Premyer-liqa
“Bakı” davası: Gərginlik son həddədi
Maddi problemlər içində boğulan “Bakı”da ö…
Maddi problemlər içində boğulan “Bakı”da ötən gün münasibətlər pik həddə çatmışdı. Komandanın daxilində ikihakimiyyətlilik yaranmışdı.
Əldə etdiyimiz məlumata görə, istefa verən sabiq vitse-prezident Yaşar Seyidovun yenidən komandaya qayıtması klub daxilində heç də xoş qarşılanmayıb. Bundan başqa Seyidovun komandanın əziyyətini çəkən baş məşqçi İbrahim Uzuncanı istefaya göndərməsi, onun yerinə isə Novruz Əzimovu təyin etməsi özbaşınalıq kimi qəbul edilib. Yaşar bəy bu təyinatın klub prezidenti Hafiz Məmmədovun göstərişinə əsasən yerinə yetirildiyini desə də, sonradan məlum olub ki, komanda rəhbərinin mövcud məsələdən heç xəbəri belə yoxdu.
Məsələ burasındadı ki, “Qarabağ”la matça 3 saat qalmış vəziyyət normal imiş. Ta ki futbolçular bazaya gələnə qədər. 3 gün məşq etməyən futbolçular matça hazırlaşmaq üçün soyunub-geyinmə otağına yollananda fərqli mənzərənin şahidi olublar. Onlar komandanın sabiq çalışdırcısı Novruz Əzimov və əvəzedicilərin məşqçisi Qəhraman Əliyevi soyunub-geyinmə otağında görüb. Bundan başqa, istefası qəbul edilən Seyidov da onlarla birgə olub. Elə bu zaman Seyidov qısa iclas keçirərək komanda üzvlərinə bundan sonra “Bakı”ya Novruz Əzimovun başçılıq edəcəyini deyib. Bu zaman da futbolçularla Seyidov arasında söz atışması olub. Bu qərardan narazı olan futbolçulara Seyidov “narazı olan çıxıb gedə bilər” söyləyib.
Məcburi iclas zamanı bu qərara qarşı çıxan futbolçularla Seyidov arasında gərgin dəqiqələr yaşanıb. Əzimov heyəti qurmaq istəyəndə isə aləm bir-birinə dəyib. Belə ki, Seyidovun təyin etdiyi baş məşqçi komandanın əsas heyət üzvləri Vüqar Bəybalayev, Nurlan Novruzov, Jaba və Georgios Pelagiosun ilk “11-lik”də meydana çıxmayacağını deyib. Novruz bəyin bu sözləri futbolçuların narazılığına səbəb olub. Əzimov da Seyidov kimi “narazı olanlar çıxıb gedə bilər” deyib. Bu zaman 2-3 futbolçu soyunub-geyinmə otağını tərk edəndə komandanın bütün üzvləri birlik göstərərək, oranı tərk edib. Braziliyalı Jaba isə bu söz-söhbətdən bezərək, avtomobilinə əyləşərək bazadan ayrılıb, evinə yollanıb. Bütün bu olanları futbolçu özünə hörmətsizlik kimi qəbul edib.
Baş verən hadisələr klubun sabiq vitse-prezidenti, Hafiz Məmmədovun qardaşı Zeynal Məmmədovun qulağına çatdırılıb və uzun aradan sonra o, “Bakı”nın bazasına gəlib. Komanda üzvlərini qəbul edən Zeynal bəy mövcud problemi onların dilindən eşidib, günahkarı aşkarlayıb və öz tərzincə lazım olan tədbiri görüb. Məmmədov Seyidovun ikili oyun oynamasını qınayıb. Futbolçuları bir gün sonra şəxsən qəbul edəcəyini deyən Məmmədov oyunçulardan “Yaşar Seyidovun komandanın işlərinə qarışmasını istəmirik” cümləsini də eşidib. Onlar Zeynal bəyin diqqətinə “əgər Seyidov bir də soyunub-geyinmə otağımıza daxil olsa, nə məşqə, nə də oyuna çıxacağıq” deyib. Onları arxayın edən Məmmədov futbolçulara yenidən soyunub-geyinmə otağına yollanması deyib. Geri qayıdan “Bakı”nın üzvləri elə oradaca Əzimova qarşı kobud rəftar nümayiş etdirməyə məcbur olublar. Əzimovu soyunub-geyinmə otağından qovan futbolçular bundan başqa əvəzedicilərdən heyətə cəlb olunmuş gənc oyunçulara da sərt üzlərini göstəriblər.
Bu plan “Qarabağ”la oyundan bir gün əvvəl qurulub. Belə ki, adı sifariş ərizəsinə daxil edilən əvəzedicilərin futbolçuları axşam bazada saxlanılıb. Onlara sabah “Qarabağ”a qarşı oynayacaqları deyilib. Yaşar Seyidov soyunub-geyinmə otağında olarkən əsas komandanın üzvlərinə “Onsuz siz də meydana çıxsaz “Qarabağ” qapınıza 6-7 qol vuracaq. Fərqi nədi ki? Ondansa gənclər oynasın” deməsi futbolçuları lap özündən çıxarıb. Buna görə də sona qədər meydanda vuruşacaqlarına dair bir-birilərinə söz veriblər.
Olub-bitəni dəqiqləşdirmək üçün Seyidovun da məsələyə münasibətini öyrənmək istədik. Amma Yaşar bəyi ağdamlılarla oyundan sonra “gördüm” deyən olmadı.
Qısası, istefa verməsindən və onun bu xahişi Hafiz Məmmədov tərədindən qəbul olunandan sonra Yaşar Seyidovun “Bakı”nın işlərinə müdaxilə etməsi bazada heç də xoş qarşılanmır. Bunun da bir sıra səbəbləri var. İş burasındadı ki, futbolçular arasında maaşlarının verilməməsində Seyidovu qınayanların sayı çoxluq təşkil edir. Qapıçı Aqil Məmmədov, müdafiəçi Əziz Quliyev və yarımmüdafiəçi Rəhman Hacıyevin transferindən gələn gəlirin hara xərcləndiyi də onlarda böyük şübhə yaradır.
Təbii ki, bütün bunlar yalnız adının çəkilməsini istəməyən futbolçulardan eşitdiklərimizin xülasəsidi. Vəziyyət fərqli də ola bilər və bunun üçün Seyidovla Əzimovun da danışması lazımdı. Xüsusilə, İbrahim Uzuncanın dünənki ittihamlarından sonra buna çox ehtiyac var. Amma “Bakı”da kluba sahib olmaq uğrunda müharibənin getdiyi dəqiqdi. Yaşar bəyi qınayanlar ola bilər, ancaq unutmayaq ki, o, faktiki yiyəsiz qalmış klubun ayaqda qalmasını təmin edən yeganə şəxsdi. Məmmədovlar həqiqətən söz sahibidilərsə, ortaya çıxmalı, problemə aydınlıq gətirməlidilər. Amma onlar Zeynal bəyin timsalında qəfil gözə görünüb itirlər. Halbuki, Hafiz bəyin qardaşı komandanın taleyindən narahatdısa, onun qayğısına da qalmalıdı. Yoxsa ki, gəlib bir-iki tənqid yağdırıb, yalançı vəd verməklə deyil.
Seyidov artıq 2 ildi yiyəsiz yetimə baxırmış kimi davranır. Hafiz bəydən ümidi kəsildiyi üçün onun başqa yerdə dayaq axtarması, AFFA-ya üz tutması başadüşüləndi. Təlim-məşq bazasının işığı, suyu kəsiləndə ilim-ilim itən Zeynal bəyin birdən peyda olması da maraqlı faktdı. Bəlkə də Yaşar bəy həqiqətən ikili oyun oynayır. Lakin bunun da səbəbkarı Hafiz Məmmədovdu. Görün klubda necə yiyəsizlikdi ki, sabiq vitse-prezident məşqçi dəyişməyə cəhd edir.
EMİN SƏFƏROV