Ölkə futbolu
Roman Qriqorçuk: "Hakim köməyi ilə qazanılan xal və xallar mənə lazım deyil"
Topaz Premyer Liqasının 15-ci turu çərçivə…
Topaz Premyer Liqasının 15-ci turu çərçivəsində keçirilən "Qəbələ" – "Neftçi" oyunundan sonra meydan sahiblərinin baş məşqçisi Roman Qriqorçuk mətbuat konfransı keçirib. Futbolinfo.az xəbər verir ki, ukraynalı mütəxəssis hakim köməyi ilə xala ehtiyac duymadıqlarını bildirib.
– Qeyd etmişdiniz ki, sizə qaçan yox, qol vurmağı bacaran hücumçuya ehtiyac duyursunuz. Subotiçi bu cür forvard saymaq olar?
– Bugünkü oyun göstərdi ki, bəli! Hücumçularımı tənqid etmişəm. Ancaq bununla yanaşı, onlara dəstəyimi də göstərirəm. Forvardlarda bu cür hallar olur. Vurmadıqca tutulurlar. Ümid edirəm ki, bu uğursuzluq arxada qalacaq.
– Bu gedişlə "Qəbələ"nin heyətində ən çox qırmızı vərəqə alan siz olacaqsınız…
– Xoş deyil, amma rekord rekorddu. O ki qaldı epizoda, buna sadəcə, gülürəm. Çünki adi qərara emosional reaksiya verdikdə, qonaq komandanın ehtiyat oyunçular skamyasından kimsə üstümə şığıyır, əlini gözümə soxur. Özü də həmin adam heç baş məşqçi də deyil. "Neftçi"nin baş məşqçisinə böyük hörmətim var. Hadisə isə bizim ev sahibi olduğumuz oyunda baş verir. Nəticədə məni meydandan qovurlar.
– Qol ofsayddan vuruldu. Bunu şərh etməyinizi istəyərdik.
– Mənə bu barədə məlumat verdilər. Epizodun təkrarına baxmaq lazımdı. Ancaq hakim köməyi ilə qazanılan xal və xallar mənə lazım deyil. Sadəcə, bizə qarşı o qədər ədalətsizliklər olur ki… İstəmirəm, nə bizə kömək etsinlər, nə də rəqiblərimiz hakim köməkliyi ilə xal ehtiyatlarını artırsın. Mübarizənin şəffaf keçməsini arzulayıram.
CEYHUN ƏLİYEV