Premyer-liqa
Xaqani Məmmədov Polşada nə iş görürmüş?
AFFA Hakimlər Komitəsinin sədri Xaqani Məmmədovun bir həftədi f…
AFFA Hakimlər Komitəsinin sədri Xaqani Məmmədovun bir həftədi futbolinfo.az-ın əməkdaşının suallarına niyə cavab vermədiyini Sumqayıtda başa düşdüm. Artıq indi mənə bəllidi ki, hörmətli sədr ilk turun “Qəbələ” – “Qarabağ” oyunundakı hakim səhvləri haqda niyə danışmaq istəmir.
Qəbələdə FİFA referisi Əliyar Ağayev iki epizodda diqqət mərkəzinə düşmüşdü. O, Rəşad Sadiqova qırmızı vərəqə göstərdiyi epizodda haqlı idi. Elə buna görə də Xaqani bəy bununla bağlı sualımızı cavablayıb işçisinə haqq qazandırmışdı. “Qəbələ”nin qapısına təyin olunan penalti haqda soruşduqda isə sədr tərəddüd etmişdi: “Hazırda həmin epizoda baxıb, təhlil edirik, iclasdayıq, 10-15 dəqiqədən sonra danışarıq”.
Və düz bir həftədi Xaqani bəy fikirləşir, təhlil edir. Qərar isə çoxdan verilib: Ağayev nəticəyə təsir edən kobud səhvə yol vermişdi, ona görə də cəzalanıb. 2-ci turda təyinat almayan FİFA referisi Ansi Aqolliyə hədiyyə etdiyi penaltinin cəzasını çəkir. Məmmədov susmaqla, gizlənməklə bunu ört-basdır etməyə çalışsa da, hər şey aydındı.
Sumqayıtdakı dünənki matçda da hakim səhvləri saysız idi. “Xəzər Lənkəran”ın oyundan sonra protokola etdiyi qeydlərə haqq qazandırmıram – bu, daha çox bir klubun əzələ nümayişinə oxşayırdı. İddiasız olduğu vaxt səsi gəlməyən cənublular indi bir qədər özünə gəlib və hər xırda detaldan istifadə etməyə, bundan şou düzəltməyə çalışacaq. Onların “Sumqayıt”la matçdan sonrakı açıqlamaları da buna hesablanmışdı. Təsadüfi deyil, baş məşqçi Yunis Hüseynov xal itkisini heyətdəki gənclərin təcrübəsizliyinə bağladısa, klub hakimliyi qabartdı.
Lənkəran klubunun dəqiq hansı epizodlara görə narazılıq etdiyini bilmirəm, bu yazını qələmə alarkən hər hansı konkret iradlar toplusunu görməmişdim. Amma yəqin ki, cənublular rəqibin hesabı açdığı epizodda qayda pozuntusu olmamasından və hakimin onların lehinə penalti təyin etməməsindən şikayətçi olacaq. Bəri başdan deyim ki, haqsızdılar. Sadəcə, hakim o qədər bərbad oyun idarə etdi ki, “Xəzər Lənkəran”a danışmaq haqqı verdi.
Elvin Əsgərov Premyer Liqanın cari mövsümünə hazır deyil. Onun fiziki hazırlığı yerində deyil, artıq çəkisi var, qətiyyətsizdi. Bu hakim Sumqayıtdakı matçda bir çox epizodda mübahisəli epizodlarda qərarını daha ucadan qışqırıb etiraz edənin lehinə verirdi. Son saniyələrdə lənkəranlılar təhlükəli nöqtədən cərimə zərbəsi yerinə yetirərkən qol vurub qələbə qazansaydı, yenə oyunun protokoluna qeydlər yazılacaqdı. Amma bu dəfə şikayətçi meydan sahibləri olacaqdı. Heç-heçə sumqayıtlıları qane etdiyindən susdular, uduzsaydılar, son dəqiqələrdə – Adrian Skarlatakenin kobud oynadığı epizodda – penalti təyin edilməməsinin səbəbini soruşacaqdılar. Həmin anda rəqib futbolçunu sürüyən rumın futbolçunun hərəkəti mənə “Apollon” – “Qəbələ” matçında təyin olunan penaltini xatırlatdı.
Elvin Əsgərov lənkəranlıların narazılığına əsas verən bir ciddi səhvə yol verdi. İlk hissənin sonunda Rahid Əmirquliyev cərimə zərbəsi yerinə yetirərkən baş hakim “yatmışdı”. Topa artıq ikinci oyunçu zərbə vurarkən Əsgərov… cərimə zərbəsini yerinə yetirməyə icazə verirdi. Maraqlıdı ki, o, fiti səsləndirəndə cənubluların qapıya zərbə vuran oyunçusu bir qədər karıxdı da, amma Elvin bəy zərbəni təkrarlatmadı.
Yəqin Xaqani bəy bir həftə də zənglərimizi cavabsız qoyacaq. Çünki ona budəfəki sualımız konkret hansısa epizodla bağlı olmayacaq. Məmmədov, lütfən, deyin: Polşadakı təlim-məşq toplanışında nə iş görmüsüz?
FƏRİD