Premyer-liqa
"Qəbələ"nin sindrom sirri
“Qəbələ” Topaz Premyer Liqasında qələbə qazandığ?…
“Qəbələ” Topaz Premyer Liqasında qələbə qazandığı tarixi yəqin ki, unudub. Komanda unutmayıbsa da, azarkeşləri, futbol ictimaiyyəti xatırlamır. Avropa Liqasının qrup mərhələsinə vəsiqə əldə edən, qızıl medallar uğrunda mübarizədə “Qarabağ”ın əsas rəqibi sayılan komanda sonuncu dəfə oktyabrın 17-də qələbə sevincini dadıb. O da “Neftçi” üzərində. Həmin “Neftçi” ki, adı gələndə, hamının ironiya ilə qarşıladığı “Rəvan”a belə məğlub olub.
Bəs nə oldu ki, rəqiblərinə divan tutan klub birdən-birə ard-arda büdrəməyə başladı? Komandanın uğursuzluqlarının kökünü axtarmaq üçün çempionatdakı əsas rəqibi “Qarabağ”a nəzər yetirməyə ehtiyac var. Çünki Ağdam təmsilçisi də “Qəbələ” kimi iki cəbhədə mübarizə aparır. Amma ukraynalı vizavisindən fərqli olaraq, Qurban Qurbanov qarmoniyanı qorumağı bacarıb: “Qarabağ” Avropa Liqasındakı çıxışından doğan çətinlikləri çempionatda hiss etdirmir.
Bunun səbəbi “Qarabağ”ın aparıcı fiqurlarının bütün oyunlarda iştiak etməməsidi. Qurbanov heyətdə rotasiyalara əl atır və bunun nəticəsində 5-6 oyunçuya dincəlmək imkanı yaradır. “Qəbələ”də isə bunun əksini görürük. Zenyov, Dodo, Antonov, Stankoviç, Qay, Daşdəmirov kimi futbolçular faktiki olaraq, istirahətin nə olduğunu bilmirlər. Belədə, ortaya sual çıxır: 30-a yaxın futbolçunu heyətə qatıb, 14-15 oyunçuyla oynamağa nə lüzum? Lazım deyildilərsə, müqavilə bağlamağa da ehtiyac yox idi, xeyirləri dəyəcəkdisə, onda bu cür çətin durumda əsl oynamaq vaxtlarıdı.
Kənarda qalan futbolçular sırasında bir neçəsinin adını xüsusi qeyd etmək istəyərdik. Milli komandamızın üzvləri Vaqif Cavadov və Vüqar Nadirov, zəngin təcrübəyə malik Rəşad Sadiqov çempionat oyunlarında tükənən oyunçuları əvəz etmək iqtidarındadılar. Axı daim start heyətində meydana çıxan oyunçular həm fiziki, həm də psixoloji yüklənmələrə məruz qalıb. Elə azərbaycanlı futbolçularla yanaşı, itib-batan Floreskunun da adını çəkə bilərik. Hər halda mövsümün əvvəlində rumıniyalı dayaq yarımmüdafiəçisi olduqca xoş təsir bağışlayırdı. Komanda cari mövsümdə avrokubok və çempionat oyunlarında 24 dəfə meydana çıxıb. Bu cür sıx qrafikdə oynamaq üçün İtaliya, İngiltərə, Almaniya, İspaniya çempionatlarında çıxış etməlisən ki, tab gətirə biləsən. Elə bunun nəticəsidi ki, dünən “İnter”lə oyunda Zenyov əzələsini dartdı. Axı bu, mühərruk deyil ki, daim işləsin.
Qriqorçuk təcili tədbirlər görməsə böhran dərinləşə bilər. Bəli, komanda cari avrokubok mövsümündə boyundan hündürə tullana bilib. Çempionatda gümüş medal qazansalar belə, “Qəbələ”nin aktivinə yazılacaq. Ancaq elə həmin gümüş medalı qazanmaq üçün hələ çox əziyyət çəkmək gərəkdi. Çünki dünənki oyun göstərdi ki, “İnter” imkan yaranacağı təqdirdə, Qriqorçukun komandasına “əlcək atmağa” hazırdı.
Əlbəttə, istəməzdik ki, qızıl medallara intriqa 3-cü dövrənin sonunda ölsün. Amma “inqilabi gedişlər” edilməsə, Qriqorçukun qızıl medal iddiaları tezliklə röyaya çevriləcək.
CEYHUN ƏLİYEV
- Ölkə futbolu2024-05-13 19:32
Rövşən Nəcəf: “Premyer Liqada iştirak edəcək klubların sayında artım olmayacaq”
- Ölkə futbolu2024-05-14 08:00
İcraiyyə Komitəsinin gözlənilən qərarları
- Ölkə futbolu2024-05-14 14:32
“Turan Tovuz”dan gedəcək futbolçuların siyahısı dəqiqləşir
- Digər2024-05-13 16:45
“Poz-Qazan” tarixində bənzərsiz uduşlu yeni “Prestij” lotereyası satışda