Ölkə futbolu
Sadıq Sadıqov hərəkətə keçdi
Maraqlı ssenaridi. Oxşar metodlar, keçilmiş yolla gəzişmə…
Maraqlı ssenaridi. Oxşar metodlar, keçilmiş yolla gəzişmələr.
"Neftçi"nin düşdüyü durum ortadadı. Yanlış idarəetmə üzündən dizə çökmüş klub idarəolunmaz vəziyyətdədi. Və bu, kimlərinsə işinə yarayır. Qisas almaq istəyənlər, yenidən kluba dönməyə çalışanlar fürsəti qaçırmadı.
Öncə “Neftçi”nin sabiq qapıçısı Saşa Stamenkoviç klubun hazırkı rəhbərliyini, Müşahidə Şurasını istefaya çağırdı. Serb qapıçı "feysbuk"da yer alan “Neftchi Baku [Fan Page]" səhifəsinə göndərdiyi müraciətdə “ağ-qaralar”ın hazırkı rəhbərliyinə qarşı ittihamlar irəli sürdü:
– “Neftçi”nin azarkeşi və 4 il klubun formasını geymiş biri kimi hazırkı rəhbərliyi, Müşahidə Şurasını tam heyətlə istefaya çağırıram. Azərbaycanın ən böyük klubunu daha biabır etmək olmaz. Sizin şəxsi maraqlarınız, pul böldüyünüz futbolçuları mühafizə etməyiniz…bunu mənə də təklif etmişdiniz. Haqqım olan pulun yarısını ödəmək, yarısını isə cibinizə qoymaq istəyirdiniz.
Azarkeşlər Elnura (Elnur Məmmədov nəzərdə tutulur – red.) rejissor kimi və Çingizə (Çingiz Abdullayev nəzərdə tutulur – red.) yazıçı kimi “Neftçi”ni necə məhv etmələri barədə kitab buraxmağa icazə verməyəcəklər.
Keçmişə qayıdaraq bizi – 12 legioneri niyə klubdan göndərdiyinizi soruşmaq istəmirəm. Bəlkə ona görə ki, bizi kluba cənab Sadıqov (Sadıq Sadıqov nəzərdə tutulur – red.) gətirmişdi və biz “Neftçi”nin tarixindəki ən yaxşı heyət olmuşuq. Biz hazırda başqa klublardayıq. Yeni uğurlar əldə edirik və sizləri bağışlamışıq. Amma qorxuram ki, azarkeşlər sizi heç vaxt bağışlamayalar.
Oyunçular, məşqçilər günahkar deyillər. Günahkar sizin futboldakı biliksizliyinizdir. Ona görə də “Neftçi”ni məhv etməmək üçün gedin. “Neftçi”yə eşq olsun.
Ardınca komandanın sabiq kapitanı Flavinyo da dilə gəldi. Braziliyalı yarımmüdafiəçi də sosial şəbəkə vasitəsilə “Neftçi” rəhbərliyini tənqid etdi:
– Beş il ərzində 3 dəfə ölkə çempionu olduq, 2 dəfə kuboku qazandıq. Avropa Liqasının qrup mərhələsinə adlayan ilk Azərbaycan klubu kimi tarixə düşdük. 2 dəfə ilin, 3 dəfə ayın ən yaxşı oyunçusu seçildim, 38 qol vurdum… İndi isə onlar “Neftçi”nin tarixini məhv edirlər.
Maraqlıdı, deyilmi? Siz bu açıqlamalardan "Neftçi"nin sabiq prezidenti Sadıq Sadıqovun ruhunu hiss etmirsizmi? Onun komandası iqtidara qayıtmaq üçün əməli işə keçib. Yəqin futbolçu döyənlər, jurnalist hədələyənlər, cərimə meydançası kənarındakı qayda pozuntusunu penaltiyə çevirtdirən məmurlar da tezliklə danışacaq.