futzal Federasiyasına ayrılan maliyyənin artırılması ilə bağlı qərar yoxdur. Görünür, federasiya prezidenti Zaur Axundov layihəsini əsaslandıra bilməyib.
Beləliklə, əksəri mütərəqqi olan qərarlarla qarşı-qarşıyayıq. İndi əsas olan bu yeniliklərin davamını gətirmək, inkişafa nail olmaqdır. 3 liqada Bakıdan başqa 22 şəhər və rayonumuzun təmsilçisi olacaq ki, belə olması çoxdan lazım idi. 32 komandadan 9-u paytaxtı, 2-si İmişlini, 21-i də digər bölgələritəmsil edəcək.
AĞA