Ölkə futbolu
“Roma”ya bənzəyən MOİK və təhqir olunan “Şahdağ” futbolçuları
Yenə Bayıl, yenə 1-ci divizion… “Bayıl Arena”ya tez-…
Yenə Bayıl, yenə 1-ci divizion… “Bayıl Arena”ya tez-tez getməyim heç də bu stadionda olan sevgimdən irəli gəlmir. Sadəcə, adı çəkilən stadionda 4 komanda məskunlaşdığından hər tur hansısa maraqlı oyuna şahidlik etmək mümkündü. Bəzən isə yeganə seçim “Bayıl Arena” olur.
Bu dəfə Bayıla gediş səbəbim MOİK və “Şahdağ” idi. 5-ci dəqiqəsinə çatdığım matçda meydandakı komandaların formasına nəzər saldıqda bir anlıq mənə elə gəldi ki, komandalardan biri “Roma”dı. Bu bənzətmənin sərgilənən oyuna aidiyyatı yox idi. Sadəcə, “hərbiçilər”in geyindiyi forma romalılarınkına çox bənzəyirdi.
Qonaqların cüzi üstünlüyü ilə keçən ilk yarıda heç kim onların fasiləyə darmadağınla yollanacağını zənn edə bilməzdi. Amma hissənin ortalarından etibarən üstünlüyü ələ alan bakılılar 38-45-ci dəqiqələr aralığında rəqibini 3 dəfə məyus edərək, oyunun taleyini müəyyənləşdirdi. Komandalar fasiləyə elə bu hesabla da yollandı.
Buraxılan qolların şokundan ayılmayan Qusar futbolçularını görünür, 4-cü hakim Kərim Kərimovun da fiti ayıltmamışdı. Əbəs yerə deyil ki, soyunub-geyinmə otağına aparan koridorda referinin fasilənin başa çatdığı fiti səslənsə də, MOİK futbolçularından fərqli, qonaqlar otaqlarından çıxmaq bilmirdi ki, bilmirdi. Hətta Kərimov buna görə fitini bir neçə dəfə səsləndirməklə yanaşı, onların olduğu soynub-geyinmə otağının qapısını da döydü. Yalnız bundan sonra “Şahdağ” futbolçuları ayıldı.
Koridorla meydançaya tərəf gedən oyunçuları isə komandanı Qusar futbolunun ağsaqqallarından olan Kamran Əlibabayev qarşıladı. Amma o, gənc oyunçulara qarşı özünü ağsaqqal kimi aparmadı. Əlibabayev futbolçuları nifrət dolu baxışlarla süzüb, onları təhqir etdi, dodağının altında xeyli mızıldandı. Hətta Kamran bəy o qədər əsəbi görünürdü ki, imkanı olsaydı, futbolçulara bir-iki qapaz da çəkərdi. O, futbolçularına bir şey etməsə də, həmyerlilərinin meydanda “kötəklənməsi” fasilədən sonra da davam etdi.
Qarşılıqlı hücumlar şəraitində keçən ikinci hissədə ən yaddaqalan məqam şimallıların afrikalı legionerlərinin döyüşə atılması oldu. Əvvəlcə meydana az qala dünya mətbuatında yaşı müzakirə olunan Viktor Emenayo çıxdı. Nigeriyalı hücumçu oyunda olduğu müddətdə heç nə ilə yadda qaldı. Elə onun həmyerlisi Uçe Çukunyere də əlahiddə bir şeylə fərqlənmədi.
Əvəzində meydan sahibləri fərqləndi. Özü də 3 dəfə… Yenə də hissənin son dəqiqələrində 3 qol vuran Müşfiq Qənbərovun yetirmələri “Şahdağ”a dağ çəkdi – 6:0.
ELMAR ABDULLA-ZADƏ
- Ölkə futbolu2024-04-11 10:32
AFFA-nın gülməli seçimi: Uğursuz klub rəhbəri Hakimlər Komitəsinə sədr olacaq?
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…