Layihə
Millimiz bu gecə qələbəyə oynayacaq – NİYƏ DƏ YOX!?
Robert Prosineçki ənənəsinə sadiq qalaraq, Şimali İrlandi…
Robert Prosineçki ənənəsinə sadiq qalaraq, Şimali İrlandiya ilə matçöncəsi mətbuat konfransında heyəti açıqladı. Onun müəyyənləşdirdiyi start “11-liy”inə dair mülahizələrimizi irəli sürməzdən öncə, elə həmin konfransdakı daha bir açıqlamasına diqqət yetirməyinizə zərurət duyuruq: “Rəşadı (Sadıqovu) çıxmaq şərti ilə qalan 23 futbolçunun hər biri sabahkı oyuna tam hazırdı”.
Başlayaq 2-ci hissədən. Berti Foqtsun keçirdiyi mətbuat konfransları yadınızdan çıxmış olmaz. Almaniyalı çalışdırıcı istənilən səfərdən öncə öz futbolçularını kiçildir, rəqibin millimizi asanlıqla üstələyəcəyini vurğulayır, matçda isə standart model – “avtobus”dan yararlanırdı. Matçöncəsi futbolçularına güvənmədiyini dilə gətirən baş məşqçi meydana çıxacaq yetirmələrindən nə tələb edə bilərdi? Ümumiyyətlə, meydana qədəm basan futbolçunun dizləri əsməyə bilərdimi?
Prosineçki isə nəinki start heyətə, ümumiyyətlə, iştirak ərizəsinə daxil ediləcək hər bir futbolçuya güvəndiyini dilə gətirir. Axı, yetirmələri də bu konfransda deyilənlərlə tanış olur. Komandada psixoloji ab-hava yüksək olduqda isə bu, hər bir oyunçuda öz əksini tapır.
İndi isə keçək start heyətinə. Xorvatiyalı mütəxəssis Rəşad Sadıqovun yoxluğunda Maksim Medvedevi müdafiənin mərkəzinə çəkib ki, bu da gözlənilən addım idi. Cinahlarda Arif Daşdəmirovla Məhəmməd Mirzəbəyova güvənməsi müzakirə mövzusu ola bilər. Lakin dəvətlilər sırasına göz gəzdirdikdə, dağıstanlı futbolçulardan üstün durumda olan kiminsə namizədiliyini irəli sürmək olmur.
Ən çox diqqətləri üzərinə cəlb edən isim isə Emin Mahmudovla Əfran İsmayılovdu. Prosineçkinin hər iki seçiminə real qiyməti birlikdə verək.
Başlayaq “Boavişta”da forma geyinmək şansı qazanmayan Emin Mahmudovdan. İndi hamı Dmitri Nazarovun yoxluğundan və Eminin hansı əsasla start heyətində yer almasını müzakirə etməyə, Prosineçkinin seçiminin yanlış olduğunu iddia etməyə çalışır. Amma məsələ burasındadı ki, yığmanın baş məşqçisi cari tsikldəki ilk 3 oyunla bağlı start heyətini müəyyənləşdirəndə də ağız büzənlərin sayı indikindən az deyildi. Təəssüf ki, ölkəmizdə hər tənqidçi özünü mütəxəssis kimi qələmə verməyə çalışır. Özü də söhbət Emin – Dmitri prizmasından yox, daha darindən gedir. Istənilən futbolçunun start heyətində meydana çıxması və ya çıxmamasının onlarla səbəbi ola bilər. Bir neçəsini sadalayaq: yaxın qohumu ağır xəstədi və fikri onun yanındadı, evi qarət olunub, soyuqlayıb, xırda zədəsi var, bu rəqibə qarşı tətbiq olunacaq taktiki sxemə uyğun gəlmir.
Bax, sonuncu bənd məhz Eminin start heyətində yer almasına aiddi. Şimali İrlandiya yığması atletik futbola üstünlük verir. Dmitri Nazarov da məhz bu üslubda futbolçudu. Millimiz bu komponentdə meydan sahiblərinə aşkar şəkildə uduzur. Deməli, Prosineçki yetirmələrinin fərqli üstünlüklərindən faydalanmalıdı. Bunlar arasında isə texnika, driblinq, elastiklik ön plana çıxır. Mahmudov da məhz bu keyfiyyətlərə sahib futbolçudu. Yarımmüdafiəçinin texniki bacarığı və son ötürmə istedadına sahib olması xorvatiyalının seçimində həlliedici rol oynadığını düşünürük. Ön xətti də nəzərə alan “kürən” Şeydayev üçün komfort yaratmağı qərara alıb. Çexiyayla görüşdə Ramil daha çox mübariz keyfiyyətlərini ortaya qoymuşdusa, bu dəfə ondan qol gözlənilir. Yəni, rəqibin müdafiə xəttinin potensialı çexlərdən zəifdi. Bunu nəzərə alan baş məşqçimiz heç-heçə deyil, qələbə barədə düşünür.
Oyunun axarı bərabərlikdən iki istiqamətə yönələ bilər. Hər iki halda Eminin əvəzlənməsi mümkün variantlar arasındadı. Millimiz hesabda önə çıxsa, Prosineçki komandasını müdafiəyə meylləndirə bilər ki, belədə, Mahmudov əvəzlənə bilər. Elə əksi baş versə də, Eminin əvəzinə döyüşə hansısa oyunçu, o cümlədən Nazarov atıla bilər. Çünki meydan sahibləri hesabı açsalar, müdafiəyə daha böyük qüvvə çəkəcəklər və belədə, uzaq məsafədən zərbələrə ehtiyac duyulacaq.
Əfran İsmayılova gəlincə, sağ cinaha ondan başqa namizədlərə nəzər saldıqda, ən ideal seçim edildiyini görürük. Namiq Ələsgərov ideal formasından çox uzaqdı. Ruslan Qurbanov sevimli sol cinahında qərarlaşıb. Belədə, Əfranın start heyətində olmaması daha təəccüblü olardı, nəinki olması.
Əvvəlki oyunlardan fərqli Prosineçkinin ehtiyat oyunçular skamyasına boylanmaq üçün də kifayət qədər seçimi var. Xüsusilə hücum xəttinin güclənməsi baxımından. Dəniz Yılmaz, Ağabala Ramazanov, Dmitri Nazarov, Araz Abdullayev kimi futbolçular millinin hücum potensialını gücləndirmək iqtidarında olan fiqurlardı.
Göründüyü kimi, axşamkı matça nikbin baxmaq üçün kifayət qədər əsasımız var. Bu milliyə inanmağa, güvənməyə dəyər. Hətta nəticə istədiyimiz kimi olmasa belə, komandamızı sonadək dəstəkləməliyik. Çünki bu komanda tariximizin ən güclü yığmasıdı.
CEYHUN ƏLİYEV
- Ölkə futbolu2024-04-11 10:32
AFFA-nın gülməli seçimi: Uğursuz klub rəhbəri Hakimlər Komitəsinə sədr olacaq?
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…