Hərəyə 1 qol, hərəyə 1 xal

Premyer Liqanın 8-ci turu sensasiyasız start götürdü. Mərkəzi qarşılaşmada üz-üzə gələn “İnter” və “Qəbələ”nin duelində qalib müəyyənləşmədi. Əvvəlcədən proqnozlaşdırdığımız kimi, tərəflər hərəyə bir xal qazandı.

Roman Qriqorçuk milli komandanın oyunlarında xeyli yüklənməyə məruz qalmış Ruslan Qurbanova istirahət verməklə, vingeri “Sent-Etyen”lə oyuna qorumağı qərara almışdı. 

“Bankirlər”in çalışdırıcısı Zaur Svanadzenin isə “2-ci cəbhə” qayğısı olmadığı üçün Ağabala Ramazanova analoji istirahəti verməmişdi. 

Ümumilikdə oyun şən məcrada davam etdi. Tərəflər yüksək tempdə futbol sərgiləyərək, tribunalara toplaşan azarkeşləri məyus etmədilər. Qol epizodları hər iki komandanın qapısı ağzında yaşansa da, bu yöndə meydan sahibləri daha üstün görünürdülər. Bəli, topa nəzarət “qırmızı-qaralar”ın tərəfində idi, ancaq Svanadzenin yetirmələrinin hücumları daha kəsərli alınırdı.

Fasilədə Qriqorçuk Sergey Zenyov və Murad Musayevi müvafiq olaraq, Vitali Vernidub və Roman Hüseynovun əvəzinə döyüşə atdı. Hər iki əvəzetmənin məntiqi səbəbi var idi: estoniyalı futbolçu baş məşqçinin istəyinə uyğun olaraq, tablodakı “0”-ları komandasının xeyrinə dəyişməli, Musayev isə ilk yarıda hava mübarizələrində meydan sahiblərinə uduzan komanda yoldaşlarının bu komponentdəki qüsurunu aradan qaldırmalı idi.

Ancaq Qriqorçukun bu əvəzetmələri əks-effekt verdi və fasilədən cəmi 3 dəqiqə sonra Ağabala Dmitri Bezotosnının “quru” seriyasını “dəfn” etdi. Ukraynalı kiper 858 dəqiqədən sonra ölkə daxilində topu tordan çıxarmalı oldu. O, “ağ bayrağ”ı Rauf Əliyevin sol ayağıyla endirdiyi zərbəni dəf etdikdən sonra qaldırmalı oldu. Topa hamıdan tez yetişən Ramazanov hesabı açdı. 

Maraqlıdı ki, bu qol “İnter”i daha çox həyəcanlandırdı. “Bankirlər” qapılarına sıxıldı və “Qəbələ” üçün mərkəzi hədiyyə etdillər. Teo Uiks, Asif Məmmədov, Filip Ozobiç, Rəşad Sadiqov kimi futbolçular üçün bundan gözəl hədiyyə ola bilməzdi. Lakin 62-ci dəqiqədə qonaqların kapitanı sıradan çıxdı. Süni örtüklü meydan “öz sözünü dedi”. Arxa bud əzələsini dartan Sadiqov komandasının 3-cü əvəzetməsini şərtləndirdi. Qriqorçuk son kozır qismində Ruslan Qurbanovu döyüşə atdı. Milli futbolçu özünə xas olmayan mərkəz yarımmüdafiəçisi mövqeyində qərarlaşdı. Ancaq bundan cəmi 7 dəqiqə sonra Asifdən əla ötürmə alan Ozobiç Səlahətlə təkbətək qaldı. Müdafiəçilərin əhatəsində yerə sərilən yarımmüdafiəçi penalti gözlədiyi anda, top Zenyovun önünə düşdü. Slavik Alxasovun “fil qulağında yatması”ndan yararlanan Sergey asanlıqla topu tora qovuşdurdu – 1:1.

“İnter” 80-ci dəqiqədə yenidən hesabda önə çıxmaq şansı əldə etdi. Özü də yenə də fərqlənmək şansını Ağabala Ramazanov əldə etdi. Lakin yarımmüdafiəçi Bezotosnıyla təkbətək qaldığı epizodda zərbə endirmək əvəzinə qolkiperə bir qədər də yaxınlaşdı və bucaq azaldıqdan sonra topu düz ukraynalının üstünə vurdu.

Matçın son 5 dəqiqəsini “Qəbələ” azlıqda keçirməli oldu. Yox-yox, Rəvan Həmzəzadə heç kimi meydandan qovmadı. Sadəcə, Baqali Dabo da arxa bud əzələsini dartdığı üçün meydanı tərk etməli oldu. Əvəzetmə limiti dolduğunudan “Qəbələ” son 4-5 dəqiqəni azlıqda keçirməli oldu.

İki əsas heyət oyunçusunu itirən Qriqorçuk məhz bu səbəbdən matçsonrası mətbuat konfransında “od püskürürdü”. Axı, onun komandasını qarşıdan Avropa Liqasının qrup mərhələsi çərçivəsində Fransada “Sent-Etyen”ə qarşı ciddi sınaq gözləyir və hər iki futbolçu bu matçda forma geyinə bilməyəcək.

Oyunun nəticəsinə gəlincə, qeyd etməliyik ki, ədalətli hesabın qeydə alınmasının şahidi olduq. Nəticə etibarı ilə hər iki tərəf məmnum olsa da, turnir cədvəlində bir qədər sıxlıq yarandı. “Qarabağ”ın “Sumqayıt”ı üstələməsi ölkə çempionunun “İnter”ə çatmasını şərtləndirdi.

CEYHUN ƏLİYEV