“Kəpəz” bunu bacaracaq! Yetər ki, özləri inansın…

“Kəpəz”. Tarixi ərzində bir dəfə Avropa macəralarında mərhələ adlamayan, amma Azərbaycan futbolunun Məkkəsi sayılan Gəncə təmsilçisi. İstehsalat sarıdan yalnız son illərdə korluq çəkən Gəncə yeni səhifə açmaq iqtidarındadı.

Bakıda “Daçiya” ilə görüşdə qeydə alınan 0:0 ilk baxışdan Moldova təmsilçisi üçün əlverişli olsa da, cütlüyün qalibi baxımından nikbin əhval-ruhiyyəyə zəmin yaradıb.

Təmsilçimizin baş məşqçisi Şahin Diniyevin dönə-dönə təkrar etdiyi “Ərzurum hündürlüyü”nün nə olduğunu bir qədər açaq. Dənizdən 2800 metr hündürlükdə yerləşən bu şəhərdə keçirilən təlim-məşq toplanışı futbolçuların yüklənməsinə hesablanan addımdı. İndi isə dənizdən yarım metr də hündürdə olmayan Azərbaycan. Əlbəttə, oksigen qıtlığı yaşadıqdan sonra futbolçular indi Cənnətə düşüb. Fizioloji və riyazi fərqə diqqət yetirin: hər 2000 metr hündürlük oksigenin normadan 20% aşağı olması deməkdi. Təsəvvür edin, “Kəpəz”in oyunçuları xeyli müddət tam fərqli iqlimdə yükləndikdən sonra bərpa keçmədən döyüşə atıldılar. Riskli idi? Sözsüz! Ancaq başqa çıxış yolu yox idi. Diniyev futbolçuları yalnız Avropa Liqasının 1-ci təsnifat mərhələsi üçün hazırlaya bilməzdi. Çünki qarşıda çempionat da var, proqnozlarımızda yanılmasaq, növbəti avroliqa mərhələsi də. İndi isə tam tonusa düşmək üçün tələb olunan 10 gün artıq arxada qalacaq. “Kəpəz” ilk oyunda 60-65 dəqiqədən sonra yoruldusa, cavab görüşündə bu, 80-85 dəqiqədən sonra baş verəcək. 

Bəs, ilk oyuna əsasən hansı dəlillər nikbin düşüncələrə rəvac verir?

Gəncəlilərin heyətində Serjinyo ilk rəsmi oyununu keçirirdi. Dario Federiko da uzun fasilədən sonra yenidən yaşıl meydanlara çıxmışdı. Gənc Vüqar Bəybalayev ansabla uyğunlaşmaqda çətinlik çəksə də, sərgilədiyi futbolla moldovalıları çaş-baş salmışdı. Julian Ebah da mərkəz yarımmüdafiəçiləri ilə hələ normal anlaşa bilmirdi. Ancaq bütün bunlara baxmayaraq, gəncəlilər bu oyundan 3-4 top fərqiylə qalib ayrılsaydılar da, bu, təəccüblü olmayacaqdı. Çünki komandamızın əldə etdiyi qol imkanlarını hesablamaq üçün bir əlin barmaqları yetməz. Formada olmayan, anlaşma idealdan xeyli uzaq, iqlim dəyişikliyindən sonra adaptasiya üçün zaman qıtlığı yaşayan komanda bu cür oynamışdısa, bu problemlər qismən aradan qalxdıqdan sonra onlara necə favorit deməyək?

Dəlillər kifayət qədərdi. İndi əsas yük Diniyevin üzərinə düşəcək. Komandanı psixoloji cəhətdən hazırlamaq ən çətin məqamdı. Çünki heyətdə xeyli sayda gənc oyunçular var. Qarşılaşmanın müəyyən dəqiqələrində onlar özlərini itirə bilərlər. Bu isə acı fəsad verə bilər.

Hesabda önə keçsək, rəqib mütləq təxribata əl atacaq. Adlan Şişxanovun komandasından bundan artığını gözləməyə dəyməz. Və yenə də gənc futbolçularımız hansısa lazım olmayan hərəkətə uol verməklə, “Kəpəz”ə acı anlar yaşada bilərlər. Götürək elə Kərim Diniyevlə inquş prezidentin arasında yaşanmış münaqişəni. Şahin Diniyev təcrübəli mütəxəssisdi. Ancaq onun üzərinə düşən iş həqiqətən çoxdu. Bunu klub rəhbərliyi də dərk etməli və mütəxəssisin yanında olmalı, ona dəstək verməli, futbolçuları ruhlandırmalıdı. 

Cavab oyununda müdafiəyə çəkilmək komandamıza baha başa gələ bilər. Bəli, rəqib daha böyük qüvvəylə irəli atılmağa çalışacaq. Ancaq Darionun matçın sonundakı reydini yada salsanız, yetər ki, moldovalıların ipini yığmaq yolunu görəsiniz. “Sarı-göylər” mərkəzdə aqressiv oynayıb, rəqibi daha çox müdafiə haqda düşünməyə vadar edə bilsə, “Daçiya”nın oyunun ilk 5-10 dəqiqəsindən sonra ümidini matçsonrası penaltiyə bağlayacağına zəmin yaratmaq mümkündü. Topa nəzarət etmək, meydan sahiblərinin əsəbləri ilə oynamaq deməkdi. Moldovalılar topla düz-əməlli davrana bilmirdi, topsuz qalsalar, tamam başlarını itirəcəklər.

“Kəpəz” bu yükün altından çıxa bilər. “Kəpəz” “Daçiya”nı evində döyüb qayıda bilər. “Kəpəz” tarixində ilk dəfə mərhələ adlaya bilər. “Kəpəz” bunu bacaracaq… yetər ki, özləri buna inansın. 

CEYHUN ƏLİYEV