Ölkə futbolu
“Çukariçki”nin “silah”ı və “zəif bənd”ləri
“Qəbələ”nin Avropa Liqasındakı rəqibi “Ç…
“Qəbələ”nin Avropa Liqasındakı rəqibi “Çukariçki” qitədə ad çıxaran komandalardan deyil. Serbiya klub futbolunun adı gəldikdə, ilk olaraq, “Partizan” və “Srvena Zvezda” yada düşür ki, bu da yalnız uzaq keçmişdən qalan tarixdi. “Çukariçki” nə daxili, nə də beynəlxalq arenada barəsində söz etdirməyib.
“Dağlılar” ötən mövsüm ölkə çempionatında keçirdiyi 30 oyunda 57 xal toplayaraq, “Partizan” və “Srvena Zvezda”dan sonra 3-cü yerə sahib çıxıb. 2014-2015 mövsümündə də Avropa Liqasında iştirak edən “Qəbələ”nin rəqibi 2-ci təsnifat mərhələsində “silahı yerə qoyub". Avstriya “Qrödiq”i ilə səfər qarşılaşmasında 0:4 məğlub olan Belqrad təmsilçisi evdə yalnız təsəlliverici qələbə qazanıb – 2:1.
Müasir komanda tipik balkan futbolu oynayır. Atletik oyun üslubuna üstünlük verən təmsilçimizin rəqibinin dəst-xətti hardasa elə “Qəbələ”ni xatırladır. Uzaqdan zərbələr, hava ötürmələri və “ikinci mərtəbə”də mübarizə “Çukariçki”nin əsas “kozır”larındandı.
İlk mərhələdə Sloveniya “Domjale”si ilə oyunlarda Serbiya təmsilçisi 180 dəqiqə kəsiyində qapısının toxunulmazlığını qoruya bilib ki, bu da müdafiə xəttinin etibarlı olmasından xəbər verir. Hər iki qarşılaşmada “Çukariçki”nin qapısını Nemanya Stevanoviç qoruyub. Fövqaladə bir şey baş verməsə, Roman Qriqorçukun yetirmələrinə qarşı da məhz bu əlcək sahibi oynayacaq.
Komandanın 2 oyuna cəmi 1 qol vurması, onu da penaltidən, Topaz Premyer Liqasının bürünc mükafatçısı ilə görüşlərdə bu baxımdan əziyyət çəkəcəyini indidən proqnozlaşdıra bilərik. Xüsusilə, evdə qol vura bilməmələri 2 gün sonra “Qəbələ”yə rəqib olacaq Vladan Miloyeviçin yetirmələrinin əlehinə olan amillərdəndi.
Doğrudu, Qriqorçuk da hücumçu sarıdan ciddi problem yaşayır. Aleksey Antonovun faydalı iş əmsalı, yumşaq desək, “Qəbələ”yə uyğun gəlmək üçün daha yüksək olmalıdı. Ancaq indi “Qəbələ” səfərdə oynayır və Belqraddan qol buraxmadan qayıtmaq həmyerlilərimiz üçün sərfəli nəticə hesab olunacaq.
“Ağ-qaralar”ın kapitanı İqor Matiç komandanın lideridi. Yarımmüdafiəçi vurulan yeganə qolun müəllifidi. Doğrudu, onun 2-ci analoji şansı olsa da, ilk oyunda penaltini qaçırıb. Lakin bu, Matiçin xidmətlərini kiçiltmir. Əlbəttə ki, yarımmüdafiəçi komanda yoldaşlarını yenə də arxasınca aparmağa çalışacaq. Nə dərəcədə alınacaq? Nəzərə alsaq ki, “Qəbələ”nin “tuzlar”ı məhz mərkəz dairəsi ətrafında qərarlaşıblar, optimist düşüncələrin formalaşmasına əsas yaranır. İki gündən sonra isə Belqradda mülahizələrimizin doğru olub olmamasına dair cavabı alacağıq.
- Ölkə futbolu2024-05-12 10:36
Mahir Xorvatiya çempionu oldu
- Ölkə futbolu2024-05-13 10:15
İK gündəmi: Premyer Liqada say dəyişməyəcək?!
- Ölkə futbolu2024-05-13 08:32
“Qarabağ” – postsovet məkanının ən yaxşı komandası
- Ölkə futbolu2024-05-12 08:45
Elxan Məmmədov – Mərdəkandan Kürdəxanıya yollanmaq üçün səbəb var