Milli komanda
Təki həmişə toy olsun…
Bakı Olimpiya stadionu. 65 min tutumlu bu “div” indi boş…
Bakı Olimpiya stadionu. 65 min tutumlu bu “div” indi boş-bekar qalıb. Avropa Oyunlarından sonra Bakı Olimpiya Stadionu dilsiz-ağızssız, boynubükük şəkildə ianə hesabına yaşayır.
Vəziyyətdən çıxmaq üçün orada hətta toy mərasimləri keçirməyə də hazırdılar. Ancaq bəzən toy olmasa da, gəlib yaxşıca toy tutub, gedənlər olur. Faktiki olaraq, AFFA tərəfindən maliyyələşdirilən bu nəhəngin 17 yaşlı futbolçulardan ibarət yığmamızın Rusiya ilə yoldaşlıq görüşünü olimpiya stadionunda keçirməsinin yalnız bir səbəbi olub: stadionun illik məsrəfləri qarşısındakı qrafada “gəlir” bölməsinin boş qalmaması.
Əslində, bu oyunu daha az tutumlu stadionların birində də keçirmək mümkün idi. Daha dəqiq olsaq, bu oyun elə xırda bir meydanda da baş tutmalı idi. U-17-nin rəsmi oyunlarına 5-10 azyaşlı yığışırsa, təsəvvür edin yoldaşlıq oyununa neçə nəfər gələ bilər?! Bunun üçün hansısa ali savada sahib olmağa ehtiyac yoxdu. Amma 65 minlik stadion?! A kişilər, ölkəmizdə azarkeş sayına görə yəqin ki, 1-ci yerdə dayanan İtaliya yığması millimizin qonağı olanda Olimpiya stadionu dolmamışdı e!
Qərəz, toy məclisi keçirməyə belə hazır olan stadion rəhbərliyi U-17-nin iştirakı ilə bom-boş tribunalar önündə baş tutan oyuna görə növbəti iri həcmli vəsaitə sahib çıxdı. Amma xırda stadionun xərcləri də bir neçə dəfə aşağı ola bilərdi. Sonra da Hesabat-Seçki Konfransında deyəcəklər ki, müstəqil audit yoxladı və hər şey şəffafdı.
Nə isə, oğlanlar çıxdı meydançaya. Təbriz Həsənovun yetirmələrinə ruslar bir toy tutdular ki, səsi Yaponiya sərhədlərindən gəldi – 1:5. Bax, bu oldu əsl toy! Zambır-zumburlu toy 1-2 həftədən sonra unudulursa, bu cür toylar uzun illər sonra da xoş xatirə kimi yada düşür. Amma məsələn, 1-2 saatdan sonra AFFA-nın baş katibi Elxan Məmmədov U-17 yığması 1:4 hesabı ilə Rusiyaya məğlub olduqda “inkişaf göz qabağındadı. İlk oyunda ruslar Bakıda bizə toy tutmuşdular. Onda 1:5 uduzmuşduq, 3 gün sonra keçirdiyimiz oyunda isə futbolumuza göstərilən diqqət və qayğı öz bəhrəsini verməkdədi, indi 1:4 yenildik”, deyə biləcək. Axı, az sonra növbəti sınaq matçı olacaq.
İlk toyun tamadası Rəhim Həsənov idi. Onun gənclərimizin qapısına təyin etdiyi penalti isə tolerantlığın zirvə nöqtəsi idi. Beləcə, oğlan toyunda dava düşmədi, hamı razı qaldı. Toyananı da AFFA yazdırdı… bütün qonaqların əvəzinə.
Ən əsası isə indi oğlan evi özünü çooox rahat hiss edə bilər.17 yaşlılar arasında Bakıda keçiriləcək Avropa çempionatının final mərhələsinə tam hazırıq. İndi qapılarımız hamının üzünə açıqdı. Kim nə qədər istəsə, U-17-yə vura bilər. Ruslar 5 dənə istədi…
Ətək-ətək pul tökməklə deyil, nəticə olmayandan sonra ev sahibliyi etməyin faydası yoxdu! Heyf xalqın o pullarından ki, indi də U-17-lərin Avropa çempionatına xərclənək. Hesabı isə heç kim sormayacaq.
Həəə, nadir hallarda rast gələrsiniz ki, qız toyu oğlan toyu ilə eyni gündə keçirilsin. Ənənəmizə ziddi. Amma futbolumuzda bu da baş tutdu. Elə Təbriz Həsənovun yetirmələrinə toy tutulan gün qız evində də həzin musiqi sədaları eşidildi. Yox-yox, “Bayıl-Arena”da hələ ki, toy mərasimlərinin təşkili barədə anons verilməyib. Sadəcə, qızlardan ibarət U-17 yığmamıza da toy tutdular. Onların taleyinə macarıstanlı həmyaşıdları acımadı. Bu gün onlar bunu növbəti dəfə təkrarladılar – yenə 3:0-la. Növbə yenə ruslarındı. Təki həmişə toy olsun…
CEYHUN ƏLİYEV