“Qəbələ”nin “qara bazar”ı

“Qəbələ” çox çalışsa da, “qara bazar”la mübarizədə gücsüzdü. Klub bilet alverçiləri ilə heç cür bacarmır.

Metronun “Xalqlar dostluğu” stansiyasından “Bakcell Arena”ya kimi təqribən 10 dəqiqəlik piyada yolu var. “Qəbələ” – “Sent Etyen” oyununa da bu “marşrut”la getmək lazım gəldi. Və yol boyu gördüklərim yalnız təəssüf hissi yaratdı.

İşbazlarla yolum hələ metronun pilləkənlərində toqquşdu. Bir neçə nəfər əlində dəstə ilə bilet tutaraq stadiona gedənlərə təklif edirdi. Arenaya çatana kimi daha bir neçə yerdə belə “məntəqə”yə rast gəldim. Hətta 10 manatlıq biletləri 80 faiz endirimlə təklif edənlər də var idi, yarı qiymətinə satmaq istəyənlər də.

Təbii ki, bundan klubdakıların xəbəri ola bilməzdi. Heç kim öz məhsulunu dəyər-dəyməzinə satmaq istəməz, tribunaları doldurmaq istəyən elə qiymət qoyar ki, hamı rahatca bilet alıb matça gələr. 10 manatlıq bilet daha ucuz təklif olunursa, deməli, kimsə onu müftə ələ keçirib və istənilən qiymətə satıb 5-10 manat irəli düşmək istəyir.

“Qara bazar” nümayəndələrinin bəzilərini danışdırıb müəyyən bilgi ala bildik. Məlum oldu ki, klub rəhbərliyi bir sıra qurumlara, “Qəbələ”nin himayədarlarına məxsus olan idarə və təşkilatlara bilet paylayıb. Yəqin ki, pul həmin qurumlardan alınıb və tribunalar dolsun deyə, işçilərə havayı paylanılıb. Lakin biletlər ya həvalə olunan şəxslər tərəfindən işçilərə verilməyib, ya da onlar özü bundan imtina edib. Belədə əlində bilet olan həmin məsul şəxslər biletləri dəyər-dəyməzinə bir qrup şəxslərə satıb və ya qohumuna, qonşusuna bağışlayıb. Həmin adamlar isə havayı başa gələn biletləri futbol azarkeşlərinə satmaqla məşğuldu. Vaxtlnda bilet almayanlar kassalara çatana kimi daha ucuza təklif edən “məhsul”dan imtina etməyincə belə işbazların da cibi dolur. Bunu söhbət etdiyimiz bir neçə alverçi özü etiraf etdi.

AĞA