Premyer-liqa
Biabırçılıq: “Uruscax” futbol
Əndrabadi Azərbaycan Premyer Liqasının iştirakçılarının…
Əndrabadi Azərbaycan Premyer Liqasının iştirakçılarının 30 faizi qeyri-qanuni yolla toplandıqdan sonra növbəti məzhəkənin tezliklə baş verəcəyi gün kimi aydın idi. Olmayan futbolumuzun teleyayımı üçün AFFA-nın verdiyi qərar daha çox 1 aprel zarafatına bənzədi. Axı, mövsüm ərzində tribunalara 1 milyon tamaşaçı toplaya bilməyən çempionata 1 milyon manat qiymət qoyulmasına başqa ad vermək olmurdu.
Bir sıra telejurnalistlə söhbətimizdə də bu məsələyə aydınlıq gətirmişdik. Almaniya Bundesliqasının teleyayımı üçün 40 min avro tələb olunduğu halda, Azərbaycan Premyer Liqasının yayım hüququnun bundan 25 dəfə (!) baha olması acı təbəssüm doğururdu.
Bu gün AFFA-nın rəsmi saytında yayım hüququnun satılması barədə məlumat yerləşdirilib. Premyer Liqa oyunlarının hansı kanala satılması barədə məlumat verməzdən öncə dəyərinə diqqətinizi yönəltmək istəyirik – 700 min manat! Fantastıka!
Ancaq yayım hüququnu əldə edən kanalın CBC olması hər şeyə aydınlıq gətirir. Faktiki olaraq, həmin 700 min sağ cibdən sol cibə köçürülüb. Bu səbəbdən də Azərbaycan Premyer Liqasının yayım qiymətinin 700 min deyil, “0” olduğunu söyləyə bilərik.
Daha bir məqam, özü də ən vacibi, oyunların şərhi ilə bağlıdı. CBC beynəlxalq peyk kanalı olduğuna və xarici dillərdə yayımlandığına görə ilk aylarda oyunların şərhləri rusca olacaq. Gözünüz aydın, gözümüz aydın! Dövlət dilimizdə yayımlanan telekanallara sırıya bilmədikləri keyfiyyətsiz məhsulu sağ əllə sol qulağı tutmaq üslubundan istifadə edərək, guya tender keçirib, satdılar.
Acınacaqlı vəziyyət burasındadı ki, Azərbaycan Premyer Liqasının oyunları futbolsevərlərə rusca – bəzi assosiasiya məsullarının doğma dilində yedirdiləcək. Peyk vasitəsi ilə yayımlanan CBC kanalını Azərbaycan əhalisinin neçə faizinin izlədiyini deyə bilmərik. Ancaq rusca təqdim olunacaq çempionatın ölkə əhalisinin neçə faizinin izləyəcəyi ilk rəqəmi dəqiq göstərə bilərik – 0,…
Bu cür qərarın böyük fəsadlara səbəb olacağı gün kimi aydındı. Ölkədəki təhsilin günü-gündən aşağı düşdüyü bir məmləkətdə rusdilli əhalinin azalması sirr deyil. Həmin əhalinin neçə faizinin futbol fanatı olması rəqəmlərin daha da aşağı düşməsini şərtləndirir. Nəhayət, rusdilli futbol azarkeşlərinin Azərbaycan çempionatına nə dərəcədə maraq göstərdiyini də nəzərə aldıqda, CBC-in Premyer Liqamızı yayınladığı vaxt, ümumiyyətlə 1 tamaşaçının qalmayacağını söyləyə bilərik. Hələ CBC-ə qoşulmaq kimi problemi qoyuruq bir kənara.
Bir neçə kəlmə də məsələnin mənəvi dəyərləri barədə. Dövlət dilində çempionatın yayımlanmaması sadəcə, rüsvayçılıqdı. Nədi-nədi, de-fakto, AFFA hər kluba bu əndrabadi yayıma görə 70 min manat pul verəcək. Kaş elə yardım şəklində bu vəsaiti verib, ana dilimizdə hansısa kanala çempionatı ərmağan edəydilər.
CEYHUN ƏLİYEV
- Ölkə futbolu2024-05-10 08:00
“Yurqorden” Musa Qurbanlıya qiymət qoydu – 10 milyon kron
- Dünya futbolu2024-05-10 16:37
AÇ-2024-ün rəsmi mahnısı təqdim edildi – VİDEO
- Ölkə futbolu2024-05-10 09:21
“Əks təqdirdə fanatlar Şeydayevi qəbul etməyəcək”
- Ölkə futbolu2024-05-10 16:20
Kadinin meneceri: “Hələlik “Qarabağ”la danışmamışıq”