Ölkə futbolu
Asif Bağırov: "Qarabağ" niyə pul itirməlidir?"
Avrokuboklarda növbəti teleoyun başlayıb. "Qarabağ"…
Avrokuboklarda növbəti teleoyun başlayıb. "Qarabağ" "Höteborq"la hələ cümə axşamı oynayacaqsa, matçın ekrana gətirilməyəcəyi ilə bağlı xəbər-bəyanat artıq əcəblərimizlə rəqs etməyə başlayıb.
Əvvəla, "CBC Sport"un bu barədə bəyanat yayıb, ortaya düşməsi çox müəmmalıdı. Çünki avrokubok matçları onların boynuna biçilməyib. Əgər oyun göstərilməyəcəksə, bütün telekanallar, xüsusilə də idmanın təbliğatı üçün milyonlar üyüdən "İdman Azərbaycan" qınaq obyekti olacaqdı. Lakin "CBC Sport" qabağa düşdüsə, deməli, nəsə başqa səbəblər var. Ola bilsin, bu mövsüm bütün matçları bu kanaldan izlədiyimizdən telekanal məsuliyyətini bilərək irəli düşüb. O da ola bilər ki, əvvəlki qarşılaşmalarda aldığı güzəştlərdən sonra Volkan Üstün komandası diqqətlərin üzərlərində olduğunu bilərək qabaqdangəlmişlik edir.
Lakin "Qarabağ"ı suçlamaq nə dərəcədə doğrudu? Tərəflərin fikirlərinə yer vermişik, amma problemin kimdən qaynaqlandığı hələ də açıq qalır. Belədə mütəxəssis rəyinə, bu işlərdə səriştəsi olan birinin fikirlərinə ehtiyac var. Biz də ANS-də oxşar təcrübəni keçmiş tanınan teleaparıcı Asif Bağırova müraciət etdik:
"Bu məsələyə iki prizmadan baxmaq lazımdır. Yayım hüququ hansısa şirkətdədir və ya klubdadır? Əvvəlcə birinci varianta baxaq. Bu vəziyyətdə danışıqlar birbaşa həmin şirkətlə aparılmalıdır. Çempionlar Liqası və Avropa Liqasının oyunlarının yayım hüquqlarının əldə edilməsi buna adi misaldır. Şirkət həmin yarışın yayım hüququnun əldə edilməsi üçün televiziyalara tender təklifi göndərir. Hüququ əldə etmək istəyən TV-lər öz təkliflərini şirkətə göndərirlər. Bu cür böyük miqyaslı layihənin (3 mövsümlük) həyata keçirilməsi uzun məsələ olduğundan danışıqlar aylarla davam edir. Yekunda ən çox pul təklif etmiş televiziya 3 mövsüm ərzində yayıma sahib olub. Bu tenderdən əldə olunan gəlirə əsasən klublara bonuslar verilir. Bonusun miqdarı isə komandaların keçirdiyi oyunların sayından və adladığı mərhələlərdən asılı olur.
Təkli oyunlarda yayım hüququ meydan sahiblərində olur. Bu hüququ klub özü istədiyi kanala satmaq hüququnda sərbəstdir. Odur ki, bu hüququ əldə etmək istəyən TV nə buradakı kluba müraciət eləməlidir, nə oradakı telekanallara. Birbaşa yayım hüququ əldə etmək istədiyi klubla danışıqlar aparmalıdı. Odur ki, "CBC Sport"un "Qarabağ"dan nə iləsə bağlı müqavilə istəməsi qəribə gəlir. O müqavilə nəyi nəzərdə tutur? "CBC Sport" burdakı oyunu göstərmək istəyirsə, "Qarabağ"la, İsveçdəki oyunu yayımlamaq istəyirsə, "Höteborqla" danışmalıdı. Nə AFFA ilə, nə PFL-lə, nə ATƏT-lə nə də BMT ilə. Bəlkə "CBC Sport" bu müqavilə ilə yayım hüququnu ələ keçirib İsveç televiziyasına satmaq istəyir? Bəs, onda "Qarabağ" niyə pul itirməlidir? Və yaxud bəlkə başqa TV sponsor tapıb bu yayımı əldə edəcək?"
Fikrimizcə, məsələ aydınlaşır. "CBC Sport" sadəcə, səs-küy salıb azarkeşlərinin önündə hörmət qazanmaq, "Qarabağ"ı gözdən salmaq istəyir. Telekanal ağdamlılara ev oyununa görə pul vermək istəməməsi bir yana, matçın isveçlilərə satılmasında da maraqlıdı. Ən azı səfər oyunu üçün ödəniş etmək istəməyib barter variantına cəhd edirlər.
AĞA