Milli komanda
Mundialda ilk dəfə: əks “qütblər”də qərarlaşan püşk və təqvim
Futzal üzrə yığma komandamızın tarixində ilk dəfə iştira…
Futzal üzrə yığma komandamızın tarixində ilk dəfə iştirak edəcəyi dünya çempionatının final mərhələsindəki rəqibləri müəyyənləşdikdən sonra komandamızın şansları barədə fikir irəli sürmək olar. Avropanın əbədi çempionu İspaniyayla yanaşı, Asiyanın ən güclü komandası – İran və Afrika çempionları Mərakeş yığmaları ilə mübarizə aparacaq futzalçılarımızın püşkdən razı qalmaq üçün əsası yoxdu. Ancaq etiraf etmək lazımdı ki, ilk iki komandadan fərqli, afrikalılar dişimizə görədi. Elə onların FİFA-nın reytinq sıralamasında 34-cü pillədə qərarlaşması bunun əyani sübutudu.
İspaniya barədə hansısa rəy bildirməyə zərurət duymuruq. Dünya reytinq sıralamasında yalnız Braziliyadan geri qalmaları, Avropa çempionatında rəqib tanımamaları qrupun aşkar favoriti barədə hər şeyi deyir.
İrana gəlincə, ilk baxışdan elə də güclü olmadığını düşünənlər yanılır. Qonşu olkənin təmsilçiləri dünya reytinq sıralamasında 5-ci yerdə gedir və bu göstəricidə yığmamızı 5 pillə arxada qoyurlar. Qrup ikinciliyi uğrunda mübarizədə komandamızın əsas rəqibinin İran olacağını da indidən proqnozlaşdırmaq olar.
Təqvim də hələ də baş məşqçinin kimliyinə aydınlıq gətirilməyən təmsilçimiz üçün münasib alınıb. Əvvəlcə, qrupun aşkar autsayderi Mərakeşlə qarşılaşacağıq ki, debüt həyəcanını bu görüşdə tamamilə arxada qoymaq mümkündü. Eyni zamanda, uğurlu nəticə yığmamıza özünəinam hissini artıracaq. Mərakeşi udmağa isə, sadəcə, borcluyuq! Çünki əks təqdirdə, heç Kolumbiyaya getməyinə dəyməz.
Futzalçılarımızın 2-ci oyunu qrupun favoriti – İspaniyaya qarşıdı. Bu da əslində komandamız üçün üstünlükdü. Çünki İranın daim bir qulağı komandamızın oyununda olacaq. Axı, ortada top fərqi məsələsi olacaq ki, son turda heç-heçənin kimə sərf etməsi faktorundan yararlanmaq mümkün olsun. Deməli, komandamız inamlı müdafiə redutları qura bilsə, farslar Mərakeşlə görüşdə tələskənliyə yol verəcək və belədə, nəinki az qol vurmaq, hətta xal itkisinə də məruz qala bilərlər.
Eyni zamanda, son turda hər şeyin öz əlimizdə olacağını da indidən proqnozlaşdırmaq mümkündü. Çünki bütün hallarda İran üzərində qələbə, komandamızın 2-ci pilləni təmin etməsi demək olacaq. Deməli, İranla qarşılaşma bizim üçün finala bərabər olacaq. Bax, həmin matçda futzalçılarımız boyundan hündürə tullana bilsələr, mundialdakı vəzifələrinin öhdəsindən gəlmiş hesab olunacaqlar.
CEYHUN ƏLİYEV
- Milli komanda2024-04-17 12:23
Yığmamızın baş məşqçi postuna isveçrəli namizəd
- Ölkə futbolu2024-04-17 17:17
Kadiri yeni məşqçiyə uyğunlaşır: “Zamana ehtiyacımız var”
- I Liqa2024-04-17 17:34
Apellyasiya Arbitraj Tribunalı AFFA İntizam Komitəsinin qərarını dəyişdi
- Müsahibə2024-04-17 16:07
Sekidika çempionatın səviyyəsindən razıdır: “İstənilən komandanı məğlub etmək olar”