Milli komanda
Makedoniya məğlubiyyəti: real gücümüzün aynası
Millimiz Makedoniya qarşısında da boyun əydi. Andorrayla heç…
Millimiz Makedoniya qarşısında da boyun əydi. Andorrayla heç-heçədən sonra bu qarşılaşmadan üzüağ çıxacaqlarına ümid demək olar ki, yox idi. Çünki reytinq cədvəli nisbi anlayışdı, fakt budu ki, dünənki rəqib azərbaycanlı və qeyri-azərbaycanlılardan qurulmuş futbolçulardan daha sanballıdı. Yəni, “nəyə görə Azərbaycandan aşağı sırada dayanan komandaya məğlub olduq” sualı gündəmdə yoxdu.
Robert Prosineçkinin “mövsümün sonudu, futbolçular yorğundu” açıqlaması da bir qısa cavabla alt-üst olur. Cənab Prosineçki, məgər Makedoniya yığmasının heyətində yer alan futbolçular mövsümü yarılayıblar və indi formalarının zirvə nöqtəsindədilər? Axı, bu yoldaşlar üçün də çempionat yenicə başa çatıb və el diliylə desək, “dilləri ağızlarından çıxır”.
Oyun keyfiyyətinə gəlincə, yenə də tələsməməyə çağırırıq. Bu, Andorrayla olduğu kimi, sadəcə, yoxlama oyunudu. Hər iki görüşdə qalib gəlsəydik, əminəm ki, bu gün yığmanı nəticənin əndrəbadi olmasına görə tənqid atəşinə tutanlar, “rəqiblər yoldaşlıq oyunu olduğu üçün bu qarşılaşmanı ciddiyə almayıb” deyəcəkdilər. Nə isə, kim nə deyir özü bilər, reallıq budu ki, yığmanı yoxlama görüşlərindəki nəticələrə görə sərt ittiham etməyin tərəfdarı deyilik. Söhbət indiki məqamdan gedir ha! Çünki qarşıda hələ 3 aydan da artıq vaxt var. Heç kim deyə bilməz ki, həmin dövr kim daha yaxşı forma yığacaq, kim zədələnəcək, kimin gözlənilmədən babası, nənəsi və ya xalasının ərinin əmisinəvəsinin ögey dayısının oğlu azərbaycanlı olduğu üçün pasport alıb milliləşdiriləcək.
Deməli, indiki məqamda istənilən nəticə heç bir əhəmiyyət kəsb etmir. Sadəcə, xətlərarası əlaqənin yoxlanılması, habelə yeni futbolçuların baxışdan keçməsi baxımından əhəmiyyət kəsb edir ki, bu da həyata keçirilir. Xorvatiyalı məşqçinin “məşər ayağı”na çəkilməli olacağı vaxt dünya çempionatının seçmə qrup mərhələsi oyunları olacaq. Özü də ilk qarşılaşma San-Marinoya qarşı evdə baş tutacaq ki, həmin görüşdə futbolçularımız qələbə qazanmağa məhkumdular.
Qarşıda komandamızı daha bir oyun gözləyir – Kanadaya qarşı. Subyektiv fikrimizdi, həmin matçda da yığmaya yeni dəvət olunan və rəsmi oyunlarda forma geyinmək üçün az şans qazananlar yer almalıdı. Hər halda, milli formada 10, 20, 30 və daha çox oyun keçirmiş futbolçuları ilin-günün bu vaxtında (mövsümün sonudu və uzun marafon qət etmiş ölkəmizin aparıcı oyunçularını nəzərdə tuturuq) Kanadayla oyun onlara heç nə qazandıran deyil. Əksinə, əzələlərinin sıradan çıxmaq ehtimalı olduqca yüksəkdi və istənilən an ciddi zədə alıb uzun müddətə sıradan çıxa bilərlər. Yəqin ki, Prosineçki bu məqamı da nəzərə alacaq. Çünki bu gün Kanadayla görüşdə nəticədən çox, yeni oyunçuların sınanması, təcrübəlilərin isə qorunması vacibdi.
CEYHUN ƏLİYEV
- Ölkə futbolu2024-04-11 10:32
AFFA-nın gülməli seçimi: Uğursuz klub rəhbəri Hakimlər Komitəsinə sədr olacaq?
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…