Ölkə futbolu
AFFA – "İnter" izdivacı yekunlaşdı: saysız problem yığını ilə…
Heç 2 ay da tamamlanmadı. Azər Əliyev gəldi və Azərbaycan…
Heç 2 ay da tamamlanmadı. Azər Əliyev gəldi və Azərbaycan futbolunda heç bir iz qoymadan getdi. Sığortaçılar Assosiasiyasının Müşahidə Şurasının sabiq sədri "İnter"in prezidenti postunda düz-əməlli kreslo üzü də görmədi.
Hələ yanvarın sonunda bəlli olmuşdu ki, "İnter" Beynəlxalq Bankın himayəsindən çıxır. 20 yaşlı kluba bundan sonra AFFA himayədarlıq edəcək. 2004-cü ilin yayından "bankirlər" adlanan komanda artıq sponsorunun üz döndərməsi üzündən ortada qalmışdı. "Xəzər Universiteti"nin varisi Beynəlxalq Bankın 13 illik sevgini bitirməsi üzündən dağılmaq təhlükəsi ilə üz-üzə idi.
Təbii ki, bankın imtinasından sonra Azər Əliyevin təsadüfi adam olduğu sahədə qalması da mümkün deyildi. AFFA klubu məcburən himayəyə götürsə də, ona rəhbərliyi, xərclənəcək maliyyəyə nəzarəti öz işçisinə tapşırdı.
3 həftəlik təhvil-təslim işləri dünən başa çatdı. Azər Əliyev çemodanını götürüb getdi, bütün idarəçilik AFFA-nın hüquqşünası Rəmiş Malıyevə keçdi. Klubda səlahiyyətli nümayəndə funksiyasını icra edəcək Rəmiş bəy yaya kimi komandanı idarə etməlidi.
Düzü, nəyin təhvil-təslim edildiyini bilmirik. Çünki Beynəlxalq Bank ötən ilin sonundan "İnter"dən əlini çəkmişdi və AFFA-ya bir yığın problem qoyub getdi. İndi onları həll etmək, futbolçulara qalan maaş borclarını bağlamaq lazımdı.
Hələ stadion məsələsi tam başqa mövzudu. "İnter Arena"nın taleyi müəmma olaraq qalır. Keçmiş ""Şəfa" stadionu klubun balansındadı, amma klubun səhmlərinin əsas hissəsi maliyyə nazirliyindədi. AFFA-nın 4 milyon manata (!) satdığı arena həm də girovdadı. Klub üçün götürülən 30 milyon manatın (!) qarşılığında keçmiş rəhbərlik "İnter Arena"nı bankda girov qoyub. Qurğunun alış dəyərindən 7-8 dəfə baha qiymətləndirilərək girov qoyulması özü bi müəmmadı.
Bundan başqa, arenanın ərazisində bir neçə üstüörtülü meydança salınıb. "Azfar" tərəfindən icarəyə götürülərək inşa edilən bu meydançaların icarə haqqını kimə ödəyəcəyi bilinmir. Hələ burada yaradılan "Yuventus" məktəbinin də taıeyi suaı altındadı. Bu layihə Beynəlxalq Bank tərəfindən maliyyələşdirilirdi və maya kimi mövcud olan müqavilə var. Klubun balansında olan stadiondakı bu məktəb də güman ki, fəaliyyətini dayandıracaq. Çünki bank futbola yatırım etməkdəm vaz keçib.
Dünənki təhvil-təslim prosesində futbolçulara bir sıra vədlər verilib. Belə ki, onlara oyunlara məsuliyyətlə yanaşmaq tövsiyyə olunub. Guya ki, yayda vəziyyət daha da yaxşılaşacaq. Lakin bu şirin vədə inanmaq olmur. AFFA himayə etdiyi klublara elə də yüksək büdcə ayırmayıb. Məsələn, "Kəpəz"də illik büdcə 1 milyon manat civarındadı, artərmaq mümkün deyil. "İnter"də isə real müqavilələrin dəyəri bundan 5 dəfə çoxdu və aylıq 600-650 min manat SOCAR üçün böyük yükdü. Ona görə də yayda ciddi ixtisarlar gözlənilir. Belədə futbolçulara hansı əsasla hər şeyin daha yaxşı olacağının vəd edilməsi anlaşılmazdı.
Həddindən artıq çoxlu sualın qaldığı bu izdivacın başlanğıcındaylq. Artıq "İnter"lə Beynəlxalq Bankı heç nə bağlamır. Bank 13 ildi maliyyə ayırdığı, vaxtilə "Xəzər Universiteti"ndən 200 min dollara aldığı klubu transfer qadağası, ağır borc öhdəlikləri və müəmmalı infrastruktur problemləri ilə birgə AFFA-nın üzərinə atıb getdi. İndi Rəmiş Maləyev təhvil aldığı klubda yeni səhifə açmalıdı. Yekun qərar isə yayda veriləcək. Hər halda, 20 illik tarixi olan klub dağılmadı, indi qalır sabit gələcəyi təmin etmək – ya yeni sponsorla, ya da AFFA-nın ianələri hesabına.
FƏRİD
- Ölkə futbolu2024-05-13 19:32
Rövşən Nəcəf: “Premyer Liqada iştirak edəcək klubların sayında artım olmayacaq”
- Ölkə futbolu2024-05-14 08:00
İcraiyyə Komitəsinin gözlənilən qərarları
- Ölkə futbolu2024-05-14 14:32
“Turan Tovuz”dan gedəcək futbolçuların siyahısı dəqiqləşir
- Digər2024-05-13 16:45
“Poz-Qazan” tarixində bənzərsiz uduşlu yeni “Prestij” lotereyası satışda