Ölkə futbolu
"Neftçi" gəlirlərini necə artırır?
Mövsümün əvvəlindən “Neftçi”Kart …
Mövsümün əvvəlindən “Neftçi”Kart layihəsinə start verən “Neftçi” PFK-nın üzvlərinin sayı artmaqdadı. Futbolinfo.az xəbər verir ki, qiyməti simvolik olaraq, klubun yaranma tarixi ilə uyğunlaşdırılmış abonementlərdən 310 ədədi sahibinə qovuşub.
“Neftçi”Kart sahiblərinin sayı artıq 289-a çatıb. Bu kartların qiyməti 19,37 AZN təşkil edir. Ən ucuz abonementlərdən əldə olunan vəsait 5597,33 AZN təşkil edib.
Dəyəri 193,7 manat olan “Neftçi VİP” kartlarından 16-ı alınıb. “Neftçi VİP” satışından klub bu günədək 3099,2 AZN əldə edib.
Klubun ən bahalı abonementi – “Neftçi Elit”ə gəlincə, qiyməyi 1937 AZN olan bu kartın satış sayı 5-dir və bu satışdan “ağ-qaralar”ın büdcəsi 9685 manat zənginləşib.
Cari mövsümün əvvəlindən abonement satışına start verən klubun bu istiqamtdə əldə etdiyi ümumi gəlir 18381,2 AZN təşkil edib.
Qeyd edək ki, “Neftçi”Kartlarına sahib olan azarkeşlər bununla bir sıra güzəştlər əldə edirlər. Bu azarkeşlər üçün mövsüm ərzində “Neftçi”nin bütün ev oyunlarına giriş sərbəstdir. “Neftçi”Kart sahibləri eyni zamanda şəhərin müxtəlif iaşə obyektlərində böyük güzəştlər əldə edirlər.
Rəhbərlikdə məlum dəyişikliklərdən sonra bir sıra marketoloji addımlar atan klubun forma satışı da davam edir. Ötən mövsüm futbolçuların geyindiyi formalardan 41 ədədi artıq satılıb. Hər birinin dəyəri 19,37 AZN olan formalardan əldə olunan gəlir 794,17 AZN təşkil edib. Nəzərə alsaq ki, söhbət ötən mövsüm geyinilən formalardan gedir, aydın olur ki, bu dəstlərin sayı məhduddu. Abonement və atributika satışından “Neftçi”nin cari mövsüm əldə etdiyi vəsait 19175,37AZN təşkil edib.
Eyni zamanda, fanatlar üçün daha ucuz qiymətə olan atributika da satışdadı. Söhbət dəyəri 5 manat olan formalar və 2 manata satılan şərflərdən gedir. Bununla yanaşı, “Neftçi”sevərlər “ağ-qaralar”ın 70 illik yubileyinə həsr olunan kitaba da sahib çıxa bilərlər. Bu kitabın dəyəri 37 AZN təşkil edir. Adlarını çəkdiyimiz bütün bu atributikalara “Neftçi”nin ev oyunları zamanı sahib olmaq mümkündü.
Əldə etdiyimiz bu məlumatlar klubun yaxın zamanlarda daha ciddi layihələrə qol qoyacağından xəbər verir. Aydın məsələdi ki, “Neftçi” ev oyunlarında təşkil olunan satışla kifayətlənməyəcək və böyük ehtimalla yaxın planlarına “fan-şop” yaratmaq da daxildi ki, azarkeşlər istədikləri vaxt lazımı atributikaya sahib çıxa bilsinlər.
Daha bir məqam da maraq doğurur. Müxtəlif iaşə obyektləri ilə tərəfdaşlıq edən klubun abonementlərinin sahibləri xüsusi endirim alırlar. Ancaq Avropa təcrübəsindən yararlanan “ağ-qaralar” “Neftçi” restoranı və ya kafesi yaratsalar, daha məqsədəuyğun olar. Belədə, fanatların rahat dincəlməsi də təmin olunar, onların “Neftçi”nin oyunlarını televiziyadan izləmələri üçün də şərait yaranar. Həm də bu, azarkeş sayının artmasına təkan verər.
Bu praktikadan digər klublar da yararlansa, ziyan tapmazlar. Əlbəttə, “Neftçi” sadaladıqlarımız addımları da atmaq şərti ilə…
CEYHUN ƏLİYEV