Ölkə futbolu
1 səhvin 3 qurbanı: AFFA Rəhim Həsənovu günahsız saydı
AFFA Hakimlər Komitəsi Topaz Premyer Liqasının 11-ci turundakı s?…
AFFA Hakimlər Komitəsi Topaz Premyer Liqasının 11-ci turundakı səhvlərlə bağlı tədbir görüb. Daha doğrusu, hakim səhvləriylə bol olan tura görə günahkarlar cəzasını alıb.
Futbolinfo.az saytının əldə etdiyi məlumata görə, "Neftçi" – "İnter" qarşılaşmasındakı penalti epizodu 3 nəfəri "yandırıb". Zurab Xizanişvilinin əlinə dəyən topa görə cərimə meydançası kənarındakı qayda pozuntusunun "penaltiyə çevrilməsinin" günahkarları müxtəlif müddətə cəzalandırılıb.
Əslində, bütün hadisələrin səbəbkarı Rauf Cabbarov olub. Qapı arxasında köməkçi hakim kimi dayanan referi israrla penalti olduğunu deyib və baş hakim Rəvan Həmzəzadə də ona inanıb. Halbuki ilk öncə o, başqa qərar vermişdi, yalnız qulaqcıqla verilən əlavə informasiyadan sonra ağ nöqtəni göstərib. İstənilən halda, baş hakin kimi günahkar Həmzəzadə sayılır və o da cəzasını alıb.
Bu epizodda baş hakimə kömək etmək vəzifəsi əsasən Elman Musayevin vəzifə borcu idi. Çünki yan xətt hakimi kimi məhz o, qayda pozuntusunun cərimə meydançası daxilində, yoxsa kənarında olduğunu müəyyən etməliydi. Lakin Həmzəzadə Musayevdən heç bir yardım görməyib.
Hadisələri dramatikləşdirən və heç nədən olay çıxaran Cabbarovun cəzası daha məntiqlidi. O, faktiki olaraq, özünə dəxli olmayan məsələyə burun soxub. Epizod FİFA referisi Rəhim Həsənovun arxasında dayandığı qapının önündə baş versə də, həlledici qərara əks qapının həndəvərində olan Rauf bəy təsir edib. Onun epizodu dəqiq görmək imkanı olmasa da, hansısa səbəbdən penalti olduğunu bildirib. Təcrübəsi kifayət qədər olmayan Həmzəzadə də hakimlərin dayandığı mövqeləri nəzərə almayaraq, qulaqcıqdan eşitdiyi penalti qərarını təsdiqləyib.
Hazırda Premyer Liqada fasilədi. Əvəzində I divizionda oyunlar davam edir. AFFA bu gün start götürən tura etdiyi təyinatlarla da Rəhim Həsənovun günahsız olduğunu göstərib. O, artıq başa çatmış "Zaqatala" – "Energetik" görüşünü idarə edib.
Digər qalmaqallı oyunun (AZAL – "Qəbələ") baş hakimi İnqilab Məmmədov isə "Şahdağ" – "Ağsu" görüşündə fit çalıb. Maraqlıdı ki, o, başqa briqada ilə iş başında olub, Şüvəlandakı köməkçilərindən isə yalnız biri – Rahil Ramazanov digər oyuna göndərilib. Bu, onu göstərir ki, Hakimlər Komitəsi yanlış qərarlara görə Vaqif Musayevlə 4-cü hakim Namiq Hüseynovu günahkar bilib. Halbuki Məmmədov özü də təyinat almamalı idi. Çünki bu gün İntizam Komitəsi onun da yanlışını üzə çıxardı və AZAL-lı İlqar Ələkbərov hətta sarı vərəqə belə almadığı halda 2 oyunluq cəzalandırıldı.
FƏRİD
![blank](https://futbolinfo.az/wp-content/plugins/wp-fastest-cache-premium/pro/images/blank.gif)