Premyer-liqa
"Qarabağ" "ata mindi"
Topaz Premyer Liqasının 25-ci turu da arxada qaldı. Futbolinfo.az x…
Topaz Premyer Liqasının 25-ci turu da arxada qaldı. Futbolinfo.az xəbər verir ki, finişə 11 tur qalmış “Qarabağ” çempionluğa doğru növbəti addımını atdı. “Qəbələ” ölkə kubokunda bir neçə gün əvvəl darmadağın etdiyi “Zirə”yə boyun əydi. “Xəzər Lənkəran”la “Rəvan” isə “ənənə”lərinə sadiq qaldılar: biri rəqibini Gəncədə, digəri isə paytaxtda sevindrdi…
Çempionatın autsayderi bu dəfə də “İnter”ə məğlub oldu. “Bankirlər” üçün start uğursuz alınsa da, Bəhmən Həsənovun komandasının sevinci cəmi 1 dəqiqə sürdü: Ruslan Tağızadənin qoluna Zurab Xizanişvili cavab verdi. Ümumilikdə isə matçın taleyi ilk 22 dəqiqədə həll olundu. Daha 2 dəfə qol sevinci yaşayan meydan sahibləri aktivlərinə 3 xal yazdırmaq üçün çox əziyyət çəkmədilər.
“Kəpəz”in qələbəsini Turallar təmin etdi. Doğrudu, cənublular fasiləyədək qapılarının toxunulmazlığını qorumağı bacarmışdılar. Amma ikinci hissədə “Kəpəz” status-kvonu təmin etdi və favorit gözlənilən qələbəsini qazandı. Hissənin əvvəlində Tural Nərimanov, matça əlavə olunmuş dəqiqələrdə isə Tural Rzayev komandalarının qələbəsini təmin edən qollara imza atdılar.
“Zirə”nin Qəbələdən qələbəylə dönəcəyini ən optimist fanatları da gözləmirdi. Ölkə kubokunun hər iki ¼ final qarşılaşmasında “Zirə”yə qalib gələn Roman Qriqorçukun yetirmələri bu görüşdə də favorit idilər. Elə oyuna da inamlı başlayan tərəf meydan sahibləri olub. “Qəbələ”nin qolu da özünü çox gözlətməyib. Bir neçə təhlükəli epizod yaradan Qriqorçukun komandası artıq 17-ci dəqiqədə Aleksey Qayın möhtəşəm baş zərbəsi ilə hesabda önə çıxıb. Bundan sonra da oyunu diqtə edən tərəf “Qəbələ” olsa da, meydan sahiblərinə Anar Nəzirov səddini aşmaq bir daha nəsib olmayıb. Əvəzində Nelson Bonilla dünən olduqca inamsız görünən Dmitri Bezotosnını iki dəfə məyus etməklə, “Zirə”yə gümüşə bərabər 3 xalı qazandırıb.
AZAL – “Neftçi” oyununda ən çox diqqətçəkən məqam Nikolos Kanalesin fərqlənməsi oldu. Ölkəmizə 3-cü dönüşündə də Nikonun qolu özünü çox gözlətmədi. Çilili forvardın vurduğu qol həm də olduqca baxımlı alındı. Buna qədər də “Neftçi” qol epizodları yaratmağa nail olsa da, fərqlənən tərəf meydan sahibləri olmuşdu. “Neftçi” qələbəyə daha layiq olsa da, final fiti 1:1-lik bərabərliyi rəsmiləşdirdi.
“Qarabağ” Sumqayıtdan yenə əlidolu qayıtdı. Özü də yenə də “az qanla”. Startda vurulan 2 cavabsız qol cütlüyün taleyini həll etdi. Meydan sahibləri ölkə çempionuna müqavimət göstərməyə çalışdı. Ancaq reallıq budu ki, ifaçıların səviyyə fərqi astronomik olduqda, əzmkarlıqla bunu kompensasiya etmək mümkün olmur.
25 turdan sonra “Qarabağ” 3-cü çempionluğuna doğru inamla irəliləyir. “Qəbələ”nin qızıl medallar uğrunda mübarizədə ağdamlılara məğlub olduğunu dünənki nəticələrdən sonra əminliklə söyləmək olar. “Zirə” isə özü də bildirir ki, Qurban Qurbanovun komandasıyla ayaqlaşmaq iqtidarında deyillər. Doğrudu, “İnter”in də xalı “Qəbələ” qədərdi. 13 xallıq foranı aradan qaldırmaq isə real görünmür. Beləcə, məhz 25-ci turdan sonra “Qarabağ”ın çempionluq yolunda həlledici addımı atdığını söyləmək olar.
CEYHUN ƏLİYEV
- Ölkə futbolu2024-04-11 10:32
AFFA-nın gülməli seçimi: Uğursuz klub rəhbəri Hakimlər Komitəsinə sədr olacaq?
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…