Premyer-liqa
Antifutbolla "qol yağışı" və ya səriştəsizliyi ört-basdır etmə cəhdi
“Sumqayıt”la “Rəvan” rəsmən “qış y…
“Sumqayıt”la “Rəvan” rəsmən “qış yuxusu”na yollandılar. Fərqli əhval-ruhiyyədə, fərqli hisslərlə. Hərəyə 3 qol vurub, getdilər “yatmağa”. Yenə də Amil Yunanov yerli azarkeşləri ayağa qaldırmağı bacardı. Gənc vunderkind ilk 34 dəqiqədə dubla imza atmaqla, komandası üçün faydalı olduğunu növbəti dəfə isbatladı. Amma onun qolları arasında bakılılar da fərqlənməyə macal tapmışdı. “Rəvan”ın Şerif(f)i – Suma dəqiq baş zərbəsindən sonra komandasını ümidləndirmişdi.
Meydan sahiblərinin 2-ci qolu isə doğrudan da futbol dərsliklərinə daxil edilə bilər. Bir neçə sürətli qısa ötürmə və Çertoqanovdan Amilin şığıdığı istiqamətdə, müdafiəçilərin arxasına kəskin ötürmə. Qol da ki, öz yerində!
İndi Yunanovla bağlı bir qeydimizi də diqqətinizə çatdıraq. Ölkə futbolunda parlayan gənclər çox olub. Sonradan ənənəvi “ulduz xəstəliyi” və bir neçə ildən sonra sönüblər. Otuz-otuz iki yaşa çatdıqdan sonra isə dizlərinə döyüblər: “niyə belə etdim axı”? Biz də üzümüzü “Sumqayıt” rəhbərliyinə tutub deyirik, bu gənci “xəstələnməyə” qoymayın. Nəinki özüylə, hətta ağsaqqalları ilə danışın, izah edin ki, ona diqqət yetirsinlər. Ki, əsl futbolçu olmaq üçün çalışsın. Bu gün ənənəvi “bu uşaq onların tayı deyil” ifadəsi eşidə bilərik. Amma unutmayaq ki, bu cür halları dəfələrlə görmüşük. Qoruyun o uşağı!
Fasiləyədək azarkeşlər 4 qolun şahidi oldular. Əlbəttə, futbolun bəzəyi qoldu. Amma bu oyun istisna təşkil edirdi. Qol “yağışdan sonra göbələk kimi bitsə də”, sərgilənən futbol ürəkaçan deyildi. Səbəb də üzdədi. Hər iki komandanın oyunçu potensialı hücum futbolu nümayiş etdirməyə imkan vermir. Elə bunun nəticəsidi ki, məzmunlu hücumların ümumi sayı, vurulan qollardan az idi.
İkinci hissədə oyunun ssenarisi dəyişdi. “Sumqayıt” “1-ci skripka” rolunu üzərinə götürməyi qərara aldı. Bax, bu da Samir Abasovu “suq-svanq” vəziyyətinə saldı. İrəlidə əlahiddə heç nə edə bilməyən meydan sahibləri, müdafiədə boşluqlar yaratmağa başladı. Epizodların birində Emin Mehdiyev cərimə meydançasında topa əllə müdaxilə etdi və idarə etdiyi oyunlar arsında ən uğurlusu hesab edilməyəcəyi matçın baş hakimi Orxan Məmmədov haqlı olaraq, “nöqtə”ni göstərdi. Nəzərə alsaq ki, yarımmüdafiəçinin passivində artıq bir sarı vərəqə var idi, referi, onsuz da cəzalandırdığı komandaya bundan da artığını etməyə bilərdi. Amma o, şübhəli qərarla, faktiki olaraq, “Rəvan”a eksklüziv fora təşkil etdi: Emin ikinci rəsmi xəbərdarlığını alaraq, meydandan qovuldu. Qonaqların kapitanı Ramazan Abbasovun zərbəsinin istiqamətini Şahruddin Məhəmmədəliyev doğru müəyyənləşdirsə də, komandasını xilas edə bilmədi – 2:3.
Meydan sahiblərinin ixtiyarında 15 dəqiqə qalırdı. Amma azlıqda oyunu xilas etmək olduqca müşkül məsələdi. Daha dəqiq olsaq, “Rəvan” düzgün taktika qursaydı, qış fasiləsi öncəsi son turu qələbəylə başa vura bilərdi. Say çoxluğuna sahib olan komanda sadəcə, rəqibinə qarşı aqressiv oyun nümayiş etdirib, pressinq sayəsində hücum barədə düşünməyə imkan verməməklə istəyinə çata bilərdi. Amma Bəhmən Həsnovun komandası əsl Azərbaycan futboluna xas strategiyaya əl atdı: “ay ana, öldüm”! Külək möhkəm əsəndə də yerə sərilən qonaq komandanın oyunçuları futbol adına yaraşmayan hərəkətlər hesabına qələbəni qorumağı qərara almışdı. Amma “Futbol İlahəsi” onların bu cür çirkin qərarını son saniyələrdə cəzalandırdı – 3:3.
Hesab oyuna görə oldu. Lakin hakimin qarşılaşmaya 3 dəqiqə əlavə etməsinə rəğmən, əsas vaxt sona çatdıqdan sonra 5 dəqiqə oynatması, qonaqları əməlli-başlı hiddətləndirmişdi. Əslində çoxsaylı epizodlarda “Rəvan” futbolçularının yerə sərilməsi, oyun ərzində edilən əvəzetmələr referinin görüşə 4, hətta 5 dəqiqə əlavə etməsini şərtləndirirdi. Üstəlik əlavə olunan 3 dəqiqə kəsiyində “Rəvan”da dəyişiklik də baş verdi ki, buna görə də oyun uzadılmalı idi. Daha sonra cərimə zərbəsi ətrafında mübahisələr, sonra ardıcıl künc zərbələri və nəhayət, qol.
Bu qol autsayder komandanın baş məşqçisini özündən çıxarmışdı. Ad çəkməkdən qorxsa da, dolayısı ilə komandasına qarşı kampaniya aparıldığını söylədi. Ancaq etiraf etmədi ki, uğursuz sonluğun günahkarı elə özüdü. Etiraf etmədi ki, yetirmələri say üstünlüyünə sahib olduqdan sonra qorxaq taktika seçmişdi. Boynuna almadı ki, məhz onun səhvi komandasını 2 xaldan məıhrum etdi. Hər halda “Rəvan” rəhbərliyi çətin ki, futbolu baş məşqçilərindən daha dərin bilə. Deməli, onlar da eyni “havaya oynayacaqlar”.
“Sumqayıt”a gəlincə, bu komandada vəziyyət fərqlidi. Abasov xoş təsir bağışlayan komanda qurmağı bacarıb. Amma bu “maşın” ancaq əks-hücumlara hesablanıb. Eyni zamanda, “gənclik şəhəri” təmsilçisinin daha bir problemi də qalır. Söhbət oyuna köklənməkdən gedir. Adlı-sanlı rəqiblərinə qarşı cani-dildən vuruşan “Sumqayıt” bərabərsəviyyəli komandalarla oyunda eyni istəyi nümayiş etdirmir.
Və sonda. Qarşılaşma başa çatdıqdan sonra “Rəvan”ın qapıçısı Konstantin Maxnovski dəhlizdə hakimlər briqadasının qarasına rus dilində xoşagəlməz ifadələr işlətdiyi vaxt, meydan sahiblərinin yarımmüdafiəçisi Aleksandr Çertoqanovla münaqişə yaşanıb. Ancaq hər iki tərəfin məşqçilərinin müdaxiləsindən sonra mübahisəni səngitmək mümkün olub.
CEYHUN ƏLİYEV
- Ölkə futbolu2024-05-13 10:15
İK gündəmi: Premyer Liqada say dəyişməyəcək?!
- Ölkə futbolu2024-05-13 08:32
“Qarabağ” – postsovet məkanının ən yaxşı komandası
- Milli komanda2024-05-12 15:31
Millimiz iki yoldaşlıq görüşü keçirəcək
- Ölkə futbolu2024-05-13 19:32
Rövşən Nəcəf: “Premyer Liqada iştirak edəcək klubların sayında artım olmayacaq”