Ölkə futbolu
Bərbad qazona görə əsl günahkarlar və HƏDƏF
Avropa Liqasının pley-off mərhələsi çərçivəsində…
Avropa Liqasının pley-off mərhələsi çərçivəsində “Qarabağ”ın İsveçrə "Yanq Boyz"u ilə ev oyunu ərəfəsində yaranan vəziyyət çox ciddidi. Tofiq Bəhramov adına Respublika stadionunun qazonunun bərbad durumu çox adamın kürkünə birə salıb. Ağdam klubunun məhz belə qazon üzündən mərhələni keçə bilməmək ehtimalı isə cavabdeh şəxslər üçün əcəl zənginə bərabərdi.
Bu mövsüm səfərdə 2 qələbə qazanan, “Seltik”ə qarşı gözəl oyun oynayan Qurban Qurbanovun yetirmələri Bakıda qola da həsrətdi. Bunun birbaşa səbəbi məhz meydan amili ilə bağlıdı. Texnikalı, sürətli, baxımlı futbola üstünlük verən təmsilçimizin uğuru üçün yaxşı qazon vacib şərtdi. Amma Respublika stadiondakı biabırçı durum göstərir ki, deyəsən, klubumuzun Avropa Liqasının qrup mərhələsindən kənarda qalması kimlərəsə sərf edir. Elə olmasaydı, ötən müddət ərzində problemin həlli üçün nəsə iş görülərdi.
İndi vəziyyət elədi ki, stadiona qulluq edən FSM (Football and Sport Management) şirkəti işi bacarmadığını gizlətmək üçün qazonu yaşıl rəngə boyamaqla məşquldu. Dünən məşqöncəsi olduğu kimi, bu gün qazon növbəti dəfə rənglənib. Az sonra oyuna baxarkən yamyaşıl meydan ola bilsin, sizə də təəccübləndirəcək. “Altı təzək, üstü bəzək“ olan qazonun eyibləri isə zaman keçdikcə üzə çıxacaq.
Artıq dəqiqdi ki, “Qarabağ” qrupa düşməsə və ya qazonla bağlı hər hansı ciddi xoşagəlməzlik üzə çıxsa, Respublika stadionunun direktoru Akif İsmayılov işdən çıxarılacaq. Düzdü, onun kreslosu çoxdan laxlayır, hətta bir ara artıq ərizəsinin yazdırıldığı da deyildi. Ancaq bu şəxs HƏDƏF kimi kreslosunda saxlanılır, dar gündə məhz o ayağa veriləcək.
İlk baxışdan burada qəribə heç nə yoxdu: problem stadionda yaranıbsa, buna görə onun rəhbəri hesabat verməlidi. Ancaq məsələnin pərdəarxası da var. Stadion gənclər və idman nazirliyinin balansındadı, ona qulluğu isə AFFA-nın baş katibi Elxan Məmmədova məxsus olduğu deyilən FSM edir. Yuxarıdan tapşrılıb və İsmayılov sadəcə, Fərman Əlizadənin rəhbərlik etdiyi şirkətlə müqavilə bağlamağa məcbur edilib. Lakin belə problem ortaya çıxanda HƏDƏF kimi danışmaq qadağası da qoyulan Akif bəy qabağa verilir.
Göründüyü kimi, işi bacarmayan səriştəsizlər də, havaya sovrulan milyonları qazananlar da başqalarıdı. Amma hər yerdə topun ağzına verilən İsmayılovdu. FSM (Bu qurumun abreviaturasını Fərmanın Stadion Monopoliyası kimi də oxumaq olar. Çünki ölkənin bərbad gündə olan əksər qazonlarına məhz Əlizadənin şirkəti “qulluq” edir – red.) işinin öhdəsindən gəlməsə də, dövlətin pulu çölə atılsa da, qazanan tərəfdi.
Nə olursa-olsun, bircə bu durumdan “Qarabağ” ziyan çəkməsin. Çünki istənilən halda, bu biabırçılığa görə məsuliyyəti olanlar birtəhər çulunu sudan quru çıxaracaq, yenə işinə davam edəcəklər. Onlar “arxalı adamlar” olduğundan problem hansısa HƏDƏFin boynuna yüklənəcək. Onlar hətta meydanı yaşıl deyil, qırmızı rəngə də boyasalar, sonda günahkar çıxmayacaqlar.
AĞA