Ölkə futbolu
AFFA gözləyir, “Rəvan” “məntiqlə danışır”
Mövsümün bitməyinə xeyli qalmış U-19 Liqasının qa…
Mövsümün bitməyinə xeyli qalmış U-19 Liqasının qalibi olan “Rəvan”ın UEFA-nın təşkil etdiyi Gənclər Liqasında iştirakı hələ təsdiqlənməyib. Düzdü, ortada reqlament var və yazılanlara əsasən, əminliklə demək olar ki, paytaxt təmsilçisi avrokubok yarışında olacaq. Amma AFFA hələ ki, rəsmi açıqlama verməyə tələsmir. Bu qurumda UEFA-dan mayın 10-a kimi gələcək Əsasnaməni gözləyirlər.
Amma “Rəvan” tərəfi Gənclər Liqasında oynayacaqlarına əmindi. Bunu klubun mətbuat xidmətinin rəhbəri Şamo Quliyev bildirir:
“Yeni foramtla siz də tanışsız. Orada qeyd olunur ki, 2015/16 mövsümündən UEFA Gənclər Liqası 2 şaxəli olacaq. ÇL-dəki 32 komandanın gəncləri bir, milli çempionatların qalibləri digər şaxə üzrə yarışa başlayacaq. İkinci şaxədə UEFA əmsallar cədvəlində ilk 32 sırada qərarlaşmış ölkələrin U-19 Liqasının çempionları oynamaq hüququ qazanacaq. U-19 turniri olmayan və U-19 çempionu ÇL şaxəsində olan ölkələr sıralamadakı növbəti ölkə ilə əvəzlənəcək. Yəni, məsələn, “Qarabağ” U-19 Liqasının qalibi olursa, eyni zamanda Ağdam klubunun əsas komandası ÇL-in qrupuna vəsiqə qazanırsa, onda Azərbaycan 2-ci vəsiqəni özündən sonrakı ölkəyə verir. “ÇL şaxəsində olan ölkələr sıralamadakı növbəti ölkə ilə əvəzlənəcək” şərtini “Gənclər Liqasında hər ölkədən bir klub çıxış edə bilər” anlamına gətirmək yalnışdır, məncə. “Qarabağ” ÇL-in qrupuna vəsiqə qazanacağı halda, U-19 Liqasının qalibi olan “Rəvan” FK-nın Gənclər Liqasəndan kənarda qalması məntiqsiz olardı. Baxın, UEFA-nın 54 üzvü var. Hər mövsüm Çempionlar Liqasının qrup mərhələsində 18 ölkədən 32 klub mübarizə aparır. Yerdə qalır 36 ölkə. Deyək ki, həmin 32 klubdan 6-sının həm əsas, həm U-19 komandası ölkə çempionu olur. Qalacaq 30 yer. Onda necə olacaq? İkinci şaxə üçün 32 klub düzəlmir axı. Digər 2 klubu Afrikadan dəvət edəcəklər? Üstəlik, U-19 liqası olmayan ölkələr də var. Yeni format U-19 Liqalarına marağı artırmaq üçün tətbiq olunur və Gənclər Liqasının ikinci şaxəsində sırf milli çempionatların qalibləri mübarizə aparacaqlar. Başqa bir məqamı deyim: Avropanın bir çox ölkələrində adətən bəlli komandalar çempion olur. Məsələn, İspaniyada “Real” və ya “Barselona”, Ukraynada “Şaxtor” və Kiyev “Dinamo”su, Şotlandiyada “Seltik” və s. Belədə həmin ölkələrdə U-19 Liqalarında mübarizə aparan klubların haqqı tapdalanmış olur ki, UEFA da buna imkan verməz. UEFA ölkələrdə U-19 Liqalarına marağı artırmaq, gənc oyunçulara stimul vermək, onların üzə çıxarılması üçün formatda yenilik edib”.