Ölkə futbolu
Açılış oyunu: qol vuran qalib gələcək
Sabah Topaz Premyer Liqasında fasilə bitəcək. Milli komandaların …
Sabah Topaz Premyer Liqasında fasilə bitəcək. Milli komandaların oyunlarına görə yaranan fasilədən sonra klublar IV tura start verəcək.
9 sentyabr (cümə)
18:30. “Qarabağ” – AZAL
Hakimlər: ORXAN MƏMMƏDOV, Yaşar Abbasov, İsgəndər Əliyev, Vüqar Bayramov.
Əlavə köməkçi hakimlər: Əliyar Ağayev, Fariz Yusifov.
AFFA nümayəndəsi: Sakin Məmmədzadə.
Hakim-inspektor: Məlik Həsənov.
“Əlincə Arena” (13000 yerlik).
Avropa Liqasının qrup oyunları öncəsi “Qarabağ” xal ehtiyatını artırmaq istəyir. Çempionluğu heç kimə güzəşt etmək istəməyən ağdamlılar məhz AZAL kimi komandalarla görüşlərdə büdrəməməklə hədəfinə irəliləməlidi.
“Təyyarəçilər” hələlik 1 xal toplayıb. Ötən övsüm də komanda çempionata zəif start vermiş, sonra sürəti artırmışdı. İndi necə olacağını demək olmur. Ancaq faktdı ki, Tərlan Əhmədovun yetirmələri yenə sonuncu pilləyə əsas namizədlərdəndi. Sabahkı oyunda onların çempionu büdrətmək ehtimalı olduqca azdı.
STATİSTİKA: 30 oyun, +18=6-6, top fərqi – 41:25
ÖTƏN MÖVSÜM…
23.08.2015. AZAL – Qarabağ 0:2
31.10.2015. Qarabağ – AZAL 2:0
31.01.2016. AZAL – Qarabağ 1:0
20.05.2016. Qarabağ – AZAL 3:0
OYUNDAN NOTLAR
• “Qarabağ”ın heyətində cəzalı futbolçu yoxdu, fərdi məşq edən Bədavi Hüseynov isə zədə üzündən kənarda qalacaq.
• Millinin düşərgəsindən qayıdan bosniyalı qapıçı İbrahim Şehiç cox güman ki, ehtiyatda qalacaq, onu yeni transfer Boyan Şaranov əvəz edəcək.
• Ruslan Nəsirli xəstəlik, Taqim Novruzov zədə üzündən AZAL-a kömək edə bilməyəcək.
• Kiçik zədəsi olan Nuqzar Kvrityanın durumu sual altındadı.
• Ramazan Abbasov bu matç öncəsi “təyyarəçilər”dən ayrılıbsa, komandanın iranlı yeni transferləri – müdafiəçi Hüseyn Kamelqolamitusi və yarımmüdafiəçi Aşkan Fərzai debüt edəcək.
• Komandaların son 10 oyununun 7-də tərəflərdən yalnız biri qol vurub, son 3 qarşılaşmada meydan sahibi “quru” hesablı qələbə qazanıb.
• “Qarabağ” son 5 ev oyununda xal itirməyib, son 10 oyunda 9 dəfə qalib gəlib.
REFERİ
Orxan Məmmədov ötən çempionatda həm “Qarabağ”ın, həm də AZAL-ın 4 oyununda söz sahibi olub. Təcrübəli referinin ağdamlılar üçün düşərli olduğunu söyləyə bilərik: 3 qələbə, 1 bərabərlik. Ağdamlılar çempionluğu da onun idarə etdiyi, “Zirə”nin ilk ev məğlubiyyətini aldığı görüşdə bayram etmişdi. AZAL isə bu referinin idarə etdiyi matçlarda yalnız bir qol görüb: birində təyin edilən penalti ilə qələbəni bayram edibsə, 3-də uduzub.
FƏRİD