Qriqorçuk: "Qisas baş tutubsa, lap əla!"

Avropa Liqasının 3-cü təsnifat mərhələsinin cavab qarşılaşması çərçivəsində Fransa "Lill"ini 1:0 hesabıyla məğlub edərək, yarışdan kənarlaşdıran "Qəbələ"nin baş məşqçisi Roman Qriqorçuk mətbuat konfransı keçirib. Futbolinfo.az xəbər verir ki, ukraynalı mütəxəssis tarixi zəfəri Cavid Hüseynova həsr etdiklərini bildirib.

– Bu cür qələbəni qeyd etdiyinizi görməmişdik…
– Bu oyun həqiqətən xüsusi idi. Cavid Hüseynovu çox sevirik. Qələbəni ona həsr edirik. İkinci məqam stadiondakı atmosferin olduqca isti olduğunu gördüm. Sanki hər azarkeşin gözünü görürdüm. Bu, tarixi hadisədi. 15-20 ildən sonra da bu qələbəni unutmayacağıq. Sevincimi gizlətməyə əsas görmürdüm. Bu, Azərbaycan futbolunun imicinə müsbət təsir göstərir.

– Fransa futbol tarixində Azərbaycan yığması özünəməxsus rekordçudu. Fransızlar tarixinin ən böyükhesablı qələbəsi məhz yığmamız üzərində baş verib. Bu gün qisas baş tutdu.
– Açığı, bundan xəbərsiz idim. Ancaq bunu bilsəydim də, oyunumuza təsir edə bilməzdi. Çünki bütün diqqətimizi oyuna yönəltmişdik. Qisas baş tutubsa, lap əla!

– Bu gün "Qəbələ" fantastik futbol sərgilədi. Amma ölkə çempionatındakı limiti nəzərə alsaq, bu heyətlə çıxış edə bilməyəcəksiniz. Sizə elə gəlmir ki, limitə yenidən baxılmalıdı?
– Qısaca, belə cavab verəcəm. Həmişə bir fikirdə olmuşam: limit ümumiyyətlə, olmamalıdı. İnanın, belədə, hətta klublarımız qənaət də edəcək. Meydanda ən güclülər, ən layiqlilər olmalıdı. Seçim süniləşməməlidi, təbii olmalıdı.

– Cəmi bir əvəzetməyə əl atdınız. O da məcburiyyətdən. Futbolçularınızın hər birindən razı idiniz?
– Hətta deyərdim ki, işlək mexanizmdən tam razı idim. Əvəzetmə bu mexanizmin işləməsinə mənfi təsir göstərə bilərdi.

– Hakimlə yamanca tutaşmışdınız…
– Bəli, bu cür hal yaşandı, amma ümumilikdə idarəetmədən razı qaldım. Deyərdim "Lill"ə qarşı ilk oyundakı polşalı hakimlər briqadasından çox narazı qalmışdım.

CEYHUN ƏLİYEV