"Qalatasaray"ın yeni baş məşqçisi qalmaqala səbəb oldu

Türkiyənin "Qalatasaray" klubunun baş məşqçi Yan Old Rikerinklə yollarını ayırmağa qərar verdiyini xəbər vermişdik. Futbolinfo.az xəbər verir ki, artıq klub rəhbərliyi də hollandiyalı mütəxəssisin göndərildiyini rəsmən təsdiqləyib.

Belə ki, klub prezidenti Dursun Özbək mətbuata açıqlamasında Rikerinki istefaya göndərdiklərini bəyan edib. O, sabahdan etibarən yeni baş məşqçi axtarışına başlayacaqlarını diqqətə çatdırıb.

Türkiyə mətbuatı isə artıq yeni baş məşqçinin kimliyinin də bəlli olduğunu iddia edir. Həmkarlarımızın yazdığına inansaq, "sarı-qırmızılar"ı bundan sonra xorvatiyalı mütəxəssis İqor Tudor çalışdıracaq. Vaxtilə Split "Hayduk"unun (Xorvatiya) və PAOK-un (Yunanıstan) baş məşqçisi olmuş Tudorun son iş yeri Türkiyənin "Karabükspor" klubu idi.

Yeri gəlmişkən, "Qalatasaray"ın xorvatiyalı mütəxəssislə danışıqlara başlaması Karabük klubunun düşərgəsində kəskin narazılığa səbəb olub. Xüsusilə klub prezidenti Feridun Tankut yerli mətbuata açıqlamasında sərt ittihamlar səsləndirib:

"Tudor hazırda Xorvatiyadadı. Xanımı uşaq dünyaya gətirəcək. Komanda da istirahətə buraxılıb. Biz Tudorun qalmasını istəyirik. Bir həftə, 10 gün içində özü ilə görüşəcəyəm. Yeni mövsümdə də qalmasını istəyirəm. Müqaviləsinin müddəti mayın 31-də başa çatacaq. Amma "gedirəm" desə, zəncirlə saxlaya bilmərəm. Müqaviləsində bir maddə var. Özü müqavilənin müddəti bitmədən getsə, bizə 150 min avro ödəməlidir. Biz vaxtından öncə müqaviləyə xitam versək, ona 150 min avro ödəməliyik. Həmin məbləği ödəsə, sabah da gedə bilər. Amma mən Tudorun belə iş görəcəyinə inanmıram. Etik cəhətdən də düzgün olmaz. Ayrıca "Qalatasaray" da belə bir hərəkət etməz.

Lakin yayılan xəbərlər doğrudursa, həm Tudora yaraşmadı, həm də "Qalatasaray"a. Çox çirkin bir durumla üz-üzəyik. Ortada əxlaqsız bir olay var. Türkiyə futbol tarixinə qara bir ləkə olaraq keçəcək. Çünki Tudor bizimlə bu məsələ ilə bağlı görüş keçirməyib, müqavilə ilə hələ də komandamızın baş məşqçisidir. Buna görə Türkiyə Futbol Federasiyasına da şikayət ünvanlayacağıq. "Karabükspor" xəyanətə uğradı. Bu saatdan sonra telefonlarına da cavab vermərəm. "Qalatasaray"dan məni arasalar, heç bir şəkildə onlarla ünsiyyət qurmaram".