Ölkə futbolu
San-Marinoya getmək üçün… Finalçılar bəlli oldu
Meydanda qan töküldü. Meydanda “razborka” g…
Meydanda qan töküldü. Meydanda “razborka” getdi. Meydanda vərəqlər paylandı. Meydanda penaltilər seriyası oldu. Meydanda əsl kişi mübarizəsi yaşandı. Meydandan qalib ayrılanlar isə… MFL “San-Marino Kuboku”nun finalçıları dünən saat 23:30-da məlum oldu.
İlk olaraq Bakı Olimpiya Kompleksinin süni örtüklü meydançasına “AzFar” və “Sparta Baku” komandaları çıxdı. Tərəflər ilk dəqiqələrdən amansız mübarizəyə start verdi. Sürüşmə fəndləri, hər topa baş qoyan ilk yarımfinalçılar San-Marinoya getmək uğrunda həlledici görüşdə oynamaq üçün dəridən-qabıqdan çıxdılar. İlk yarıda “Sparta Baku” daha xoş təsir bağışlayırdı. Bir neçə dəfə əla reydlərdən sonra “AzFar” yalnız bəxt hesabına qapısında qol görmədi. Elə uzaq məsafədən endirilən zərbələr də kifayət qədər təhlükəli alınırdı. Amma gah qapıçı, gah da qapı tiri torun silkələnməsinin qarşısını alırdı.
“Vurmayana vurarlar” deyimi özünü ilk 20 dəqiqənin sonlarında göstərdi. Sürətli əks-hücumdan sonra “AzFar” hesabda önə keçdi.
İkinci hissədə “spartaçılar”ın “yanacağ”ı tükəndi. Bu da təsadüfi deyil. ¼ finalda iki oyunçusunun qırmızı vərəqə alması dünənki qarşılaşmada cəmi 1 əvəzedici oyunçularının olmasını şərtləndirmişdi. Elə bunun nəticəsi idi ki, irəli atılmağa istək olsa da, “motor” dartmırdı. “AzFar” da məhz bunu gözləyirdi. Rəqib açılır, geri qayıtmağa isə taqəti yoxdu. Bir neçə kəsərli əks-hücum və qalib haqda sual gündəmdən çıxır: “AzFar” 3:0 hesablı qələbə qazanaraq, turnirin ilk finalçısı olur.
İtalyanların adı da bəs edir ki, “katenaçço” yada düşsün. İkinci yarımfinalçılardan biri də məhz “çəkmələr ölkəsi”nin təmsilçisinin adını daşırıdı – “Yuventus”. “Qoca sinyora”nın rəqibi isə “OlimpikStar” idi. “İtalyanlar” ilk dəqiqələrdən oyunu müdafiədən quraraq, ümidlərini əks-hücumlara bağlamışdılar. Ancaq bu da “OlimpikStar”ın hücumlarının kəsərini azaltmırdı. Aramsız hücumlar, çoxsaylı zərbələr bir-birini əvəzləyirdi. Yalnız qolkiperin inanılmaz qurtarışları “Yuve”nin qapısının torunun silkələnməsini əngəlləyirdi.
Fasilədən sonra da ərazi üstünlüyü “ulduzlar”ın ərəfində idi. Ancaq hiss olunurdu ki, gücləri tükənmək üzrədi. Elə hər ötən dəqiqə də əsəbləri tarıma çəkirdi. Bunun nəticəsi idi ki, oyunun ortalarında tərəflər “nələrisə bölüşdürə bilmədilər” və oyun bir neçə dəqiqəlik dayandırıldı. Məhəllə futbolunun ayrılmaz hissəsi olan “razborka” 4-5 dəqiqəyə səngidi. Təşkilatçılar aranı sakitləşdirdi və mübarizə davam etdi. Az sonra “OlimpikStar”ın oyunçusunun başı yarıldı. Özü də mövqe seçimi uğrunda mübarizə zamanı, top künc zərbəsindən oyuna daxil edilərkən.
Matçın son dəqiqələrində “Yuve” “dişlərini qıcımağa” başladı. Bu da yuxarıda göstərdiyimiz məqamdan qaynaqlanırdı. Oyunun böyük hissəsini hücumlarda keçirən “OlimpikStar”ın üzvləri yorulmuşdu və rəqib də bundan məharətlə yararlanmağa başlamışdı. Lakin 40 dəqiqə ərzində qapılara qol vurulmadı.
Əsasnaməyə görə, pley-offda əlavə vaxt olmadığından, qapılara matçsonrası penalti zərbələri təyin edildi. Bu seriyada “italyanlar” səhvə yol vermədi. “Ulduzlar” isə zərbələrin birində “yandırdılar”. Beləliklə, penalti seriyasında 5:4 qalib gələn “Yuventus” finalda “AzFar”ın rəqibi olacaq.
CEYHUN ƏLİYEV