Ölkə futbolu
“Keçinin buynuzu qaşınanda” və ya hamımız AZƏRBAYCAN üçün!
“Keçinin buynuzu qaşınanda, çobanın çoma…
“Keçinin buynuzu qaşınanda, çobanın çomağına sürtər”. Deyəsən, Moldova “Daçiya”sı öz başına oyun açmaq eşqinə düşüb. Onsuz da Avropa arenalarında qələbə acı olan “Kəpəz” bu oyuna xüsusi motivasiya ilə çıxacaqdı. İndi isə əlavə stimul da yarandı. “Daçiya”nın rəsmi saytı Mərdəkanın erməni soyadına bənzədiyini xüsusi intonasiya ilə vurğulayaraq, 1 milyon qaçqının və 8 milyon yaralının heysiyyatı ilə oynayıb. Rus dilində Mardakyan səslənən Bakı kəndinin erməni adına bənzədiyini bildirən xəbər “Daçiya”ya baha başa gəlməlidi.
Yox-yox, biz qətiyyən hansısa təxribat törədilməsini təklif etmirik. Əksinə, iqtisadiyyatı şərab istehsalından ibarət, paytaxtı “böyük meşə” adlandırılan, qadınları isə Avropanın ən yüngül zərif nümayəndələri sayılan moldovalılara əsl “Bakı cəhənnəmi” yaşatmağı təklif edirik: mədəni, sivil formada.
Axşam saatlarında Avropa Liqasının 1-ci təsnifat mərhələsinin ilk oyunu çərçivəsində keçiriləcək “Kəpəz” – “Daçiya” matçında tribunaları doldurmaq artıq vətəndaş borcuna çevrilib. Mərdəkan əhli də bu aksiyada xüsusi fəallıq göstərməlidi. Moldovalılara bu gözəl kəndin əsl aurasını yaşatmalıyıq. Sən, mən, o, hamımız.
“Kəpəz” də bu məqama həssas yanaşmalı, “Daçiya”nın müdafiə redutlarında daşı daş üstə qoymamalıdı. Baş məşqçi Şahin Diniyevin milli komandamızın “sükanı arxası”nda dayandığı vaxtlarda Finlandiya üzərində 1:0-lıq qələbədən sonra canlı efirdə göz yaşlarını saxlaya bilməməsini xatırlayın. Bu adam millət sevgisi ilə alışıb-yanır. Əminik ki, “Daçiya”nın rəsmi saytında çıxan bu cılız xəbər Diniyevi də qıcıqlandırıb. Məşədi İbad demiş, yıxasan bu moldovalıları yerə, döyəsən ağzına-ağzına. Əlbəttə, məcazi mənada. İnanırıq ki, Gəncə təmsilçisi bu axşam “Mardakyan”da moldovalıları topla ağzına-ağzına döyəcək.
Hamı stadiona! Hamı Mərdəkana! Gəncəlisi də, bakılısı da, yevlaxlısı da! Bu axşam hamının ürəyi bir AZƏRBAYCAN klubu üçün döyünməlidi. Əz onları, “Kəpəz”!
CEYHUN ƏLİYEV